Выбрать язык
Книги Ветхого Завета
Книги Нового Завета
с русским текстом1 Кудымшо ийын кудымшо тылзыжын визымше кечынже, кунам мый шке мӧҥгыштем шинченам да ончылнем Иудан кугуракше-влак шинченыт, ӱмбакем Господь Юмын кидше волен.2 Мый [айдемыла] койшым, тул гайым, ужынам. Кыдал деч ӱлыкыла Тудо тул гай лийын, а кыдал деч кӱшкыла Тудын чылажат йылгыжше тойла йолгыжын.3 Тудо ала-мом кид гай койшым шуялтен да мыйым ӱпем гыч кучен. Шӱлыш мыйым мланде ден кава коклашке нӧлталын да Юмын кончымаштыже Иерусалимыш, кӧргӧ кудывечын йӱдвел капка оралтыш пурымо вер деке конден – туштыжо Господьын шыдыжым лукшо шояк юмо шоген.4 Тиде верыште Израиль Юмын чапше лийын, тыгай чапым тидын деч ончыч мый тӧрверыште ужынам.
5 Тудо мылам каласен: «Айдеме эрге, йӱдвелыш ончал». Мый ончалынам да йӱдвелне, жертвенник воктенысе капкаш пурымо верыште, Господьын шыдыжым лукшо тиде шояк юмым ужынам.6 Господь мылам каласен: «Айдеме эрге, мом нуно ыштылыт, ужат мо? Ончал, могай кугу йырныкым Израиль калык тыште ыштылеш! Тидлан кӧра Мый шке святой верем коден каем. Но умбакыже ончо – тый эшеат кугу йырнык-влакым ужат!»
7 Господь мыйым кудывечыш пурымо вер деке конден. Мый ончалынам да пырдыжыште рожым ужынам.8 Тудо мылам каласен: «Айдеме эрге, пырдыж рожым кугемде». Мый кугемденам да тушто ала-могай омсам ужынам.9 Тудо мылам каласен: «Пуро да ончал – могай осал йырныкым нуно тыште ыштылыт!»10 Мый пуренам да ужынам: йырым-йыр пырдыжлаште нушкын коштшо-влакын, ару огыл янлыкын да Израиль калыкын тӱрлӧ шояк юмыжо-влакын сӱретыштым сӱретлен пытарыме.11 Нунын ончылно Израиль калыкын кугуракше-влак кокла гыч шымле еҥ шоген, коклаштышт Иезаний, Шафан эрге, лийын. Кажныжын кидыштыже тамлыпушым тӱтырымӧ ате лийын, тушечын тӱтырымӧ шикш кӱшкӧ нӧлталт шоген.12 Господь мылам каласен: «Айдеме эрге, ужат мо – мом Израиль калыкын кугуракше-влак пычкемышыште, кажныже сӱретлен пытарыме шке пӧлемыштыже, ыштылыт? Нуно ойлат: ”Господь мемнам ок уж, Господь тиде мландым коден каен!”»13 Тудо мылам эше каласен: «Умбакыже ончо – тый нунын эшеат кугу йырнык-влакым ыштылмыштым ужат».
14 Тудо мыйым Господьын пӧртшын йӱдвел капкашкыже пурымо вер деке конден. Тушто мый Фаммуза*а шотышто шортын шинчыше ӱдырамаш-влакым ужынам.15 Тудо мылам каласен: «Ужат мо тидым, айдеме эрге? Но умбакыже ончо – тый эшеат кугу йырнык-влакым ужат».
16 Тудо мыйым Господьын пӧртшын кӧргӧ кудывечышкыже пуртен. Тушто, храмыш пурымо вер воктене, ончыл пӧлем ден жертвенник коклаште, коло вич наре пӧръеҥ лийын. Господьын храмже деке тупынь, а чурийышт дене эрвелкыла шоген, нуно вуйыштым кечылан савеныт.17 Тудо каласен: «Тый тидым ужат, айдеме эрге? Тыште ыштыме йырнык пашашт Иуда калыклан шагал, нуно пӱтынь элым пызырен илымаш дене теменыт да Мыйын шыдем эшеат чот луктыт. Ончал, кузе нуно нерышт деке укш-влакым лишемдат.*б18 Тыге ыштымыштлан Мый ӱмбакышт шыдем опталам. Мый нуным ом чамане, ом серлаге. Нуно Мый декем кугу йӱкын кычкыраш тӱҥалыт гынат, нуным ом колышт!»
*а 8:14 Фаммуза – Вавилонын сай лектыш ден йӱрым пуышо юмыжо.
*б 8:17 Тыште мо нерген ойлалтеш, каласаш неле. Очыни, укш-влак кечылан кумалме йӱла дене кылдалтыныт.
Глава 8