Выбрать язык
Книги Ветхого Завета
Книги Нового Завета
с русским текстом1 Чыла сарзывуй, Карей эрге Иоханан, Гошай эрге Иезаний да уло калык, изи гыч кугу марте, толыныт2 да пророк Иеремийлан каласеныт: «Тыйым йодына, кумал мемнан верч Господь Юметлан, кумал утаралт кодшо калык верч. Вет тый шкеак ужат, ала-кунам ме шукын лийынна, а кызыт шагалын кодынна.3 Тек Господь, тыйын Юмет, мыланна кушко каяш да мом ышташ кӱлмым ончыкта».
4 Пророк Иеремий нунылан вашештен: «Йӧра, йодмыда семынак мый Господь Юмыланда кумалам. Чыла, мом Господь каласа, тыланда увертарем, нимом ом шылте».5 Нуно Иеремийлан каласеныт: «Тек Господь мыланна чын да ӱшанле танык лиеш: мом тыйын гоч Господь Юмет каласа, ме чылажымат тыгак ыштена.6 Тиде мыланна келша але ок келше, но Господь Юмынам, Кудын дек тыйым колтена, ме колыштына. Вет Господь Юмынам колыштына гын, мемнан дене чыла сай лиеш».
7 Лу кече эртымеке, Иеремийлан Господь деч шомак лийын.8 Иеремий шкеж деке Карей эрге Иохананым, тудын дене пырля улшо сарзывуй-влакым да уло калыкым, изи гыч кугу марте, ӱжын9 да нунылан каласен: «Тыге ойла Господь, Израильын Юмыжо, Кудын деке те мыйым йодаш колтенда:10 ”Те тиде мландыште кодыда гын, Мый тендам ом шалате, а пеҥгыдемдем, вожге ом кукло, а угыч шындем. Вет тыланда туткарым колтымемлан Мый ӧкынем.11 Ида лӱд Вавилон кугыжа деч, кудын деч чытыреда. Ида лӱд тудын деч, – ойла Господь, – вет Мый тендан дене улам, Мый тендам утарем, тудын кидше йымач тендам луктам.12 Мый тыланда порылыкым ончыктем, да тудо тендам серлага, шке мландышкыда пӧртылта.13 Но те ’Ме тиде мландыште илаш огына тӱҥал’ манын каласеда да Господь Юмыдам огыда колышт,14 ’Ме Египетыш каена, тушто сарым огына уж, кредалаш ӱжшӧ пуч йӱкым огына кол, шужен шинчаш огына тӱҥал – ме тушто илаш тӱҥалына’ каласеда гын,15 колыштса кызыт Господьын шомакшым, те, Иуда калык гыч утаралт кодшо-влак! Тыге ойла Господь Саваоф, Израильын Юмыжо: те Египетыш каяш шонен пыштеда да тушко илаш каеда гын,16 керде, кудын деч лӱдыда, тендам Египетыште поктен шуэш, да шужымаш, кудын деч лӱдыда, тендан почеш мия – тушто те коледа.17 Кажныже, кӧ, Египетыште илаш манын, тушко каяш шонен пышта – керде, шужымаш да шучко чер деч кола. Нигӧ нунын кокла гыч илыше ок код, Мыйын колтымо азап деч ок утло.18 Тыге ойла Господь Саваоф, Израильын Юмыжо: кузе Мыйын кугу шыдем Иерусалимыште илыше-влак ӱмбак йоген, тугак Мыйын шыдем тендан ӱмбак йога, кунам те Египетыш миеда. Тушто те каргымаш ден шучкылык, воштылчык ден мыскылтыш лийыда да тетла шке элдам огыда уж”.
19 Иуда калык гыч утаралт кодшо-влак, Господь тыланда тыге ойла: ”Египетыш ида кай!” Пален шогыза, таче мый тендам шижтаренам.20 Мыйым Господь Юмына дек колтен, те кугу йоҥылышым ыштенда, вет те каласенда: ”Мемнан верч Господь Юмыланна кумал, мом Тудо каласа, мыланна увертаре – ме чыла шуктена”.21 Тидым мый таче тыланда увертаренам, но те Господь Юмынамат, мыйын гоч тыланда колтымо шомакшымат огыда колышт.22 Пален шогыза: тудо верыште, кушко илаш кайынеда, те керде, шужымаш да шучко чер деч коледа!»
Глава 42