Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
91 Псалом
1 Псалом. Шуматкечын мурымо муро.2 Могай сай – Господьым мокташ,
Чыла деч Кӱшылысын лӱмжым моктен мураш!
3 Порылыкет нерген эрдене,
ӱшанле улмет нерген кастене каласкалаш,
4 лу кылан кӱсле дене, арфе да лира дене шоктен мураш!
5 Куандаренат, Господь, мыйым шке пашат дене,
кидетын мом ыштымыжым ончен, мый йывыртем.
6 Господь, могай кугу улыт Тыйын пашат-влак,
шонымашет-влак пеш келге улыт!
7 Ок пале тидым ушдымо айдеме,
шонен моштыдымо ок умыло.
8 Кеч йӧрдымӧ еҥ-влак шудо семын кушкыт
да осалым ыштыше-шамыч пеледалтыт,
нуно садак курымешлан йомыт.
9 А Тый, Господь, курымеш чыла деч кӱшнӧ улат!
10 Вет тушманет-влак, Господь, Тыйын тушманет-влак пытат,
осалым ыштыше-шамыч чылан шалатыме лийыт.
11 А мыйын тӱкем Тый ир ӱшкыжын тӱкыж гай нӧлталат,
свежа ӱй дене мыйым шӱрет.
12 Тушманем-влак ӱмбаке шинчам куанен онча,
ваштарешем шогалше осал еҥ-влакын варгыжмыштым пылышем колеш.
13 Чын ыштыше-влак пальме семын пеледалтыт,
ливанысе кедр семын нӧлталтыт.
14 Нуно Господьын пӧртыштыжӧ шындыме улыт,
Юмынан кудывечылаштыже пеледалтыт.
15 Шоҥгеммекат нуно саскам пуышо, лӧза да нӧргӧ лийыт,
16 Господьын чынлыкше нерген увертарат.
Тудо – мыйын кӱ курыкем,
Тудын нимогай чындымылыкше уке.
Глава 91
