Библия
Выбрать язык
Книги Ветхого Завета
Книги Нового Завета
с русским текстом
ИЕРЕМИЙЫН ШОРТМО МУРЫЖО
2 Глава
Господь Иерусалимым мут кучаш шогалта.1 О, Господь шке шыдыж дене
Сион ӱдырым пычкемышыш сӱмырал шуэн!
Израильын моторжым
кава гыч мландыш кудалтен,
шке шыдыжын кечынже Тудо
йол шындыме вержым шарналтен огыл!
2 Иаковын илыме верлажым
Господь чаманыде пытарен,
Иуда ӱдырын карманже-влакым
шыдыж дене шалатен, мландымбак сӱмырен.
Уло кугыжанышым да онжо-влакым
Тудо намысыш пуртен,
3 Израильын чыла тӱкыжым
йӱлышӧ шыдыж дене шалатен.
Шке кидшым Тудо кораҥден,
тушман деч аралымыжым чарнен.
Когартыше да йырым-йыр чыла пытарыше тул семын
Тудо Иаковым йӱлалтен!
4 Господь шке пикшйоҥежшым чымалтарен,
тушман семын кидшым лӱяш виктарен.
Мо шинчам куандарен,
чыла пытарен,
Сион ӱдырын омашыже ӱмбак
шыдыжым тул семын йоктарен.
5 Тушман семын лийын Господь,
Израильым Тудо пытарен!
Полатше-влакым шалатен,
карманже-шамычым сӱмырен,
Иуда ӱдырын уремлажым
мӱгырен шортмо йӱк дене темен!
6 Шке пырдыжшым Тудо садым авырыше пырдыж семын шалатен,
шке погынымаш вержым сӱмырен шуэн!
Святой пайрем ден шуматкече-влакым
Господь Сионышто мондыктен,
кугун шыдешкымыж дене Тудо
кугыжа ден иерейым Шкеж деч кораҥден.
7 Шке жертвенникше дек Тудо тупынь савырнен,
святой вержым коден каен!
Полат-влакын пырдыжыштым
Господь тушман кидыш пуэн.
Господьын пӧртыштыжӧ тушман гӱжлен,
пуйто тудын пайрем!
8 Шонен пыштен Господь
Сион ӱдырын пырдыжшым шалаташ –
висыме кандырам Тудо шуен,
пытарыме деч кидшым кучен огыл.
Башне ден пырдыж-влак шортыт,
нуно чыланат пырля сӱмырленыт!
9 Капкаже-влак лыптырген волен шинчыныт,
тӱкылтыш-шамычшым Тудо шалатен кудалтен!
Кугыжам да он-влакым пленыш наҥгаеныт,
йот калык-шамыч коклаште нуно улыт.
Законым тетла огыт туныкто,
пророк-влаклан Господь кончымашым ок колто.
10 Сионын кугуракше-влак
мланде ӱмбалне шып шинчат,
вуйышкышт пуракым шавеныт,
ӱмбакышт чоштыра вургемым чиеныт.
Иерусалимын ӱдыржӧ-влак
вуйыштым кумык сакеныт.
11 Шинчавӱд деч вудакаҥын шинчамже,
уло кӧргем йӱла,
шӱмем кӱрышталтеш –
мыйын калыкем пыта!
Йоча ден изи аза-влак
ола уремлаште шужен колат!
12 Шке аваштлан нуно ойлат:
«Кочмем шуэш, йӱмем шуэш!»
Сусыргышо семын нуно
ола уремлаште колат,
шке аваштын кидыште
пытартыш шӱлышышт лектеш.
13 Мом мый тылат каласем,
мо дене тыйым таҥастарем, Иерусалим ӱдыр?
Тыйым лыпландараш манын,
мо дене тыйым таҥастарем, Сион ӱдыр?
Тыйын сусырет теҥыз гай келге,
кӧ тыйым паремден кертеш?
14 Яра, шояк кончымашым тылат
пророк-влакет увертареныт.
Сулыкет-влакым нуно тылат ончыктен огытыл,
уке гын плен деч утарен кодат ыле.
Пророк шомакышт лийын шоя,
тыйым ондален наҥгайыше.
15 Воктеч эртен кайыше-влак, тыйым ужын,
кидышт дене лупшалыт,
Иерусалим ӱдыр ӱмбак ончен,
ӧрын шӱшкалтат да вуйыштым рӱзалтен каласат:
«Тиде олам огыл мо ”эн сӧрал да чевер,
уло тӱнян куанже” манын лӱмденыт?»
16 Тушманет-влак тыйым мыскылаш
почыныт умшаштым,
чушлат да пӱйыштым пурын ойлат:
«Ме тудым пытарышна!
Тиде кечым ме кужун вучышна,
теве ынде вучен шуктышна!»
17 Господь мом шонен пыштымыжым ыштен,
мом ожнак увертарен, тиде шомакшым шуктен.
Тудо тыйым чаманыде шалатен,
сеҥалтмет дене тушманетым куандарен,
нунын тӱкыштым нӧлталын.
18 Уло шӱм-чон дене еҥ-влак
Господьым ӱжын кычкырат.
*а О, Сион ӱдырын пырдыжше!
Эҥер семын йӱдшӧ-кечыже
шинчавӱдым йоктаре,
ик татланат ит чарне,
шинчатлан канышым ит пу!
19 Кынел, йӱдым кажне орол черет тӱҥалтыште
*б ӱжын кычкыре!
Господь чурий ончылно поч шӱм-чонетым!
Тудын деке кидетым нӧлтал,
йочат-влак илыше кодышт манын кумал,
вет нуно кажне урем лукышто шужен лунчыргат.
20 «Ончал, Господь, ончал:
кӧлан Тый иктаж-кунам тыгайым ыштенат?
Ава-влак шке азаштым кочкыт,
кӧмытым йӧратен ончен пукшеныт!
Господьын святой верыштыже
иерей ден пророк-влакым пуштедат!
21 Йоча ден шоҥгыеҥ-шамыч
уремлаште пуракыште кият,
ӱдыр ден рвезе-влакемым
керде пытарен.
Шыдетын кечынже Тый нуным пуштынат,
чаманыде шӱшкылынат.
22 Пайремыш ӱжмӧ семын мыйын ӱмбакем
Тый шучкылыкым чыла велым ӱжынат.
Господьын шыдыжын кечынже
нигӧ утлен огыл, илыше кодын огыл.
Кӧм пукшенам, ончен куштенам –
тушманем чылаштым пытарен!»
*а 2:18 Тидым вес семынат умылаш лиеш: «Уло шӱм-чонет дене Господьым ӱжын кычкыре!»
*б 2:19 Йӱд орол черет – Израильыште йӱдым кум орол черетлан шелыныт.
Глава 2
