Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
105 Псалом
Аллилуия.1 Моктыза Господьым – Тудо поро,
порылыкшо Тудын курымеш.
2 Кӧ Господьын куатан пашаж-влакым пӱтынек каласкален,
моктымашым сулышо чыла пашажым увертарен кертеш?
3 Пиалан улыт чынлыкым шуктен шогышо,
эре чыным ыштыше-влак!
4 Господь, шке калыкетлан порылыкым ончыктымет годым
мыйым шарналте:
кунам нуным утараш тӱҥалат – мыламат полшо.
5 Пу мылам ойырен налмет-влакын сайын илымыштым ужаш,
Тыйын калыкет дене пырля йывырташ,
Тыйын еҥет-влак дене пырля куанаш.
6 Ача-кочана-влак семын ме сулыкыш пуренна,
осал, уда паша-шамычым ыштенна.
7 Египетыште улмышт годым ача-кочана-влак
Тыйын ӧрыктарыше пашат-влакым умылен огытыл,
шуко гана ончыктымо порылыкетым монденыт,
Йошкар теҥыз воктене ӱскыртланеныт.
8 Но шке куатшым ончыкташ манын,
шке лӱмжылан кӧра Тудо нуным утарен.
9 Йошкар теҥызлан кӱштен каласен – тудо кошкен,
Господь нуным теҥыз пундаш дене
пуйто кукшо мланде дене наҥгаен.
10 Тудо нуным ужмышудымо-влакын кидышт гыч утарен,
тушман кид гыч эрыкыш колтен.
11 Вӱд леведын нунын тушманыштым,
кодын огыл илыше иктат.
12 Тудын мутшылан нуно ӱшаненыт,
Тудым моктен муреныт.
13 Но Тудын пашаж-влакым вашке монденыт,
Тудын каҥашыжым вучен огытыл.
14 Ир мландыште нуно кумыл йодмыштлан вуйым пуэныт,
еҥ илыдыме верыште Юмым тергеныт.
15 Нунын йодмыштым Тудо шуктен,
но ӱмбакышт шучко черым колтен.
16 Станыште нуно кӧраненыт Моисейлан,
да Ааронлан, Господьын святойжылан.
17 Мланде шелалт почылтын да Дафаным нелын,
Авирон кашакым помышешыже тоен.
18 Тул ылыжын нунын коклаште,
осал еҥ-влакым тулйылме йӱлалтен.
19 Хорив курык воктене велен ыштеныт ӱшкыжым,
кумалыныт нуно шояк юмылан –
20 Юмыштым, шке Чапыштым,
шудым кочкын илыше ӱшкыжын тӱсшылан вашталтеныт.
21 Монденыт нуно Утарыше Юмыштым,
кеч Тудыжо Египетыште кугу паша-влакым,
22 Хам мландыште ӧрмашан
да Йошкар теҥыз воктене лӱдмашан паша-влакым ыштен.
23 Шке калыкшым Тудо пытараш шонен,
но Моисей, Тудын ойырен налме еҥже,
Тудын ончыко шелшыш шогалын –
да, нуным Юмо ынже пытаре манын,
Тудын шыдыжым кораҥден.
24 Налаш шонымо мландыштым аклен моштен огытыл,
Юмын мутшылан ӱшанен огытыл.
25 Ӧпкелен ойленыт шке омашлаштышт,
Господьын йӱкшым колыштын огытыл.
26 Тунам Тудо кидшым нӧлталын –
нуным ир мландыште кошарташ,
27 тукымыштым калык-влак коклаште пытараш,
вес эллашке нуным шалатен колташ.
28 Нуно Ваал-Фегорлан кумалаш тӱҥалыныт,
чондымо юмо-влаклан кондымо надырым кочкыныт.
29 Шке пашашт дене Господьын шыдыжым луктыныт,
да нунын коклаште шучко чер шарлен.
30 Но тунам Финеес кынелын
да судым ыштен – тыге чер чарнен.
31 Тиде пашажлан тудо тукым гыч тукымыш, курымеш
чын ыштышылан шотлалтеш.
32 Мерива вӱд воктене шыдештареныт нуно Юмым,
ойгым ужын нунын верч Моисей.
33 Тудын чонжылан нуно кочым конденыт,
да сайын шоналтыде тудо каласен.
34 Господьын пытараш шӱдымӧ калык-влакым
нуно пытарен огытыл,
35 йот калык-влак дене лугалтыныт,
нунын йӱлаштлан тунемыныт,
36 шояк юмыштлан кумалыныт,
нунышт израиль калыклан лӧдӧ лийыныт.
37 Шке эрге-ӱдырыштым нуно ия-влаклан надыр шотеш конденыт,
38 титакдыме вӱрым, эрге-ӱдырыштын вӱрым, йоктареныт,
Ханаанысе шояк юмо-влаклан нуным надырлан конденыт –
вӱрышт дене мланде шакшылалтын.
39 Тыге нуно пашашт дене шкеныштым амыртеныт,
мом ыштылмышт дене яжарланеныт.
40 Тунам Господьын шыдыже шке калыкшылан ылыжын:
шке еҥже-влак деч Тудо йырнен.
41 Пуэн нуным йот калык-влакын кидышкышт,
нуным ужмышудымо-шамыч нунын дене озаланеныт.
42 Шыгыремденыт нуным тушман-влак,
тушман кид йымалне нуно ӱҥышемыныт.
43 Шуко гана Тудо нуным утарен,
а нуно вустыкланымышт дене Тудым сырыктеныт
да шке сулыкешышт пижын шинчыныт.
44 Но Тудо нунын йӧсланымыштым ужын,
полышым йодын кычкырымыштым колын.
45 Нунын дене ыштыме ойпидышыжым шарнен,
шуко порылыкшылан кӧра нуным чаманен.
46 Кӧ нуным пленыште кучен,
нунын шӱмышкӧ Господь чаманымашым пыштен.
47 Утаре мемнам, Господь Юмына,
калык-влак кокла гыч мемнам пого,
тунам ме Тыйын святой лӱметым чаплена,
Тыйым куанен моктена.
48 Тек Израильын Господь Юмыжо курым-курымеш моктымо лиеш!
Тек уло калык каласа: Аминь! Аллилуия!
Тау
Глава 105
