Выбрать язык
Книги Ветхого Завета
Книги Нового Завета
с русским текстом1 Кунам иерей Пашхур, Иммер эрге, Господьын пӧртшын тӱҥ эскерызыже, Иеремийын ты пророк шомакшым колын,2 тудо пророк Иеремийым кырен да Господьын пӧртшӧ воктене Вениаминын кӱшыл капкаж пелен лийше калыпыш шынден.3 Вес кечын, кунам Пашхур Иеремийым калып гыч луктын, Иеремий тудлан каласен: «Господь тыйым ынде Пашхур огыл, а Магор-Миссавив*а манын лӱмда!4 Вет Господь тыге ойла: Мый тыйым шкаланетат, йолташет-влакланат шучкылыкым ыштем. Нунышт тушман керде деч пытат, тидым тый шке шинчат дене ужат. Пӱтынь Иуда калыкым Мый Вавилон кугыжа кидыш пуэм, тудо нуным Вавилоныш наҥгая да керде дене пуштеш.5 Тиде олан уло погыжым, тушто чыла мо улым, чыла шергаканым, Иуда кугыжа-влакын поянлыкыштым Мый тушман кидыш пуэм. Нуно агат, чыла поген налыт да Вавилоныш наҥгаят.6 Тыйымат, Пашхур, да пӧртыштет илыше-влакым пленыш наҥгаят. Тый Вавилоныш кает да тушан колет. Тый да йолташет-влак, кӧлан шоя пророк шомакым ойленат, тушто тойымо лийыда».
7 Господь, Тый мыйым шке вапшышкет ондален кученат,
да мый тушко логалынам.
Тый виянрак улат, садлан мыйым сеҥенат.
Кече мучко мыйым воштылыт,
кажныже мыйым мыскыла.
8 Умшам почам веле – кычкырем,
пытарымаш ден пызырымаш нерген увертарем.
Господьын шомакше мылам
кажне кечын игылтмашым, воштылмашым конда.
9 Шоналтышым мый:
«Ом тӱҥал Тудын нерген шонаш,
Тудын лӱмжӧ дене тетла ойлаш».
Но Тудын шомакше шӱмыштем тул семын йӱлен,
пуйто мыйын кӧргыштем петырыме лийын.
Ынже лек манын, тудым уло вием дене кучаш тӧченам,
но кертын омыл.
10 Колынам мый шукыштын кутырымыштым:
«Йырым-ваш шучкылык!
Вуйым шийза тудын ӱмбак! Айста чогена!»
Кӧ дене келшен иленам,
нуно мыйын шӱртньымем вучат:
«Ала тудо оптышыш логалеш,
тунам ме тудым сеҥена да ӱчым шуктена!»
11 Но мыйын пеленем Господь, пуйто патыр сарзе!
Садлан поктылшем-влак шӱртнят, сеҥен огыт керт,
ушдымо улмыштлан кӧра намысыш пурат.
Нигунам ок мондалт нунын мыскылалтмышт!
12 Господь Саваоф, Тый чын ыштыше еҥым тергет,
ужат шӱмем да уло кӧргемым.
Ончыкто мылам, кузе Тый нунылан ӱчым шуктет,
вет Тылат мый шке пашам ӱшанен пуэнам.
13 Господьлан мурыза, Господьым моктыза,
вет Тудо пызырналтше еҥым
осал айдемын кидше деч утара!
14 Каргыме лийже тудо кече, кунам мый шочынам!
Суапландарыме ынже лий тудо кече,
кунам мыйым авам шочыктен!
15 Каргыме лийже тудо айдеме,
кӧ ачамлан «Эргыч шочын!» манме уверым конден
да тидын дене тудым куандарен.
16 Господьын шалатыме, чаманыде пытарыме
ола-влак дене мо лийын,
тек тиде еҥ денат тидак лиеш.
Тек тудо эрдене шортмо йӱкым колеш,
а кечывалым – кычкырыме йӱкым.
17 Вет тудо мыйым ава мӱшкырыштӧ пуштын огыл –
лийын огыл мылам авамже шӱгар,
авагудыжо – курымеш мӱшкыран.
18 Молан мый ава мӱшкыр гыч лектынам?
Нелылык ден орлыкым ужаш,
илышем вожылмаш дене мучашлаш?
*а 20:3 «Магор-Миссавив» лӱм ’йырым йыр – шучкылык’ манмым ончыкта.
Глава 20