Библия
Выбрать язык
Книги Ветхого Завета
Книги Нового Завета
с русским текстом
ЧЫЛА МУРЫЛАН МУРО
1 Глава
1 Ӱдыр йӧратымашыж нерген ойла. 8 Каче йӧратыме ӱдыржым мокта. 11 Ӱдыр ден каче икте-весыштлан ойлат.1 «Тек тудо мыйым шупшалеш, ӱмаж дене леведеш!
Тыйын йӧратымашет йошкар арака деч сайрак.
2 Шӱрымӧ ӱетше могай тамле пушан!
Лӱметше – велыме тамлыпушан ӱй гай,
садлан ӱдыр-влак тыйым йӧратат.
3 Наҥгай мыйым пеленет, айда куржына!
Кугыжам мыйым шке пӧлемлашкыже пуртыш.
Ме тый денет куанен йывырташ тӱҥалына,
вет йӧратымашет йошкар арака деч чаплырак –
арам огыл тыйым тынар йӧратат.
4 Иерусалимын ӱдыржӧ-влак,
улам мый шеме, но мотор,
Кедарысе омаш-влак да Соломонын пӱрдышыж гай.
5 Тыгай шеме улам манын ида ончо –
тиде мый кечеш кӱынам.
Иза-шольым-влак мылам шыдешкеныт
да виноград аҥам оролаш шогалтеныт,
сандене мый шке виноград аҥам оролен кертын омыл.
6 Каласе, йӧратымем, кушто кӱтӱм кӱтет,
кушто нунын дене кечывалым канет?
Молан мылам йолташет-влакын кӱтӱшт воктене,
чурием леведын, тыйым кычалын кошташ?»
7 «Ӱдырамаш-влак кокла гыч эн моторжо,
тый тидым от пале гын,
шорык-влакын кышашт почеш кае
да казапачат-шамычым кӱтӱчӧ-влакын омашышт воктене кӱтӧ».
8 «Йӧратымем, тый фараон орваш кычкыме вӱльӧ гай улат!
9 Сӧрастарыш йымалысе шӱргыначкат,
шерым сакыман шӱет моторын койыт!
10 Ыштена ме тылат шӧртньӧ сӧрастарышым,
ший чинчаным».
11 «Кунам мыйын кугыжам ӱстелтӧрыштӧ лийын,
капем нард
*а семын тамлыпушым луктын.
12 Мыйын йӧратымем – пуйто миррам
*б пыштыман калта,
оҥпогем коклаште тудыжо кия.
13 Мыйын йӧратымем –
пуйто Ен-Гедисе виноград аҥасе хна пеледыш аршаш».
14 «Могай мотор улат, йӧратымем, улат тый сылне,
а шинчатше кӧгӧрчен гай!»
15 «Могай мотор улат, шӱмбелем, улат тый сӧрал!
Мемнан кийыме верна – ужар шудо,
16 кедр-влак улыт пӧрт леведышна,
а туврашыже – кипарис гычын».
*а 1:11 Нард – кушкыл, тудын вожшо гыч тамле пушан ӱйым ыштеныт.
*б 1:12 Мирра – Аравийысе кушкылын тамлын ӱпшышӧ кишыже.
Глава 1
