Выбрать язык
Книги Ветхого Завета
Книги Нового Завета
с русским текстом1 Иеремийлан Господь деч тыгай шомак лийын:2 «Колыштса тиде ойпидышын шомакшым да Иуда калык ден Иерусалимыште илыше-влаклан увертарыза!3 Каласе нунылан: тыге ойла Господь, Израильын Юмыжо: ”Кӧ тиде ойпидышын шомакшым ок колышт, тудо каргыме лиеш.4 Тудым Мый кугезыда-влаклан нуным Египет мланде гыч, кӱртньым левыктыше коҥга гыч, лукмем годым пуэнам. Мый нунылан каласенам: ”Мыйым колыштса да чыла кӱштымем шуктыза, тунам те Мыйын калыкем, а Мый тендан Юмыда лиям,5 да Мый кугезыда-влаклан пуымо товатмутым шуктем. Нунылан Мый шӧр да мӱй йогыман мландым пуаш сӧренам, тидыже кызыт шукталтын”». Мый вашештенам: «Аминь, Господь!»6 Господь мылам каласен: «Чыла тиде шомакым Иудан олалаштыже да Иерусалимын уремлаштыже увертаре. Каласе: ”Колыштса тиде ойпидышын шомакше-влакым да нуным шуктыза.7 Кугезыда-влакым Египет гыч лукмо кече гыч тачысе кече марте Мый эре шижтарен шогенам, нунылан ойленам: ’Мыйын йӱкем колыштса!’8 Но нуно колыштын огытыл, пылышыштым савырен огытыл, кажныже осал да ӱскырт шӱмжын ӱжмыж почеш коштын. Сандене Мый нунын ӱмбак тиде ойпидышысе каргымаш-влакым колтенам. Мый нунылан тиде ойпидышым шукташ кӱштенам, а нуно тудым шуктен огытыл”».
9 Вара Господь мылам каласен: «Иуда калык ден Иерусалимыште илыше-влак коклаште заговор шочын.10 Нуно кугезе кочашт-влакын сулыкыштым ышташ тӱҥалыныт. Нунышт Мыйын шомакем колышташ келшен огытыл да вес юмо-влак почеш каеныт, нунылан служитленыт. Израиль тукымат, Иуда тукымат кугезе кочашт дене ыштыме Мыйын ойпидышем пудыртеныт».11 Садлан Господь тыге ойла: «Мый нунын ӱмбак кугу туткарым колтем, тудын деч нуно утлен огыт керт. Нуно Мыйым полшаш йодын сӧрвалат, но Мый нуным ом кол.12 Тунам Иерусалимыште да Иудан моло олаштыже илыше-влак тӱтырен кумалме юмышт деч полышым йодыт, но нине юмо-влак орлыкан жапыште нимынярат огыт полшо.13 Иуда, мыняр тыйын олат, тынар юмет уло! Мыняр Иерусалимыште уремет, тынар те йырнык Вааллан тӱтыраш жертвенникым ыштенда!
14 А тый тиде калык верч ит йод, нунын верч ит кумал, ит сӧрвале! Кунам нуно Мый дечем туткар жапыште полышым йодын кумалыт, Мый нуным ом кол.
15 Йӧратыме калыкем, молан тылат Мыйын пӧртыштем лияш?
Тый тушто шуко осал пашам ыштет.
Кертеш мо надыр шыл титакетым кораҥден,
кунам тый осал пашатлан куанет?
16 Господь тылат лӱмым пуэн:
”Чапле саскан ладыра олив пушеҥге”.
Но кызыт тале кӱдырчын кӱдыртымыж дене
Господь тудын ӱмбак тулым колта,
да тудын укшыжо-влак пытат.
17 Тыйым шындыше Господь Саваоф
тылат туткарым колташ шонымыжым увертарен,
вет Израиль ден Иудан калыкше осалым ыштеныт,
Вааллан тӱтырымышт дене Мыйын шыдем луктыныт».
18 Тидын нерген палаш манын, Господь мылам тидым почын. Нунын мом ыштымыштым Тудо мылам ончыктен.19 А мый шӱшкылаш наҥгайыме ӱҥышӧ пача гай лийынам, мый денем мом ышташ шонымыштым пален омыл. Нуно ойленыт:
«Пушеҥгым саскаж дене пырля пытарена,
илыше-влакын мландышт гыч куклен шуэна,
тек тудын лӱмжымат огыт шарналте!»
20 Но Тый, Господь Саваоф,
улат чынле Судья,
айдеме шӱм-чоным тергыше!
Ончыкто мылам, кузе Тый нунылан ӱчым шуктет,
вет шке пашам мый Тылат ӱшанен пуэнам.
21 Сандене Анафофышто илыше-влак нерген Господь тыге ойла: «Нуно тыйын чонетым кычалыт да тыге маныт: ”Господьын лӱмжӧ дене пророклен ит ойло, уке гын ме тыйым пуштына!”»22 Господь Саваоф тыге ойла: «Мый нуным наказатлем: самырык пӧръеҥышт керде деч пытат, эрге ден ӱдырышт шужен колат.23 Нигӧ нунын кокла гыч илыше ок код: мут кучыктымо ийын Мый Анафофышто илыше-влак ӱмбак ойгым кондем».
Глава 11