Выбрать язык
Книги Ветхого Завета
Книги Нового Завета
с русским текстом1 Иуда кугыжа Иоакимын, Иосий эргын, вуйлатымыж годым Иеремийлан Господь деч тыгай шомак лийын:2 «Рехав тукым еҥ-влак деке кай да нунын дене кутыралте, вара нуным Господьын пӧртысӧ ик пӧлемышкыже кондо да йошкар аракам подылаш пу».
3 Мый каенам да Иазанийым, Иеремий эргым, Авацинийын уныкажым, тудын иза-шольыжо-влакым да чыла эргыжым – уло Рехав тукымым – пеленем налынам4 да Господьын пӧртышкӧ, Ханан эрге-влакын пӧлемышкышт, конденам. Ханан, Годолий эрге, Юмын еҥже лийын. Тиде пӧлем он-шамычын пӧлемышт воктене, омса орол Маасейын, Шаллум эргын, пӧлемже ӱмбалне верланен улмаш.5 Мый Рехав тукым еҥ-влак ончыко йошкар аракам темыман кувшин ден корка-влакым шынденам да нунылан каласенам: «Йошкар аракам йӱза».
6 Но нуно вашештеныт: «Ме йошкар аракам огына йӱ, вет Ионадав кугезе кочана, Рехав эрге, мыланна кӱштен коден: ”Йошкар аракам нигунам ида йӱ – теат, тендан йочада-влакат.7 Пӧртым ида чоҥо, пырчым ида ӱдӧ, виноград аҥам ида шынде – тек чыла тиде тендан огеш лий. Ӱмырда мучко омашыште илыза – тунам те ӧрдыжъеҥ семын илаш толмо мландыште кужун илаш тӱҥалыда”.8 Мом Ионадав кугезына, Рехав эрге, мыланна кӱштен коден, ме чылажымат шуктен шогена. Ме шкеже, ватына, эрге-ӱдырна-влак йошкар аракам огына йӱ,9 илашна пӧртым огына чоҥо, тыгак виноград аҥанат, пасунат, пырчынат уке.10 Ме омашыште илена да мом мыланна Ионадав кугезына кӱштен коден – чылажымат шуктен шогена.11 А кунам Вавилон кугыжа Навуходоносор тиде мланде ӱмбак сар дене толын, ме каласышна: ”Айста халдей ден арамей-влакын сарзывийышт деч Иерусалимыш каена”. Теве ынде ме Иерусалимыште илена».
12 Иеремийлан Господь деч шомак лийын:13 «Тыге ойла Господь Саваоф, Израильын Юмыжо: кай да Иуда эрге ден Иерусалимыште илыше-влаклан каласе: ”Тидын дене Мый тыланда мом ойлынем, огыда умыло мо, шомакем огыда кол мо? – ойла Господь. –14 Ионадавын, Рехав эргын, шомакшым шуктен шогат. Тудо шке эргыж-шамычлан йошкар аракам йӱаш огыл манын кӱштен коден, да нунышт кугезе кочаштын кӱштымашыжым колыштыт, таче мартеат йошкар аракам огыт йӱ. Мый тыланда угыч да угыч ойленам, а те Мыйым колыштын огыдал!15 Мыняр гана Мый тендан дек пророк тарзем-влакым колтенам! Нуно тыланда ойленыт: ’Кажныже осал корныда гыч кораҥза, илышдам вашталтыза! Вес юмо-влак почеш ида кошт, нунылан ида кумал! Тунам те тыланда да ача-кочаланда пуымо мландыште илаш тӱҥалыда’. Но те пылышдам савырен огыдал, Мыйым колыштын огыдал”.16 Ионадавын, Рехав эргын, тукымжо шке кугезе кочажын сугыньлен кодымо кӱштымашыжым шуктен шога, а тиде калык Мыйым ок колышт!17 Сандене Господь Юмо Саваоф, Израильын Юмыжо, тыге ойла: Иуда ӱмбаке, Иерусалимыште илыше-влак ӱмбаке Мый ончычак каласыме чыла туткарым колтем. Вет Мый нунылан ойленам, но нуно колыштын огытыл, ӱжынам – вашештен огытыл».
18 А Рехав тукымлан Иеремий каласен: «Тыге ойла Господь Саваоф, Израильын Юмыжо: Ионадав кугезе кочадан кӱштымашыжым те колыштында, тудын чыла каласымыжым шуктен шогенда.19 Садлан Господь Саваоф, Израильын Юмыжо, тыге ойла: Рехав эрге Ионадавын тукымжо гыч еҥ эре Мыйын чурием ончылно шогаш тӱҥалеш».
Глава 35