Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
72 Псалом
Асафын псаломжо.1 Юмо Израиль деке чынжымак поро кумылан,
нунын деке, кӧмытын шӱм-чонышт яндар!
2 А мый изиш гына шым шӱртньӧ,
йолем изиш гына ыш яклешт.
3 Осал еҥ-влакын сайын илымыштым ужын,
нине намысдыме еҥ-шамычлан мый кӧранен колтышым.
4 Колымешкышт уке нунын нимогай йӧсылык,
чока капан, таза нуно улыт.
5 Моло еҥ семын огыт орлане,
илышын кочыжым огыт пале.
6 Сандене кугешнымаш – нунын шӱшерышт,
пызырымаш – нунын чиемышт.
7 Кояҥмышт дене шинчаштат огеш кой,
уда, оккӱл шонымаш дене шӱмышт темын.
8 Мыскылен воштылыт, ойлат осалым,
шкеныштым кӱшкӧ шынден, весе-влакым лӱдыктылыт.
9 Умшашт кутыра пылпомыш ваштареш,
пӱтынь мланде ваштареш йылмышт ойла.
10 Юмын калыкшат савырна нунын могырыш,
нунын мутыштым вӱд семын корка тич кошталын йӱэш.
*а11 Ойлат нуно: «Кузе Юмо пален налеш?
Чыла деч Кӱшылысӧ пала мо?»
12 Тыгае улыт нине осал еҥ-влак,
илат эре сайын, поянлыкым поген.
13 [Каласенам мый:]
«Арам мо тугеже шӱмем яндарым кученам,
титакдыме улмем ончыкташ кидем мушкынам?»
14 Кажне кечем орлык дене темын,
кажне эрдене мылам шылталымым колаш логалын.
15 Но каласем ыле гын:
«Тӱҥалам ойлаш мый нунын семын», –
Тыйын калыкетым ондалем ыле.
16 Шонкаленам мый: кузе гын чыла тидым умылаш,
но неле лийын тиде мыланем.
17 Вара гына, Юмын святой верышкыже пурымеке,
мый умыленам – могай мучаш нуным вуча.
18 Яклака корныш Тый нуным шогалтет,
Тый нуным пӱтынек пытарет.
19 Кузе нуно ик татыште пытарыме лийыт,
пытат нуно, мучашышт лиеш шучко!
20 Помыжалтмеке, кузе ужмо омым мондат,
туге Тылатат, Господь, кынелмекет,
нунын сынышт нигунам лийдыме гай лиеш.
21 Кунам шӱмемлан кочо лийын да кӧргем йӱлен,
22 умылен кертын омыл, лийынам шонен моштыдымо,
Тыйын ончылнет вольык гае лийынам.
23 Но мый эре улам Тый денет,
пурла кидем гыч Тый мыйым кучет.
24 Каҥашым пуэн, ончыктет мылам корным,
вара чапышке вӱден кондет.
25 Каваште Тый дечет моло кӧ мыйын уло?
Мландыштат Тый дечет моло мыланем нимо ок кӱл.
26 Мыйын капем ден чонем начарештыт,
но Юмо – шӱмемын пеҥгыдылыкше,
Тудо – курымешлан мыйын ужашем.
27 А Тый дечет кораҥше-влак пытат.
Пытарет Тый кажным, кӧ Тылат ӱшанле огыл.
28 Мыланем гын пиал – Юмо дек лишыл лияш!
Господь Юмо дене мый аралтышым муынам.
[Сион ӱдырын уремлаштыже]
Тыйын пашат-влак нерген ойлаш тӱҥалам.
*а 72:10 Еврей текстыште тыште мом возымым умылаш неле.
Глава 72
