Выбрать язык
Книги Ветхого Завета
Книги Нового Завета
с русским текстом1 Господь тыге каласен: «Кай да кӧршӧк ыштыше деч шун кувшиным нал. Пеленет калык ден иерей-влакын икмыняр кугуракыштым налын,2 Харшиф капка воктенысе Енном лапверыш лек да тушто Мыйын каласыме шомакем увертаре.3 Каласе: ”Иудан кугыжаже-влак, Иерусалимыште илыше-шамыч, Господьын шомакшым колыштса! Тыге ойла Господь Саваоф, Израильын Юмыжо: Мый тиде верыш ойгым колтем – кӧ тидын нерген колеш, тудын кок пылышыштыжат йоҥгалт кая!4 Вет калыкем Мыйым коден, тиде верым Мылам палыдымыш савырен – тушто нуно вес юмо-влаклан тӱтырат, кудыштым шкештат, ача-кочаштат, Иуда кугыжа-влакат пален огытыл. Тиде верым нуно титакдыме вӱр дене теменыт,5 эргыштым Вааллан йӱлалтен пуымо надыр шотеш кондаш манын, Вааллан кумалме верлам ыштеныт. Тидым ышташ Мый кӱштенат, ойленат омыл, тыгае ушышкемат возын огыл.6 Сандене тыгай жап шуэш, – ойла Господь, – кунам тиде верым тетла Тофет але Енном лапвер огыл, а Шӱшкылмӧ лапвер манын лӱмдаш тӱҥалыт.7 Тиде верыште Мый Иуда ден Иерусалимын чыла шонен пыштымыштым шалатем. Мый нуным тушманын кердыж дене пытарем, да нуно пушташ кычалше-влакын кидышт деч пытат. Колышо капыштым кайык ден янлыклан кочкаш пуэм.8 Тиде олам Мый шучкылыкыш, воштылчыкыш савырем. Кӧ воктечше эртен кая, кажныже лӱдеш, сусырлажым ужын, ӧрын шӱшкалта.9 Тиде олаште илыше-влаклан Мый эрге ден ӱдырыштын шылыштым пукшем. Кунам чоныштым кычалше тушман-влак нуным авырен налыт, нуно, орлыкыш логалмеке, лишылъеҥыштым кочкаш тӱҥалыт”.
10 Пеленет толшо-влакын шинча ончылнышт кувшиным шалате11 да нунылан каласе: ”Тыге ойла Господь Саваоф: кузе кӧршӧк ыштышын атыжым шалатыме да тудым угыч погаш ок лий, тугак Мыят тиде калык ден олам кырен шалатем. Моло вере тойымо вер ситыдымылан кӧра колышо-влакым варажым Тофетыште тояш тӱҥалыт.12 Теве мом Мый тиде вер да тушто илыше-влак дене ыштем, – ойла Господь. – Тиде олам Мый Тофет гайым ыштем.13 Иерусалимысе пӧрт ден Иуда кугыжа-влакын полатышт Тофет гай шакше лийыт, вет кажне пӧрт леведыш ӱмбалне кавасе шӱдыр-влаклан тӱтырат, йот юмо-шамычлан йошкар арака надырым кондат”».
14 Иеремий, Тофет гыч толмекше – тушкыжо тудым Господь пророклен ойлаш колтен, – Господьын пӧртшын кудывечешыже шогалын да уло калыклан каласен:15 «Тыге ойла Господь Саваоф, Израильын Юмыжо: Мый тиде ола да воктеныже улшо изирак ола-влак ӱмбаке туткарым колтем. Мый тидым ышташ сӧренам, вет нуно чыланат ӱскырт улыт, Мыйын шомакем огыт колышт!»
Глава 19