Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИЕРЕМИЙЫН КНИГАЖЕ
6 Глава
1 Иерусалимым авырен налыт. 9 Господь вуянче Израильым наказатла. 16 Юмын корныжым Израиль кӱлдымыш луктеш. 22 Иерусалим ӱмбак йӱдвел гыч керылтыт.1 Вениамин эрге-влак, Иерусалим гычын куржса!
Фекойышто пуч дене пуалтыза,
Бефкаремыште шижтарыше шикшым нӧлталза –
толеш йӱдвелым ойго, кугу пытарымаш!
2 Пытарем Мый Сион ӱдырым,
моторым да нечкым.
3 Кӱтӱчын шке кӱтӱж дене толмо семын
кугыжа-влак шке сарзывийышт дене толыт,
шындат тудын йыр омашыштым,
кажныже палемдыме шке верыштыже лиеш».
4 «Тудын дене кредалаш ямдылалтса!
Кынелза, кечывалым кредалаш лектына!
Ох, вашке кече шинчеш, кас ӱмылат шарлен!
5 Кынелза, йӱдым каена,
тудын полатше-влакым шалатена!»
6 Тыге Господь Саваоф ойла:
«Пушеҥге-влакым руыза
да Иерусалим ваштареш мланде кӱкшака-влакым нӧлталза:
тиде ола наказатлыме лийшаш –
тудо шыгыремдымаш дене темын.
7 Кузе памаш гычын вӱд лектын шога,
тугак тиде ола гыч осаллык лектеш.
Пытарыме да пызырыме йӱк тушеч шокта,
Мыйын чурий ончылнем – лач орлык ден сусыр.
8 Ушым шынде, Иерусалим!
Уке гын Мый тый декет тупынь савырнем,
тыйым ир мландыш, еҥ-влак илыдыме верыш савырем».
9 Тыге ойла Господь Саваоф:
«Кодшо виноградым йыклык погымо семын
Израильын утаралт кодшыжо-влакым пӱтынек пытарат.
Виноградым погышо еҥ семын
кидет дене укшла мучко эрте».
10 Мый ойлем да шижтарем лийже,
но кӧ мыйым колышташ тӱҥалеш?
Нуно пылышыштым петыреныт,
*а колын огыт керт.
Господьын шомакшым воштылыт,
нунылан тудо ок келше.
11 Сандене Господьын шыдыж дене темынам,
ом керт мый тудым кучен!
«Йоктаре тудым уремыште улшо йоча-влак,
погынышо самырык пӧръеҥ-шамыч ӱмбаке!
Кучымо лийыт марий ден вате,
илалше еҥ ден ӱмыржым илен эртарыше шоҥгыеҥ.
12 Весылан пуымо лийыт нунын пӧртышт,
тыгак пасушт да ватышт.
Вет ты мландыште илыше-влак ӱмбаке
Мый шке кидем нӧлталам, – ойла Господь. –
13 Нуно чыланат, изи гыч кугу марте,
осалым ыштен, лач шкаланышт пайдам кычалыт,
пророк гыч иерей марте чылан ондалкалат.
14 Нуно Мыйын калыкем айда-лийже эмлат,
”Тыныс, тыныс!” – ойлат, а тыныс уке.
15 Йырныкым ыштымышт деч нуно вожылыт мо?
Уке, нимынярат огыт вожыл, огыт йошкарге.
Садлан нуно вуйым пыштыше-влак дене пырля камвозыт,
мут кучыктымем годым сӱмырен кудалтыме лийыт», – ойла Господь.
16 Тыге ойла Господь:
«Шогалза корнывожыш да ончыштса,
акрет годсо корно-влак нерген йодыштса,
кушто поро корно, тудын дене кайыза,
тунам чонланда тынысым муыда.
Но нуно каласеныт: ”Огына кай!”
17 Мый тыланда орол-влакым пуэнам,
каласенам: ”Пуч йӱкым колыштса!”
Но те ойлышда: ”Огына колышт!”
18 Сандене колыштса, калык-влак,
погынышо-шамыч, палыза – мо нунын дене лиеш!
19 Колышт, мланде!
Тиде калыклан Мый ойгым,
осал шонымашыштын саскаштым, кондем.
Вет нуно Мыйын шомакем колыштын огытыл,
Мыйын законем кӱлдымыш луктыныт.
20 Молан Мыланем Сава гыч кондымо ладын,
тора мланде гыч кондымо тамлыпушан омыж?
Йӱлалтен пуымо надырда йӧрдымӧ улыт,
моло тӱрлӧ надырдат Мыланем огыт келше».
21 Сандене Господь тыге ойла:
«Тиде калыкын корныштыжо чаракым шогалтем,
тушан шӱртнят ача-влак эргышт дене,
пошкудо ден йолташышт –
шӱртнят нуно да пытат!»
22 Тыге ойла Господь:
«Йӱдвел мланде гыч калык толеш,
мланде тӱр гыч кугу калык нӧлталтеш!
23 Кидыштышт – пикшйоҥеж ден умдо.
Нуно торжа да чаманыдыме улыт,
теҥыз лӱшкымӧ семын йӱкышт шокта.
Кудал толыт имне дене, рат дене шогалыт,
тый денет, Сион ӱдыр, кредалаш ямде улыт!»
24 Нунын нерген уверым колмеке, кидна лушкыш,
мемнам орлык темдале,
азам ыштыме годсо гай корштымаш авалтыш.
25 Ида лек пасулашке да ида кошт корнылаште,
вет йырым-йыр – тушманын кердыже,
шучкылык чыла вере!
26 О, калыкем, чий чоштыра вургемым,
ломыжышто пӧрдал!
Ойгырен шорт, пуйто ик шкет эргыч колен,
кочо шинчавӱдым йоктаре,
вет кенета мемнан дек пытарыше толеш.
27 «Шке калыкем коклаште тыйым тергышылан шогалтенам,
нунын коклаште тыйым карманым ыштенам,
тый корныштым шымлышаш улат.
28 Нуно чылан ӱскырт, вуянче улыт,
икте-весышт ӱмбак лавырам кышкат.
Нуно пуйто той ден кӱртньӧ улыт,
осал пашам ышташ йӧратат.
29 Апшат пошым чот пошеныт,
шемвулным тул дене левыктеныт.
Но левыктыше арам левыктен:
осал ойыралтын огыл!
30 ”Йӧрдымыш лукмо ший” манын, нуным лӱмдат,
вет Господь нуным йӧрдымыш луктын».
*а 6:10 Еврей текстыште – ’пылышышт пӱчдымӧ’, тиде пӱчмӧ йӱла дене кылдалтын.
Глава 6
