Выбрать язык
Книги Ветхого Завета
Книги Нового Завета
с русским текстом1 Господь деч пророк Иеремийлан вес калык-влак нерген теве тыгай шомак лийын.
2 «Египет нерген. Фараон Нехаон, Египет кугыжан, сарзывийже нерген, кудыжо Евфрат эҥер воктенысе Кархемисыште шоген. Иуда кугыжа Иоакимын, Иосий эргын, нылымше ий вуйлатымыж годым тиде сарзывийым Вавилон кугыжа Навуходоносор кырен шалатен.
3 Изи ден кугу авыртышым ямдылыза
да кредалаш лекса!
4 Имне-влакым ӧртньӧрлыза да шичса,
ӧшлӧкым упшалын, рат дене шогалза!
Умдым пӱсемдыза, кӱртньӧ тувырым чийыза!
5 Но мом Мый ужам?
Нуно лӱдыныт да чакнен куржыт,
сарзышт кырен шалатыме улыт.
Куржыт нуно, шеҥгек ончалде,
чыла могырым шучкылык! – ойла Господь. –
6 Писе йолан куржын ок утло, виян сарзе ок утаралт.
Йӱдвелне, Евфрат эҥер дене,
нуно шӱртнят да камвозыт.
7 Кӧ тиде нӧлталтеш кугу эҥер семын,
вӱдшӧ гӱжла кугу йогын семын?
8 Египет нӧлталтеш кугу эҥер семын,
тудын вӱдшӧ гӱжла кугу йогын семын!
Ойла тудо: ”Нӧлталтам да пӱтынь мландым леведам,
ола ден илыше-шамычым пытарем!”
9 Кудалза, имне-влак! Чымалтса, орва-влак!
Лекса, виян сарзе-шамыч:
авыртышым кучышо эфиоп ден ливий-влак,
пикш дене лӱйкалыше лудей-шамыч!
10 Тиде кече – Господь Юмо Саваофын кечыже,
тушманже-влаклан ӱчым шуктымо кече.
Керде тӱҥалеш пӧжгаш теммешке,
вӱрым тудо йӱын темеш.
Тыге Йӱдвел мландыште, Евфрат эҥер дене,
Господь Юмо Саваофлан пайрем надырым шӱшкылмаш лиеш.
11 Египет ӱдыр, Галаадыш кай
да шкаланет бальзамым нал!
Арам тый шуко эмым кучылтат,
ок лий тыланет пареммаш.
12 Тыйын намысет нерген калык-влак колыныт,
варгыжметше мландым темен.
Сарзе-влак, икте-весышт дек шӱртнен,
чыланат пырля камвозыныт».
13 Теве Вавилон кугыжа Навуходоносорын Египет ӱмбак толмыж нерген Господьын пророк Иеремийлан увертарыме шомакше:
14 «Каласкалыза Египетыште,
увертарыза Мигдолышто,
ойлыза Ноф ден Тафнисыште, каласыза:
”Кынел шогалза да ямдылалтса,
вет йырым-йыр керде чыла пытара!”
15 Молан виян юмет йӧралтын?
Тудо шоген кертын огыл,
Господь тудым сӱмырен кудалтен.
16 Шуко еҥым Тудо сӱмырен кудалтен,
икте-весышт ӱмбаке нуно шуҥгалтыныт.
Илыше кодшо-влак ойлат:
”Кынелза, шке калыкна деке, тукым мландышкына пӧртылына,
пытарыше керде деч умбаке каена!”
17 Еҥ-влак кычкырат:
”Фараон, Египет кугыжа, лач моктанаш мастар –
тудын жапше эртен!”
18 Шкем дене товатлем, – ойла Кугыжа,
Кӧн лӱмжӧ Господь Саваоф, –
толеш тудо, кӧ курык коклаште Фавор курык гай кугу,
кӧ теҥыз воктенысе Кармил курык гай кӱкшӧ.
19 Египетыште илыше, арверетым пого,
ямде лий куснен каяш!
Вет Ноф лиеш пустаҥдыме, шалатыме,
илыше-влак деч посна кодеш.
20 Египет – мотор туна,
но йӱдвел гыч тудын деке кугу пормо чоҥешта, чоҥешта!
21 Тарлыме сарзе-влак Египетыште
ӧрдыктарыме ӱшкыж гай улыт,
но нунат мӧҥгеш савырнен кудалыт, огыт керт шоген,
вет нунын дек пытымаш кече, мут кучымо жап, толын.
22 Кишке семын Египет чужла да нушкын кораҥ кая,
вет тушман сарзывий толеш ӱмбакше,
пум руышо семын товар дене лишемеш.
23 Чодыражым, сип чодыражым нуно руат, –
ойла Господь, –
вет нуно шурнышырчык деч шукырак улыт,
ок лий нуным шотлен пытараш!
24 Намысыш пурен Египет ӱдыр,
йӱдвел калыкын кидышкыже тудым пуымо.
25 Господь Саваоф, Израильын Юмыжо, тыге ойла: Амоным, Но олан юмыжым, тыгак фараон ден уло Египетым – Египетын юмыжо ден кугыжаже-влакым, фараоным да тудлан инаныше-шамычым – Мый мут кучаш шогалтем.26 Нуным Мый чоныштым кычалше Вавилон кугыжа Навуходоносорын да тарзыже-влакын кидышкышт пуэм. Но вара Египетыште ончычсо семынак еҥ-влак илаш тӱҥалыт.
27 А тый ит лӱд, Иаков тарзем,
ит чытыре, Израиль!
Мый тыйым мӱндыр эл гыч утарем,
пленыште лийме мланде гыч тукыметым луктам.
Иаков пӧртылеш, ласкан да тыныслын илаш тӱҥалеш,
нигӧ тудым ок лӱдыктӧ.
28 Ит лӱд, Иаков тарзем, – ойла Господь, –
вет Мый пеленет улам.
Пӱтынек пытарем чыла калыкым,
кӧмыт коклашке тыйым шалатен колтенам.
Мый тыйым ом пытаре,
но пашат почеш чын наказатлем,
мут кучыктыде ом кодо».
Глава 46