Выбрать язык
Книги Ветхого Завета
Книги Нового Завета
с русским текстом1 Господь мылам каласен: «Кугу кӱоҥам нал да тушан тыглай буква дене возен шынде: Магер-шелал-хаш-баз».*а2 Мый ӱшанле таныклыше-влакым – иерей Урий ден Захарийым, Варахий эргым – ӱжынам.
3 Вара мый пророк ватем дене малаш возынам, тудыжо мӱшкыраҥын да эргым ыштен. Господь мыланем каласен: «Тудлан Магер-шелал-хаш-баз лӱмым пу,4 вет тиде йочан ”ачай” ден ”авай” манын ойлаш тунеммыж деч ончыч Дамаск ден Самарийыште поген налме чыла поянлыкым Ассирий кугыжа дек наҥгаят».
5 Господь мылам умбакыже ойлен:
6 «Тиде калык Силоамын лыжган йогышо вӱдшым кӱлдымыш луктын
да Рецин ден Ремалий эргылан куанен ила,
7 садлан Господь тудын ӱмбак Евфрат эҥерын кугу да тале вӱдшым –
Ассирий кугыжам чыла вий-куатше дене – колта.
Эҥерын чыла вӱдкорныжо темеш,
серлаж гыч ташлен лектеш.
8 Кугу вӱд Иуда мланде мучко шарла,
шӱй даҥыт нӧлталтеш.
Тудын шаралтыме шулдыржо, Эммануил,
пӱтынь мландетым леведеш!»
9 Калык-влак, те кырен шалатыме лийыда – чытырыза!
Тора мланде-влак, тӱткын колыштса!
Ямдылалтса сарлан, но чытырыза,
ямдылалтса, но чытырыза!
10 Мом ыштышашым шонен пыштыза,
но тиде ок шукталт,
кутырен келшыза, но нимат ок лек,
вет мемнан дене Юмо!
11 Виян кидше дене мыйым кучен, Господь мый денем кутырен да тиде калыкын корныж дене коштмо деч мылам шекланаш кӱштен. Тудо каласен:
12 «Мом тиде калык заговорлан шотла,
чылажымак заговорлан ида шотло.
Мо деч тудо лӱдеш,
тидын деч ида лӱд, ида ӧрткӧ.
13 Лач Господь Саваофым святойлан шотлыза,
Тудын деч лӱдса, Тудын деч чытырыза!
14 Израильысе кок кугыжанышланат Тудо святитлыше лиеш.
Тудо шӱртньымӧ кӱ, алгаштаралтме кӱ,
Иерусалимыште илыше-влаклан шӧрга ден оптыш лиеш.
15 Шукышт нунын кокла гыч шӱртнят,
камвозыт да шаланат,
оптышыш логалыт, кучымо лийыт.
16 Пӱтырал да кылден шынде тиде таныклымашым,
печать дене петыре тиде туныктымашым –
тек тудо тунемшем-влак дене лиеш!»
17 Мый тӱҥалам вучаш Господьым,
кеч Тудо шке чурийжым Иаков тукым деч шылтен.
Господьлан мый инанен илем!
18 Теве мый да Господьын мылам пуымо икшыве-шамыч.
Сион курыкышто илыше Господь Саваоф деч
ме Израильлан колтымо палдарыше пале семын улына.
19 Кунам тыланда колышын чонжым ӱжын лукшо, юзыланыше але вудыматен шӱведыше деке каяш темлат, тыге вашештыза: «Шке Юмыж деч огыл мо калык йодшаш? Колышо-влак деч илыше-шамыч нерген йодыт мо?20 Туныктымаш ден таныклымаш деке савырныза». Кӧмыт тиде шомак дене келшышын огыт ойло, нунын дене волгыдо уке.
21 Нуно, индыралтше да шужышо,
мланде мучко перныл кошташ тӱҥалыт.
Шужымекышт, кугун шыдешкен,
шке кугыжаж ден Юмыштым каргаш тӱҥалыт.
22 Нуно кӱшкӧ, вара мландымбаке ончалыт –
ужыт лач ойгым, пычкемышым,
тӱп пычкемышыш нуно логалыт.
Но кушто кызыт тӱп пычкемыш, тушто эре тыге ок лий.
*а 8:1 Тиде лӱм ’поген налаш вашка, агаш содорлана’ манмым ончыкта.
Глава 8