Выбрать язык
Книги Ветхого Завета
Книги Нового Завета
с русским текстом1 Кунам Иеремий калыклан Господь Юмын чыла шомакшым увертарен – нуным каласаш Тудо Иеремийым колтен –2 Азарий, Гошайын эргыже, Иоханан, Карейын эргыже, да чыла сӱрза еҥ-влак Иеремийлан каласеныт: «Тый шоякым ойлет! Господь тыйым ”Египетыш илаш ида кай” манын ойлаш колтен огыл.3 Тиде Варух, Нирий эрге, тыйым мемнан ваштареш тарата. Халдей-влак мемнам пуштышт але Вавилон пленыш наҥгайышт манын, тудо мемнам нунын кидыш пуынеже».
4 Тыге Иоханан, Карей эрге, чыла сарзывуй да уло калык Господьын Иуда мландыште кодаш кӱштымыжым колыштын огытыл.5 Вес калык-влакын мландышкышт поктен колтымо да варажым шке мландышкышт илаш пӧртылшӧ Иуда калык гыч утаралт кодшо чыла еҥым Иоханан, Карей эрге, да сарзывуй-влак наҥгаеныт.6 Нуно тыгак пӧръеҥ ден ӱдырамаш-влакым, йоча-шамычым, кугыжан ӱдыр-влакым – капорол вуйлатыше Навузарданын Ахикам эрге Годолий дене, Шафанын уныкаж дене, кодымо чыла еҥым – наҥгаеныт. Пеленышт эше пророк Иеремий ден Варухым, Нирий эргым, налыныт.7 Господьын каласымыжым шотыш налде, нуно Египетыш каеныт, Тафнисыш миен шуыныт.
8 Тафнисыште Иеремийлан Господь деч шомак лийын:9 «Икмыняр кугу кӱм нал да нуным Иуда эрге-влакын шинча ончылнышт Тафнисыште, фараонын полатышкыже пурымо вер воктене, шун дене леведме кудывечыште урен шынде.10 Нунылан каласе: тыге ойла Господь Саваоф, Израильын Юмыжо: Мый тышке Вавилон кугыжа Навуходоносор тарземым ӱжын кондем да тудын престолжым Мыйын урен шындыме нине кӱ-влак ӱмбаке шындем. Нунын ӱмбалне тудо шке кугыжа омашыжым шара.11 Тудо толеш да Египетым кырен шалата: пушташ пуымо-влак пуштмо лийыт, пленыш пуымо-шамыч пленыш каят, кердылан пуымо-влак керде йымаке логалыт.12 Египет юмо-влакын храмыштым Мый туллан пуэм. Нине юмо-влак кокла гыч иктыштым Вавилон кугыжа йӱлалта, а весыштым пеленже наҥгая. Кузе кӱтӱчӧ шке вургемжым почкалта, туге Навуходоносор Египетым почкалта да тушечын тыныс дене кая –13 Египет мландысе Вефсамисыште*а кумалме меҥге-влакым пытара, Египет юмо-влакын храмыштым тул дене йӱлалта».
*а 43:13 Вефсамис (але Бет-Шемеш) лӱм «Кече Пӧрт» манмым ончыкта, вес лӱмжӧ – Илиополь.
Глава 43