Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
70 Псалом
1 Тыйын полышетлан, Господь, ӱшанен илем,
тек намысыш мый нигунам ом пуро.
2 Лук мыйым эрыкыш, шке чынлыкет почеш утаре!
Кол мыйын йӱкем, мыйым утаре!
3 Лий мыйын пеҥгыде аралтышем,
кушан мый эре шылын кертам.
Тый мыйым утараш шонен пыштенат,
Тый кӱ курыкем, чоткыдо карманем улат.
4 Юмем, утаре мыйым осал еҥын кидше деч,
вуянче да шыгыремдыше-влак деч утаре.
5 Тый мыйын ӱшанем улат, Господь Юмем,
Тылат мый самырык годсек инанем.
6 Шочмем годсекак мый Тылат эҥертем,
ава мӱшкыр гыч мыйым Тый луктынат –
ом чарне Тыйым моктымем.
7 Лийынам мый шукыштлан ӧрмашым лукшо,
но Тый пеҥгыде аралтышем улат.
8 Тек умшам моктымаш дене темеш –
[мураш Тыйын чапет нерген,]
Тыйын сылнылыкетым кажне кечын моктен мураш.
9 Ит кодо мыйым шоҥго лиймекем,
вием пыташ тӱҥалме годым ит шӱкал Шке дечет.
10 Теве тушманем-влак мыйын ваштареш кутырат,
чонем ваҥыше-влак, погынен, шке коклаштышт ойлат:
11 «Юмо тудым коден.
Поктен кайыза, тудым кучыза –
тудын утарышыже уке».
12 Юмем, ит лий мый дечем тораште.
Мыйын Юмем, мыланем полшаш вашке.
13 Тек, намысыш пурен, мыйын тушманем-влак йомыт!
Осалым кӧ мылам шона, тек нуным вожылмаш да намыс леведыт!
14 А мый [Тылат] инанен илем,
Тыйым эшеат чот моктем.
15 Кажне кечын Тыйын чынлыкет нерген,
утарыше пашат-влак нерген ойлаш тӱҥалам,
кеч нуным шотлен пытаренат ом керт.
16 Господь Юмын кугу пашаж-влак нерген каласкалем,
Тыйын чынлыкетым, лач Тыйыным, мый увертарем.
17 Юмем, йоча жапем гычак мыйым туныктен шогенат,
ӧрыктарыше пашат-влак нерген таче мартеат увертарем.
18 Юмем, ит кодо мыйым шоҥго, чал ӱпан лиймекемат –
Тыйын виет нерген мый тиде тукымлан каласкалынем,
ончыкылык тукым-влаклан куатет нерген ойлынем.
19 Тыйын чынлыкет кавашке шуэш,
кӱдыратле улыт ыштыме пашат-влак.
Юмем, кӧ уло Тый гает?
20 Шуко неле орлыкым мылам Тый колтенат,
но угыч да угыч мыйым ылыжтенат,
мланде пундаш гыч луктынат.
21 Чапем нӧлталын, адакат лыпландаренат,
[мланде пундаш гыч мыйым луктынат].
22 Юмем, Тыйын порылыкетым арфе дене моктем,
Израильын Святойжо, кӱсле дене Тыйым моктен мурем!
23 Тылат мурымо годым умшам куан дене темеш,
йывырта чонем, кудым Тый утаренат.
24 Тыйын чынлыкет нерген йылмем кажне кечын ойла,
вет мылам осалым шонышо-влак
вожылтарыме да намысыш пуртымо улыт.
Глава 70
