Выбрать язык
Книги Ветхого Завета
Книги Нового Завета
с русским текстом1 Мыланем Господьын шомакше лийын:2 «Айдеме эрге, тый вуянче калык коклаште илет. Ужаш манын, нунын шинчашт уло, но нуно огыт уж. Колаш манын, пылышышт уло, но огыт кол, вет нуно вуянче калык улыт.3 А тый, айдеме эрге, пленыш кайыше еҥ гай котомкатым пого да кечывал кечын шинча ончылнышт корныш тарване. Нунын шинча ончылнышт тиде вер гыч вес верыш лектын кай. Вуянче калык улыт гынат, ала умылат.4 Пленыш кайыме семын котомкашкет мо кӱлешым пыште да тудым кечывал кечын чылан шинча ончылно лук. А кастене нунын шинча ончылнышт пленыш кайыме гай лектын кае:5 шинча ончылнышт пӧрт пырдыжетым шӱтӧ да тушечын шке котомкатым лук.6 Шинча ончылнышт котомкатым вачӱмбакет пыште да пычкемыште тудым наҥгай. Тиде мландым ужаш огыл манын, чуриетым левед. Мый тыйым Израиль калыклан палдарыше пале семын ыштенам».
7 Кузе мылам кӱштымӧ лийын, мый тыгак ыштенам. Пленыш каяш мо кӱлешым мый кечывал кечын луктынам, а кастене кид дене пӧрт пырдыжым шӱтенам. Пычкемышалтмеке, котомкам луктынам да чылан шинча ончылнышт вачӱмбаке пыштенам.
8 Эрдене мылам Господьын шомакше лийын:9 «Айдеме эрге! Израильтян-влак, вуянче калык, тый дечет йодын огытыл мо: ”Тый мом ыштет?”10 Каласе нунылан: ”Тыге ойла Господь Юмо: Тиде – Иерусалимын вуйлатышыже да тушто улшо Израиль калык дене мо лийшаш нерген ончылгоч палдарымаш”.11 Каласе: ”Мый тыланда палдарыше пале улам, мом мый ыштенам, тиде тендан денат лиеш – те вес вере кусарыме, пленыш наҥгайыме лийыда.12 Тендан коклаште улшо вуйлатышыда, пычкемышалтмеке, котомкажым вачӱмбакыже пышта да корныш тарвана. Тудлан лекташ манын, пырдыжым шӱтат. Вуйлатыше шке чурийжым леведеш, да тудын шинчаже тиде мландым ок уж.13 Мый, Господь, тудын ӱмбак вапшым шуэм, да тудо Мыйын оптышышкем логалеш. Мый тудым Вавилоныш, халдей-влакын мландышкышт, наҥгаем. Но тудо саде мландым ок уж, тушанак кола.*а14 А тудын йыр улшо чыла еҥым – полышкалыше ден сарзыже-влакым – Мый чыла велыш шалатен колтем, почешышт керде дене поктен каем.15 Кунам Мый нуным калык-влак коклашке шалатем, эллашке пуалтен колтем, нуно пален налыт: Мый Господь улам.16 Но нунын кокла гыч икмыняр еҥым Мый керде деч, шужымаш ден шучко чер деч арален кодем. Тек нуно калык-влаклан, кӧмыт коклаште илаш тӱҥалыт, чыла йырнык пашаштым каласкалат. Тунам пален налыт: Мый Господь улам!”»
17 Мылам Господьын шомакше лийын:18 «Айдеме эрге! Киндетым тургыжланен коч, вӱдетым пырткен да чытырен йӱ.19 Тиде мландын калыкшылан каласе: ”Иерусалимыште илыше-влак да Израиль мланде шотышто Господь Юмо тыге ойла: киндыштым нуно тургыжланен кочкаш, вӱдыштым чытырен йӱаш тӱҥалыт, вет тушто илыше калыкын икте-весыштым шыгыремдылмылан кӧра мландышт перкелык деч посна кодеш.20 Илыме олашт-влак шалатыме лийыт, мланде пустаҥеш. Тунам те пален налыда: Мый Господь улам”».
21 Мыланем Господьын шомакше лийын:22 «Айдеме эрге! Могай тиде калыкмут тендан дене, Израиль мландыште, уло: ”Жап эрта, да пророк кончымаш-влак укеш лектыт”?23 Каласе нунылан: ”Тыге Господь Юмо ойла: Мый тиде калыкмутлан мучашым пыштем, тудым Израильыште тетла кучылташ огыт тӱҥал!” Тыге каласе нунылан: ”Тугай жап шуэш, кунам кажне пророк кончымаш шукталтеш.24 Ончыкыжым Израиль калык коклаште ик шояк пророклымашат ок лий, ӱеден ойлымо ик ончык ужын каласымашат ок лий.25 Мый, Господь, ойлаш тӱҥалам, да мом ойлымем жапым шуйкалыде шукталтеш. Тендан илыме кечылаште, вуянче калык, Мый шомакем каласенам да тудым шуктем”, – ойла Господь Юмо».
26 Мыланем Господьын шомакше лийын:27 «Айдеме эрге, теве мом израиль эрге-шамыч ойлат: ”Ужмо кончымашыже шуко ий эртымеке шукталтеш, тудо пеш торасе жап нерген пророклен ойла”.28 Сандене нунылан каласе: ”Тыге ойла Господь Юмо: Мыйын шомакем-влак жапым шуйкалыде шукталтыт, чыла каласымем шукталтеш, – ойла Господь Юмо”».
*а 12:13 Ончо: 4 Куг 25:7.
Глава 12