Выбрать язык
Книги Ветхого Завета
Книги Нового Завета
с русским текстом1 Господь мылам тыгай кончымашым ончыктен: теве Господьын храмже ончылан смоква саска дене темыме кок комдым шынденыт. Тидыже Вавилон кугыжа Навуходоносорын Иерусалим гыч Иуда кугыжа Иехонийым, Иоаким эргым, Иуда мландын онжо-влакым, плотник ден апшат-шамычым Вавилоныш наҥгайымыж деч вара лийын.2 Ик комдышто эн ончыч погымо чапле смоква лийын, а вес комдыштыжо – пеш уда, кочкашат йӧрдымӧ саска.3 Господь мый дечем йодын: «Мом тый ужат, Иеремий?» Мый вашештенам: «Смоквам. Сай саска-влак пеш сай улыт, а уда-влак тынар чот уда, нуным эсогыл кочкашат ок лий».
4 Тунам мыланем Господьын шомакше лийын:5 «Тыге ойла Господь, Израильын Юмыжо: Иуда мланде гыч поктен наҥгайыме еҥ-влакымат Мый нине сай смоква саска семын сайлан шотлем, нуным Мый тышечын халдей-влакын мландышкышт колтенам.6 Мый нунын ӱмбак порын ончалам да тиде мландыш пӧртылтем. Мый нуным ом шалате, а чоҥен пеҥгыдемдем, ом кукло, а угыч шындем!7 Мыйым палышт, Мыйын Господь улмем умылышт манын, Мый нунын шӱмыштым уэмдем. Нуно Мыйын калыкем, а Мый Юмышт лиям, вет нуно Мый декем уло шӱм-чонышт дене савырнат.
8 А уда смоква-влак нерген, кудышт кочкашат огыт йӧрӧ, Господь тыге ойла: Иуда кугыжа Седекийым, тудын онжо-влакым да Иерусалимын утаралт кодшыжо-влакым, кӧмыт тиде мландыштак илаш кодыныт, тыгак Египетыште илыше-влакым Мый нине саска гайым ыштем.9 Мый тыге ыштем: мландымбалысе чыла кугыжанышлан нуно шучко, йырнык лийыт. Чыла вере, кушко Мый нуным поктен колтем, нуным игылташ да койдараш, воштылаш да каргаш тӱҥалыт.10 Мый нунын ӱмбак кердым, шужымашым да шучко черым колтем: нунылан да ача-кочаштлан пуымо мландем гыч нуно пытарыме лийыт».
Глава 24