Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
27 Глава
1 Господь кугу кишкым, левиафаным, пытара. 2 Юмын виноград аҥаж нерген у муро. 12 Шалатен колтымо Израиль эрге-влакын пӧртылмышт.1 Тудо кечын Господь шке кугу, чоткыдо
да чаманыдыме кердыж дене пытара левиафаным,
писын нушкын кайыше кишкым,
левиафаным, кугыргылшо кишкым,
теҥызысе кугу янлыкым Тудо пуштеш.
2 «Мурыза тудо кечын чапле виноград аҥа нерген!
3 Мый, Господь, тудым ончем, вӱдым эре шавем,
нигӧ ынже тӱкӧ манын, йӱдшӧ-кечыже оролем.
4 Уке Мыйын шыдем.
Но тудо Мыланем коршаҥге ден иман вондерым шочыкта гын,
Мый нунын ваштареш сар дене каем,
нуным чылаштым йӱлалтем!
5 Але нуно Мый декем тек аралтышым кычалын толыт
да Мый денем тыныс ойпидышым ыштат,
тек Мый денем тыныс ойпидышым ыштат!»
6 Ончыкылык кечылаште Иаков вожым колта,
Израиль лышташнерым луктеш да пеледеш,
уло тӱням саскаж дене тема!
7 Тугак мо Господь израильтян-влакым кырен,
кузе нуным кырыше-шамычым кырен?
Тугак мо пуштеден,
кузе нуным пуштедыше-влакым пуштеден?
8 Тый израильтян-влакым утыждене наказатлен отыл.
Нуным Тый шалатен колтенат,
эрвел мардеж гай виян шӱлалтышет дене пуал колтенат.
9 Теве мо дене Иаковын титакше кудалтыме лиеш,
сулык касарымым ончыктышо саскаже теве могай лиеш:
жертвенникысе кӱ-влакым нуно татырым шалатыме семын шалатат,
Ашера меҥге ден тӱтырымӧ жертвенник-влак огыт код.
10 Чоткыдемдыме ола пустаҥеш,
тусо калык илемже-влакым кода,
ола коден кайыме лиеш, ир мланде гайыш савырна.
Кошташ тӱҥалыт тушто презе-влак,
тушто кияш да укш-влакым кочкаш тӱҥалыт.
11 Укш-влак кошкымеке, нуным тодыштыт,
ӱдырамаш-влак толыт да нуным йӱлалтат.
Вет тиде калык шотдымо,
садлан Ыштышыже тудым ок серлаге, ок чамане.
12 Тудо кечын Господь Евфрат эҥер гыч Египет чекысе йогын марте шурным шияш тӱҥалеш, да те, Израиль эрге-влак, иктын-иктын погымо лийыда.13 Тудо кечын кугу пуч пуалта – тунам Ассирий мландеш йомшо да Египетыш поктен колтымо еҥ-влак толыт да Иерусалимысе святой курык ӱмбалне Господьлан вуйыштым сават.
Глава 27
