Выбрать язык
Книги Ветхого Завета
Книги Нового Завета
с русским текстом1 «Ойго кӱтӱчӧ-влаклан, кӧмыт Мыйын кӱтӱэмын шорыкшо-влакым пытарат, нуным шалатен колтат!» – ойла Господь.2 Сандене Господь, Израильын Юмыжо, Тудын калыкшым кӱтышӧ кӱтӱчӧ-влаклан тыге ойла: «Те шорыкем-влакым шалатенда да поктен колтенда, нуным ончен огыдал. Осал пашаланда ынде Мый тендам мут кучаш шогалтем, – ойла Господь. –3 Кӱтӱэм гыч утаралт кодшо-влакым Мый поктен колтымо чыла эл гыч погем да шке кӱтымӧ верышкышт пӧртылтем – нуно тӱлаҥаш да шукемаш тӱҥалыт.4 Нунылан Мый кӱтӱчӧ-влакым пуэм, кудышт нуным кӱташ тӱҥалыт. Шорыкем-влак тетла огыт лӱд, огыт ӧрткӧ да огыт йом, – ойла Господь. –
5 Тыгай кече-влак толыт, – ойла Господь, –
кунам Мый Давид тукым гыч чын ыштыше Игым нӧлталам.
Тудо шот дене вуйлатыше Кугыжа лиеш,
мландымбалне чын суд ден чын пашам ышта.
6 Тудын кечылаштыже Иуда утаралтеш,
Израиль тыныслын илаш тӱҥалеш.
Теве Тудын лӱмжӧ, тыге Тудым лӱмдат:
”Господь – мемнам чыныш лукшына!”
7 Сандене тыгай кече-влак толыт, – ойла Господь, – кунам тетла огыт каласе: ”Израиль эрге-влакым Египет мланде гыч лукшо Господь дене товатлем”,8 но маныт: ”Израиль тукымым йӱдвел мланде гыч да поктен колтымо чыла мландыж гыч лукшо да кондышо Господь дене товатлем”. Тунам нуно шке мландыштышт илаш тӱҥалыт».
9 Пророк-влак нерген.
Шӱмем кӱрышталтеш, чыла луэм чытыра!
Улам мый йӱшӧ айдеме гай,
кӧм йошкар арака сеҥен.
Чыла тиде – Господьлан кӧра
да Тудын святой шомакше-влаклан кӧра.
10 Яжар-влак дене мланде темын,
каргыме улмыжлан кӧра тудо тӱлыжга,
ир мландыште улшо кӱтымӧ вер-влак кошкеныт.
Осал корно дене нуно каят,
кучемвийыштым чын огыл кучылтыт.
11 «Пророк ден иерей-влакат Юмым огыт шотло.
Осал пашаштым Мый эсогыл шке пӧртыштем ужам! –
ойла Господь. –
12 Садлан нунын корнышт пычкемыш, яклака лиеш:
нуным шӱкалмеке, нуно тушанак камвозыт.
Мут кучыктымо ийын Мый ӱмбакышт
кугу туткарым колтем, – ойла Господь. –
13 Самарийысе пророк-влакын ушдымылыкыштым Мый ужынам:
Ваалын лӱмжӧ дене нуно пророклен ойленыт,
Мыйын Израиль калыкем чын корно гыч кораҥденыт.
14 Но Иерусалимысе пророк-влакын пашашт эше шучкырак:
яжарланат, шоякым ыштен илат,
нигӧ осал пашаж деч ынже кораҥ манын,
осалым ыштыше-влакым кумылаҥден шогат.
Нуно чыланат Мылам Содом гай лийыныт,
тушто илыше-шамыч Гоморра гай улыт».*а
15 Сандене пророк-влак шотышто Господь Саваоф тыге ойла:
«Нунылан арымшудым пукшем, аяр вӱдым йӱктем,
вет Иерусалимысе пророк-влакын осалышт
мланде мучко шарлен!»
16 Тыге ойла Господь Саваоф:
«Тыланда ойлышо пророк-влакым ида колышт,
нуно тендам ондалат!
Нуно Мыйын шомакем огыл,
а шке шонен лукмыштым ойлат.
17 Мыйым шотлыдымо-влаклан нуно чарныде ойлат:
”Господь каласен: тендан дене тыныс лиеш”.
Ӱскырт шӱмыштын ӱжмыж почеш илыше-влаклан ойлат:
”Ойго тендан деке ок тол”».
18 Но кӧ нунын кокла гыч Юмын каҥашыштыже лийын,
кӧ ужын да Тудын шомакшым колын?
Кӧ тӱткын колыштын да колын?
19 Теве Господьын тӱтанже кугу шыде дене толеш,
озыркан мардеж нӧлталтеш,
осал еҥ-влакын вуйышт ӱмбалне пӧрдеш.
20 Мо шӱмыштыжӧ уло, тудым шуктымешке,
Господьын кугу шыдыже кораҥын огеш кае.
Пытартыш кечылаште тидым раш умыледа.
21 «Нине пророк-влакым Мый колтен омыл,
нуно шкеак куржын толыныт.
Мый нунылан нимом увертарен омыл,
а нуно пророклен ойленыт.
22 Мыйын каҥашыштем лийыт ыле гын,
калыкемлан Мыйын шомакем увертарат
да нуным осал корно ден осал пашашт деч кораҥдат ыле.
23 Мый лишне веле Юмо улам мо? – ойла Господь. –
А тораштыже Юмо омыл мо?
24 Кертеш мо айдеме шолып верыш шылын шинчын,
куштыжо Мый тудым ом уж ыле? – манеш Господь. –
Мый чыла вере омыл мо – каваштат, мландыштат? – ойла Господь.
25 Мый колынам, мом нине пророк-влак Мыйын лӱмем дене шояклен увертарат. Нуно ойлат: ”Омым ужынам! Мый омым ужынам!”26 Мыняр эше тиде шуйна? Ондалчыкым увертарыше, шонен лукмо шояштым ойлышо нине пророк-влак мом тӧчат?27 Ала-кунам нунын ача-кочашт Вааллан кӧра Мыйын лӱмем монденыт. Нинат кызыт, икте-весыштлан омым каласкален, калыкемлан Мыйын лӱмем мондыктынешт.28 Омым ужшо пророк тек тудым омо семын каласкала, а пророк, кӧлан Мыйын шомакем лийын, тек Мыйын шомакем чын увертара. Арва ден пырче коклаште могай икгайлык уло? – ойла Господь. –29 Мыйын шомакем тул гай огыл мо, – ойла Господь, – кӱ курыкым шалатыше кугу чӧгыт гай огыл мо?
30 Сандене Мый икте-весышт деч Мыйын шомакем шолыштшо пророк-влак ӱмбаке каем, – ойла Господь. –31 Нине пророк-влак ваштареш каем Мый, – ойла Господь, – йылмышт дене нуно куктыштыт, вара ойлат: ”Тидым Тудо каласен”.32 Шояк омыштым пророк шомак семын увертарыше-влак ваштареш каем, – ойла Господь. – Омыштым нуно каласкалат да, ондалчык шомакышт дене алгаштарен, Мыйын калыкем чын корно гыч кораҥдат. Мый нуным колтен омыл, тидым ышташ кӱштен омыл. Тиде калыклан нуно нимогай пайдам огыт кондо, – ойла Господь.
33 Кунам тиде калык, пророк але иерей тый дечет йодыт: ”Могай пророк шомакым Господь неле нумалтыш семын ӱмбакет пыштен?”,*б нунылан каласе: ”Те мыланем неле нумалтыш улыда. Тыге ойла Господь: Мый тендам коден каем”.34 Пророк, иерей але калык кокла гыч иктаж-кӧ ”Господь деч неле нумалтыш” манын каласа гын, Мый тиде айдемым да тудын ешыжым наказатлем.35 Тыге йодса икте-весыда деч, иза – шке шольыж деч: ”Мом вашештен Господь?” але ”Мом каласен Господь?”36 А ”Господь деч неле нумалтыш” манын ончыкшым ида ойло, вет шкендан шомакда тыланда неле нумалтышыш савырна – те илыше Юмын, Господь Саваофын, мемнан Юмынан шомакшым вес семын савыреда.37 Пророклан тыге ойлыза: ”Мом тылат Господь вашештен?” але ”Мом Господь каласен?”38 Но те ”Господь деч неле нумалтыш” манын эше ойлаш тӱҥалыда гын, Господь тыге ойла: ”Господь деч неле нумалтыш” манын ойлымыланда – кеч Мый тыланда тыге ида ойло манын кӱштенам, –39 Мый тендам йӧршешлан мондем. Тендам да тиде олам, кудым Мый тыланда да ача-кочаланда пуэнам, Шке дечем кораҥдем.40 Тендам Мый курымаш намыс да мыскылымаш дене леведам, кудышт нигунам огыт мондалт».
*а 23:14 Ончо: Тӱҥ 18-19 гл.
*б 23:33 Тыште кучылтмо еврей йылмысе «масса» шомакым ’неле нумалтыш’ да ’пророк шомак’ семынат кусараш лиеш.
Глава 23