Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
106 Псалом
[Аллилуия.]1 Моктыза Господьым – Тудо поро,
порылыкшо Тудын курымеш!
2 Тыге тек Господьын утарыме еҥже-влак ойлат.
Нуным Тудо тушман кид гыч утарен,
3 тӱрлӧ эл гыч, эрвел да касвел гыч,
йӱдвел да кечывалвел гыч поген.
4 Йомын коштыныт нуно еҥ илыдыме ир мландыште,
муын огытыл корным еҥ-влак илыман олашке.
5 Чытеныт шужымашым, йӱмӧ шумашым,
нуно пеш чот улненыт.
6 Шке ойгыштышт ӱжын кумалыныт Господьлан,
да Тудо орлыкышт деч нуным утарен:
7 тура корно дене еҥ-влак илыман олашке наҥгаен.
8 Тек моктат Господьым Тудын порылыкшылан,
айдеме эрге-влаклан ыштыме чыла ӧрыктарыше пашажлан,
9 вет йӱмӧ шушо чоным Тудо йӱктен,
шужышо чонлан тамле кочкышым пукшен.
10 Ойго да кӱртньӧ дене шинчырлыме,
нуно пычкемыште, колымаш ӱмылыштӧ шинченыт,
11 вет Юмын мутшылан нуно торешланеныт,
Чыла деч Кӱшылысын каҥашыжым кӱлдымыш луктыныт.
12 Неле паша дене Тудо нуным темден,
нуно шӱртненыт, нигӧ полшен огыл.
13 Но шке ойгыштышт ӱжын кумалыныт Господьлан,
да Тудо орлыкышт деч утарен,
14 луктын нуным пычкемыш гыч, колымаш ӱмыл гыч,
шинчырыштым кӱрлын шуэн.
15 Тек моктат Господьым Тудын порылыкшылан,
айдеме эрге-влаклан ыштыме чыла ӧрыктарыше пашажлан!
16 Вет Тудо той капка-влакым пудыртен,
кӱртньӧ тӱкылтыш-влакым шалатен.
17 Сулыкан корныштлан, осал пашаштлан кӧра
шотдымо еҥ-влак орланеныт.
18 Нунын чонышт чыла кочкыш деч йырнен,
колымаш капка деке нуно лишемыныт.
19 Но шке ойгыштышт ӱжын кумалыныт Господьлан,
да Тудо орлыкышт деч нуным утарен.
20 Тудо шке шомакшым колтен да нуным паремден,
шӱгар деч нуным утарен.
21 Тек моктат Господьым Тудын порылыкшылан,
айдеме эрге-влаклан ыштыме чыла ӧрыктарыше пашажлан!
22 Тек кондат Тудлан моктымаш надырым,
Тудын пашаж нерген йывыртен увертарат!
23 Южышт корабль дене теҥызыш коштыныт,
кугу вӱд ӱмбалне сомылым шуктеныт –
24 нуно Господьын мом ыштымыжым ужыныт,
вӱд келгытыште ыштыме ӧрыктарыше пашажым эскереныт.
25 Тудо кӱштен, да тале мардеж кынелын,
теҥыз толкын-влак кӱш нӧлталтыныт.
26 Кӱзеныт еҥ-шамыч пылпомыш марте,
вара келгытыш воленыт,
тиде туткарыште чонышт ӱшаным йомдарен.
27 Йӱшӧ семын нуно пӧрдыныт, лӱҥгеныт –
чыла моштымашышт лектын укеш.
28 Но шке ойгыштышт ӱжын кумалыныт Господьлан,
да Тудо орлыкышт деч нуным утарен.
29 Тыпландарен Тудо тӱтаным,
да толкын-влак шыпланеныт.
30 Куаненыт утарыме-влак теҥыз лыпланымылан,
да Тудо нуным толаш шонымо гаваньыш конден.
31 Тек моктат Господьым Тудын порылыкшылан,
айдеме эрге-влаклан ыштыме чыла ӧрыктарыше пашажлан!
32 Тек Тудым чаплат калык погынымаште
да кугурак-влакын каҥашыштышт моктат!
33 Эҥерым Тудо савыра ошманурыш,
памашым – кошкышо мландыш,
34 киндым шочыктышо мландым – шинчалан кундемыш.
Вет тушто илыше-влак осал пашам ыштеныт.
35 Тудак савыра ошманурым ерыш,
кошкышо мландым – вӱдан памашыш;
36 шужен илыше-влакым нине кундемыш вераҥда,
нуно илашышт олам чоҥат.
37 Ӱдат пасум, шындат виноградым –
кондат нунышт шуко саскам.
38 Суапландара Тудо нуным, да нуно чот шукемыт,
вольыкыштымат Тудо шукемда.
39 Но кунам нуно шагалемыт,
пызырналт илыме деч, ойго-орлык дечын лунчыргат,
40 Господь он-влакым намыс дене леведеш,
корныдымо ир мландыште йомын кошташ кода.
41 Но йорлым Тудо незерлык гыч луктеш,
тудын тукымжым шорык кӱтӱ гай кугум ышта.
42 Тидым ужын, чын ыштыше-влак куанат,
а осалым ыштыше-шамыч умшаштым петырат.
43 Кӧ ушан – тидым шӱмышкыжӧ пышта
да Господьын порылыкшым умыла.
Тау
Глава 106
