Выбрать язык
Книги Ветхого Завета
Книги Нового Завета
с русским текстом1 Иеремийлан Господь деч тыгай шомак лийын:2 «Господьын пӧртшын капкаж воктеке кае да тушто нине шомакым каласе: ”Иудан уло калыкше, Господьын шомакшым колыштса! Колыштса чыланат, кӧ, Господьлан кумалаш манын, тиде капка гоч пура!”3 Господь Саваоф, Израильын Юмыжо, тыге ойла: ”Илыш корныдам вашталтыза, сайым ыштен илыза, тунам Мый тендам тиде верыште илаш кодем.4 Ида ӱшане шояче-влаклан, кӧмыт тыланда эре ойлат: ’Тыште Господьын храмже, Господьын храмже, Господьын храмже!’5 Те чынжымак илыш корныдам вашталтеда, сайым ышташ тӱҥалыда да икте-весыда дек чынле лийыда гын,6 йот тукым еҥым, тулык йоча ден тулык ватым шыгыремдылаш, тиде верыште титакдыме вӱрым йоктараш огыда тӱҥал да, шкаланда зияным ыштен, вес юмо-влак почеш огыда кай гын,7 тунам Мый тендам тиде верыште, тиде мландыште илаш кодем, вет тудым Мый ача-кочаланда курым-курымешлан пуэнам.8 Но те шоялан ӱшанеда, кудыж деч тыланда нимогай пайда ок лий.9 Те шолыштыда, пуштедеда да яжарланеда, шойыштын товатледа, Вааллан тӱтыреда, тыланда ондак палыдыме йот юмо-влаклан кумалыда,10 а вара толыда да Мыйын лӱмем дене лӱмдымӧ тиде пӧртыштӧ Мыйын чурий ончыкем шогалыда да, умбакшат чыла тиде йырныкым ыштен, ойледа: ’Ме утарыме улына’.11 Мыйын лӱмем дене лӱмдымӧ тиде пӧрт тендан шинча ончылно агыше-влакын пыжашышкышт савырнен огыл мо? Но Мый чыла тидым ужам, – ойла Господь. –12 Кайыза Силомыш, тудо верыш, кудым Мый ондак шке лӱмемлан илаш палемденам, да ончалза, Израиль калыкемын осал пашажлан кӧра мом Мый тудын дене ыштенам.13 Чыла тиде пашам те ыштен шогенда, – ойла Господь, – кеч Мый тыланда угыч да угыч ойленам, те колыштын огыдал, тендам ӱжынам, а те вашештен огыдал.14 Садлан Мыйын лӱмем дене лӱмдалтше тиде пӧрт денат, кудыжлан те инанен иледа, тыланда да ача-кочаланда пуымо тиде вер дене, Мый тудымак ыштем, мом Силом дене ыштенам.15 Тендам Мый шке чурий ончычем поктен колтем, тидымак Мый Ефрем тукым иза-шольыда дене ыштенам”.
16 А тый тиде калык верч ит йод, нунын верч ит кумал, ит шорт, Мыйым ит сӧрвале! Мый тыйым колышташ ом тӱҥал.17 От уж мо, мом нуно Иудан олалаштыже да Иерусалимын уремлаштыже ыштылыт?18 Йоча-влак пум погат, ача-влак тулым ылыжтат, а ӱдырамаш-шамыч, кавасе ӱдырамаш озалан*а когыльым ышташ манын, руашым лугат! Мыйын шыдем луктын, нуно йот юмо-влаклан йошкар арака надырым кондат.19 Но Мыйым мо нуно сырыктат? – ойла Господь. – Уке, шкеныштымак ойгандарат, шкештак вожылмашыш пурат!»20 Сандене Господь Юмо тыге ойла: «Тиде верыш, еҥ ден вольык, пушеҥге ден мланде саска ӱмбаке Мыйын кугу шыдем опталме лиеш! Тудо йӱлаш тӱҥалеш, ок йӧрӧ».
21 Тыге ойла Господь Саваоф, Израильын Юмыжо: «Ну мо, чыла тӱрлӧ надырда дене пырля йӱлалтен пуымо надырымат кондыза да шылжым кочса!22 Кунам Мый ача-кочада-влакым Египет гыч луктынам, нунылан йӱлалтен пуымо да моло надыр шотышто нимом ойлен омыл, нимогай кӱштымашым пуэн омыл.23 Мый нунылан лач иктым кӱштенам: ”Мыйын йӱкем колыштса, тунам Мый тендан Юмыда, а те Мыйын калыкем лийыда. Эре Мыйын кӱштымӧ корно дене коштса, тунам тендан дене чыла сай лиеш”.24 Но нуно колыштын огытыл, пылышыштым савырен огытыл, осал да вустык шӱмышт ӱжмӧ почеш шке шонымышт семын иленыт – Мый декем чурийышт дене огыл, а тупышт дене савырненыт.25 Кугезе кочада-влакын Египет гыч лекме кече гыч тачысе кече марте Мый тендан деке шке тарзем-влакым – пророк-шамычым – угыч да угыч колтенам.26 Но те Мыйым колыштын огыдал, пылышдам савырен огыдал, тугаяк ӱскырт лийында, ача-кочада деч уданрак ыштылында.
27 Кунам нунылан чыла тидым каласет, нуно тыйым огыт колышт, кунам нуным ӱжаш тӱҥалат, тылат огыт вашеште.28 Тунам нунылан каласе: ”Теве калык, кудо шке Господь Юмыжым ок колышт, туныктымым шотыш ок нал! Уке нунын дене чынлык, умшашт гыч тудо йомын!”29 Ӱпетым пӱч да луктын кудалте, курыклаште шортмо мурым муро, вет Господь шыдыжым лукшо тиде тукым деч кораҥын.30 Иуда эрге-влак шинча ончылнем осалым ыштат, – ойла Господь. – Мыйын лӱмем дене лӱмдымӧ пӧртым шакшылен, тушан шке йырнык юмышт-влакым шогалтеныт.31 Шке эрге ден ӱдырышт-влакым йӱлалташ манын, нуно Енном лапверысе Тофетыште кумалме верлам чоҥеныт. Тидым ышташ Мый кӱштен омыл, тыгае ушышкемат возын огыл.32 Садлан тыгай жап шуэш, – ойла Господь, – кунам тиде верым Тофет да Енном лапвер огыл, а Шӱшкылмӧ лапвер манын лӱмдат. Моло вере тойымо вер ситыдымылан кӧра колышо-влакым варажым Тофетыште тояш тӱҥалыт.33 Тиде калыкын колышо капше-влак кайык ден янлыклан кочкыш лийыт, нуным поктен колтышо нигӧ ок лий.34 Иудан олалаштыже, Иерусалимын уремлаштыже куанен кычкырымылан, йывыртен йӱкланымылан, каче ден оръеҥын йӱкыштлан Мый мучашым пыштем, вет тиде мланде пустаҥше кундемыш савырна.
*а 7:18 Кавасе ӱдырамаш оза – тыште, очыни, акрет Палестинысе ӱдырамаш юмо кокла гыч иктыже нерген ойлалтеш.
Глава 7