Выбрать язык
Книги Ветхого Завета
Книги Нового Завета
с русским текстом1 Давид эрге Соломонын, Израиль кугыжан, туныктен каласыме ойжо-влак.
2 Тек нуно мунлылык ден туныктымашым кондат,
ушан ойым умылаш полшат,
3 ушан-шотан илыш ден чын ыштымашлан,
чын суд ден чынлыклан туныктат.
4 Тек ужарвуй-влаклан*б пуат умылен моштымашым,
самырыклан – шинчымаш ден шонен моштымашым.
5 Тек мунло еҥат, нуным колын, кугемда шинчымашыжым,
ушан еҥат мунло ой-каҥашым муэш –
6 кузе умылаш туныктен каласыме ден вес семын ойлымым,
мунло еҥ-влакын мутышт ден туштен ойлымыштым.
7 Мунлылыкын*в тӱҥалтышыже – Господь деч лӱдмаш.
[Кӧм тудо виктарен шога, чылаштлан пуа умылымашым.
А Юмым шотлымаш – уш-акылын тӱҥалтышыже.]
Ушдымо-влак гына огыт шотло мунлылык ден туныктымашым.
8 Эргым, ачатын каҥашыжым колышт,
аватын туныктен ойлымыжым ит шӱкал,
9 лийыт нуно вуйыштет сӧрал вуйшӱдыш,
шӱйыштет – мотор шӱшер.
10 Эргым, сулыкан-влак тыйым савыраш тӧчат гын,
ит келше!
11 Нуно каласат гын: «Айда мемнан дене,
пушташлан шылын шинчына,
титакдыме еҥым амал деч посна ваҥена,
12 вес тӱня семын нуным илышынек,
шӱгарыш волышым нелме семын тичмашнек нелына.
13 Поген налына шергакан тӱрлӧ арверым,
поянлык дене пӧртнам темена.
14 Кышкаш тӱҥалат шеревам мемнан дене,
чылаланна лиеш ик оксагалта», –
15 ит кай нунын дене, эргым,
ит шогал нунын корнышкышт.
16 Вет нунын йолышт осалым ышташ куржыт,
вӱрым йоктараш вашкат.
17 Кайык-влакын шинчашт ончылно шындыме лӧдӧ деч шот огеш лий,
18 а нине еҥ-влак шылын шинчыт шке вӱрыштым йоктараш,
ваҥен шинчат шкеныштым пытараш!
19 Тыге лиеш осал паша дене шкаланже погым погышо еҥ дене:
тиде пого тудын илышыжым пытара.
20 Мунлылык кычкыра уремлаште,
еҥ погынымо верлаште шке йӱкшым кугемда,
21 ӱжын кычкыра лӱшкышӧ калык коклаште,
ола капкаш пурымаште шке мутшым ойла:
22 «Ушдымо-влак, кунар эше те ушдымылыкым йӧраташ тӱҥалыда?
Мыскылыше-влак шке мыскылымышт дене кунар эше келанаш*г тӱҥалыт,
а ушдымо-влак шинчымашым ужмышудымо лийыт?
23 Савырныза мыйын шылталыме мутем дек:
мый ӱмбакыда мунлылык шӱлышем опталам,
тыланда шомакем увертарем.
24 Мый ӱжынам – те колыштын огыдал,
кидем шуенам – нигӧ тидым шотыш налын огыл.
25 Чыла ой-каҥашем те шӱкалында,
шылталыме мутем кӱлдымыш луктында.
26 Сандене мыят воштылам,
кунам тендан деке туткар толеш,
койдарем, кунам тендам шучкылык авалта!
27 Тӱтан семын ӱмбакыда шучкылык толеш,
пӧрдшымардеж семын азап авалта,
ойго ден орлык тендам темдалыт.
28 Тунам мыйым ӱжын кычкырат, но ом вашеште,
чыла вере кычалыт, но огыт му.
29 Вет нуно шинчымашым ужмышудымо лийыныт,
ойырен налын огытыл Господь деч лӱдмашым,
30 ой-каҥашем шӱкалыныт,
кӱлдымыш луктыныт шылталыме мутем.
31 Сандене нуно шке паша саскаштым кочкыт,
осал шонымашышт деч темыт.
32 Вет шотдымо-влакым ӱскырт улмышт кошарта,
ушдымо-шамычым шоныде илымышт пытара.
33 А кӧ мыйым колыштеш – лӱдыкшым палыде ила,
осал дечын тудо огеш лӱд».
*а 1 Мунлылык – мудрость.
*б 1:4 Ужарвуй – неопытный, наивный.
*в 1:7 «Мунлылыкын» – еврей текстыште «шинчымашын».
*г 1:22 Келанаш – наслаждаться.
Глава 1