Библия
Выбрать язык
Книги Ветхого Завета
Книги Нового Завета
с русским текстом
ИЕРЕМИЙЫН ШОРТМО МУРЫЖО
3 Глава
Кеч-мыняр неле гынат, ӱшан садак уло.1 Господьын шыдылык тояже мыйым кырен,
улам мый шуко орлыкым ужшо айдеме.
2 Тудо мыйым наҥгаен
да волгыдыш огыл, а пычкемышыш пуртен.
3 Шке кидшым Тудо ӱмбакем виктарен,
кажне кечын тудым нӧлталеш.
4 Капем ден коваштем лунчыртен,
луэмым пудыртен.
5 Мыйым йыр авырен налын,
кочо орлык дене авалтен.
6 Пычкемыш верыш Тудо петырен шынден,
мый пуйто шукертак колышо-влак коклаште улам.
7 Пырдыж дене авырен – ом керт мый лектын,
неле шинчыр дене мыйым кепшылтен.
8 Кычкырем, полышым йодам,
но ынеж кол Тудо кумалмем.
9 Кӱ-влак дене корнем петырен,
кайышаш йолгорнем гыч мыйым кораҥден.
10 Лийын Тудо мыланем ваҥен шинчыше маска гай,
шылын шичше лев гай.
11 Корнем гыч мыйым кораҥден,
кӱрыштын да кудалтен коден.
12 Чымалтарен Тудо йоҥежшым,
пикшыжлан мишеньым мыйым ыштен,
13 шке лодакше гыч пикш-влакым вергышкем лӱен.
14 Лийынам мый уло калыкемлан воштылчык –
кажне кечын мыйым мыскылен мурат.
15 Тудо мылам кочо шудым теммеш пукшен,
арымшудо вӱдым йӱктен.
16 Кӱм пурыктен, пӱем пудыртен,
мыйым пуракыш тошкен.
17 Йомдаренам чон ласкалыкым,
сай илышым монденам.
18 Тунам каласенам мый:
«Уке нимогай куатем, Господь мый дечем ӱшанем налын!»
19 Шарналте мыйын орлыкем, перныл коштмем,
вет илышем – лач арымшудо да кочо орлык.
20 Чонем тидым сайын шарна,
мыйым шӱлык авалтен.
21 Но теве мом шӱмемлан ойлем,
теве мыйын инанымашем:
22 Господьын порылыкшылан кӧра ме пытен огынал,
Тудын чаманымашыже иземын огыл!
23 Кажне эрдене Тудын порылыкшо уэмеш.
Ӱшанле улмет Тыйын кугу!
24 Чонемже ойла: Господь – мыйын ужашем,
Тудлан мый инанем!
25 Тудым ӱшанен вучышо, Тудым кычалше еҥ деке
Господь поро лиеш.
26 Сай лиеш тудо еҥлан,
кӧ Господьын утарымашыжым чытен вуча.
27 Сай лиеш тудо еҥлан,
кӧ самырык годсек омытам нумалеш.
*а28 Тек тудо шкетын шып шинча,
вет ӱмбакше омытам Господь пыштен.
29 Тек тудо кумык возеш, умшаж дене мланде дек пызна –
ала эше кодын ӱшан.
30 Тек шӱргыжым совкалаш пуа,
шуко намысым чыта.
31 Вет курымешлан огыл Господь коден каен,
32 кеч Тудо ойгым колтен,
варажым кугу порылыкшылан кӧра чамана.
33 Вет Тудо шӱм кумылжо почеш огыл
айдеме эрге-влакым наказатла да ойгандара.
34 А кунам эрык деч посна кодымо-влакым
йол дене тошкат,
35 кунам Чыла деч Кӱшылысын чурийже ончылно
еҥым чын огыл судитлат,
36 кунам судышто шыгыремдылыт,
чыла тидым Господь ок уж мо?
37 Иктаж-кӧн каласымыже шукталтеш мо,
тидлан шукталташ Господь кӱштен огыл гын?
38 Чыла деч Кӱшылысын шомакше почеш огыл мо
сайжат, осалжат толеш?
39 Молан илыше айдеме вуйым шиеш,
кунам шке сулыкшылан мутым куча?
40 Тергена, шымлена шке корнынам
да Господь дек савырнена!
41 Каваште улшо Юмо дек киднам нӧлталына,
шӱмнам савырена да каласена:
42 «Ме Тый дечет кораҥынна, ӱскырт лийынна,
да Тый языкнам кудалтен отыл.
43 Леведалтынат Тый шыде дене,
мемнам поктенат, чаманыде пытаренат.
44 Кумалмына Тый декет ынже шу манын,
Шкендым пыл дене леведынат.
45 Калык-влак коклаште мемнам
шӱкшакыш, лавыраш савыренат.
46 Чыла тушманна мемнан ӱмбак умшаштым кареныт.
47 Шучкылык ден вынем, пустаҥмаш ден пытымаш –
теве мо мемнан дене лийын!»
48 Шинчам гыч эҥер семын вӱд йога,
вет мыйын калыкем пыта!
49-50 Господьын ончалмешкыже,
кава гычын ужмешкыже,
шинчам гыч вӱд йогаш тӱҥалеш, ик татланат ок чарне.
51 Ончем мый, да оламын ӱдыржӧ-влак верч
чонемым ойго авалта.
52 Мыйым, пуйто кайыкым, кучаш тӧченыт,
амал деч посна тушманем-влак поктеныт.
53 Мыйым илышынек вынемыш кудалтеныт,
ӱмбакем кӱм кышкеныт.
54 Вуем деч кӱшкӧ вӱд нӧлталтын,
да мый шоналтышым: «Толын мыланем мучаш!»
55 Келге вынем гыч, Господь,
мый лӱметым ӱжынам.
56 Колынат Тый мыйын йӱкем;
ит петыре пылышетым полышым йодын кумалмем деч!
57 Кунам мый Тыйым ӱжын кумалынам,
лишемынат да ойленат: «Ит лӱд».
58 Тый мыйым, Господь, пыдалынат,
чонемым сулен налынат.
59 Господь, Тый мыйым шыгыремдымым ужат –
мылам чын судым ыште.
60 Палет Тый нунын ӱчым шуктышо кумылыштым,
мылам осалым ышташ шонымыштым.
61 Ужат Тый, Господь, нунын мыскылымыштым,
мылам осалым ышташ шонымыштым,
62 кузе тушманем-влак кажне кечын
мыйын ваштареш осал чоям кутырат.
63 Ончал: шинчат нуно але шогат –
шке мурыштышт мыйым мыскылен мурат.
64 Пӧртылтӧ нунылан, Господь,
кидыштын пашашт почеш,
65 колто уш аҥыргымашым,
ӱмбакышт – шке каргымашетым!
66 Господь, поктен кай нуным шыдет дене,
кава йымач пытаре!
*а 3:27 Тыште мут колыштшо, шкенжым ӱҥышемден кертше еҥ нерген ойлалтеш.
Глава 3
