Выбрать язык
Книги Ветхого Завета
Книги Нового Завета
с русским текстом1 Кунам Вавилон кугыжа Навуходоносор, тудын сарзывийже, кид йымалныже улшо пӱтынь мландын чыла кугыжаныш ден калыкше Иерусалим да йырже улшо ола-влак ваштареш кредалыныт, Иеремийлан Господь деч шомак лийын:2 «Тыге ойла Господь, Израильын Юмыжо: кай да Иуда кугыжа Седекийлан каласе: ”Тыге ойла Господь: Мый тиде олам Вавилон кугыжа кидыш пуэм, да тудо олам йӱлалта.3 Тыят тудын деч от утло, тыйым кучат да тудын кидыш пуат. Вавилон кугыжам шке шинчат дене ужат, тудо тый денет шинчаваш кутыраш тӱҥалеш. Тыйым Вавилоныш наҥгаят”.4 Но колышт, Иуда кугыжа Седекий, Господьын шомакшым. Тыйын шотышто Господь тыге ойла: ”Тый керде деч от коло,5 тыныс дене кает. Кузе ача-кочат-влакым, тый дечет ончычсо кугыжа-влакым, тойымо годым тамлыпушым йӱлалтеныт, тугак тыйым тойымо годымат тамлыпушым йӱлалтат да тыге ойлен шортыт: ’Ох, озана!’ Тидым Мый Шке сӧрем”, – ойла Господь».
6 Пророк Иеремий чыла тиде шомакым Иуда кугыжа Седекийлан Иерусалимыште увертарен.7 Тиде жапыште Вавилон кугыжан сарзыже-шамыч Иерусалим да Иудан утаралт кодшо кок олаже – Лахис да Азека – ваштареш кредалыныт. Иудан чыла олаж гыч тиде чоткыдемдыме ола-влак гына кодыныт улмаш.8 Седекий кугыжан Иерусалимысе калык дене кул-влаклан эрыкым пуымо шотышто ойпидышым ыштымыж деч вара Иеремийлан Господь деч шомак лийын.9 Ойпидыш почеш кажныже еврей пӧръеҥ да ӱдырамаш кулжым эрыкыш колтышаш – нигӧ шке иудей иза-шольыжым куллыкышто кучышаш огыл улмаш.10 Чыла он ден уло калык тидын дене келшеныт да шке пӧръеҥ ден ӱдырамаш кулыштым тетла кучен огытыл, нуным эрыкыш колтеныт. Кутырен келшыме семынак, нуно кулыштым ончыч колтеныт,11 но вара шонымашыштым вашталтеныт: эрыкыш колтымо-влакым пӧртылтеныт да угыч шке кулышкышт савыреныт.
12 Тунам Иеремийлан Господь деч шомак лийын:13 «Тыге ойла Господь, Израильын Юмыжо: кугезе кочадам Египет гыч, кул лийме вер гыч, лукмо годым Мый нунын дене ойпидышым ыштенам. Мый каласенам:14 ”Тыланда шкеныштым ужалыше еврей иза-шольыдам шымше ийын эрыкыш колтыза. Тек тудо тыланда куд ий пашам ышта, а вара эрыкыш колтыза”. Но кугезе кочада-влак Мыйым колыштын огытыл, пылышыштым савырен огытыл.15 Шукерте огыл те, ӧкынен, Мыйын шинча ончылнем чын пашам ыштышда: шке лишылъеҥда-влаклан эрыкым пуышда. Те Мыйын лӱмем дене лӱмдымӧ пӧртыштӧ Мыйын ончылнем ойпидышым ыштышда.16 Но кызыт, шонымашдам вашталтен, Мыйын лӱмем шӱктарышда: эрыкыш колтымо пӧръеҥ ден ӱдырамаш кулдам пӧртылтышда да угыч шке кулдам ыштышда. Нунышт кушко шоненыт, тушко каеныт ыле.17 Сандене Господь тыге ойла: те Мыйым колыштын огыдал, еврей иза-шольо ден лишылъеҥда-влаклан эрыкым пуэн огыдал. Тидлан Мый ынде тыланда керде, шучко чер да шужымаш деч колаш эрыкым пуэм, – ойла Господь. – Мландымбалысе чыла кугыжанышлан Мый тендам шучкылыкым ыштем.18 Нине еҥ-влак дене, кӧмыт Мыйын ончылнем ыштыме ойпидышым пудыртеныт да тудым шуктен огытыл, Мый нунын пелыгыч руалме да кок ужаш кокла гыч эртен кайыме ӱшкыжышт дене ыштыме семынак ыштем.*а19 Нуным – Иуда ден Иерусалимын онжо-влакым, евнух ден иерейже-шамычым, элын уло калыкшым – кӧмыт ӱшкыжын руалме кок ужашыже кокла гыч эртен каеныт,20 Мый тушман кидыш, чоныштым кычалше кидыш пуэм. Нунын колышо капышт кайык ден янлыклан кочкыш лийыт.21 Иуда кугыжа Седекийым да тудын онжо-влакым Мый чоныштым кычалше тушман кидыш, кызыт тендан деч кораҥ кайыше Вавилон кугыжан сарзыже-влак кидыш пуэм.22 Мый кӱштымашым пуэм, – ойла Господь, – да тушман-шамыч тиде олаш мӧҥгеш пӧртылыт. Нуно кредалаш пижыт, олам сеҥен налыт да тул дене йӱлалтат. Иуда мландысе ола-влакым Мый ир мландыш савырем, илыше-шамыч тушто огыт лий».
*а 34:18 Юмо дене ойпидышым ыштыме годым тыгай ритуалым шуктеныт улмаш. Ончо: Тӱҥ 15 глава.
Глава 34