Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
21 Глава
1 Иовын шымше шомакше:1 Иов Софарым тӱткын колышташ йодеш. 7 Молан осалым ыштыше еҥ-влак сайын илат?1 Иов вашештен:
2 «Тӱткын мыйым колыштса,
кеч тидын дене мыйым лыпландарыза.
3 Чыталтыза мыйым, ойлаш тӱҥалам.
А кунам ойлен пытарем, кертыда те игылтын.
4 Мыйын вуйшиймашем айдеме дек мо?
Чытышем пыташлан амал уке мо?
5 Ончалза ӱмбакем – те ӧрткеда,
умшадам кид дене петырыза.
6 Шоналтем веле – авалта мыйым шучкылык,
шергылт кая уло капем.
7 Молан осалым ыштыше-влак илат,
молан илат шоҥгеммешке да вий-куатым погат?
8 Йочашт-влак пеленышт вий-куатым погат,
шинчашт ончылно кушкыт уныкашт.
9 Пӧртышт шучкылык ден лӱдмашым огыт пале,
Юмын тояже ӱмбалнышт уке.
10 Ӱшкыжышт нунын эре тӱжаҥда,
ушкалышт тӱжаҥыт да лугыч огыт кудалте.
11 Кӱтӱ семын луктын колтат йочаштым,
ньогашт тӧрштылын юарлат.
12 Мурат нуно тимпан да арфе сем почеш,
шиялтыш почеш йывыртен йӱкланат.
13 Пиалан нунын илыме кечышт,
да ласкан вес тӱняшке каят.
14 А Юмылан нуно ойлат:
”Кораҥ мемнан деч, огеш кӱл мыланна Тыйын корнет!
15 Кӧ тугай Чылакучышо?
Молан мыланна Тудлан служитлаш?
Могай пайда Тудым сӧрвалыме деч?”
16 Осал еҥ-влакын улан илышышт шке кидыштышт мо?
Но нунын шонен пыштымышт йот улыт мыланем!
17 Чӱчкыдын мо осал еҥ-шамычын лампышт йӧра
да нунын дек туткар толеш?
Шке шыдыж дене Тудо нуным орландара мо?
18 Лийыт мо нуно мардеж дене наҥгайыме олым гай,
пӱтыреммардеж дене поктымо арва гай?
19 ”Нунын осалыштым Юмо йочаштлан пӧртылта” –
тыге те ойледа.
Но Юмо тек шкеныштым мут кучаш шогалта –
тек нуно тидым пален шогат!
20 Тек шке шинчашт дене ужыт пытымыштым,
тек шкештак Чылакучышын шыдыжым йӱыт.
21 Колымышт деч вара нуно ешышт верч огыт тургыжлане,
вет илышаш кечышт пытен.
22 Но Юмым мо мунлылыклан туныкташ,
Тудым, Кӧ кӱшылысӧ-влакымат судитла?
23 Икте вийвалне улмыж годым,
ласкан да тыныслын илымеке, кола,
24 капше тудын чока,
лужо-влак вем дене темыныт.
25 А весе кола, чон кочылык дене темын,
кая тудо, пиалым тамлен ончыде.
26 Пырля кияш тӱҥалыт рокышто,
шукш-влак нуным леведыт.
27 Палем мый, мом те шонеда,
могае оптышым ваштарешем пидыда.
28 Каласеда те: ”Кушто кызыт лӱмлӧ еҥын пӧртшӧ,
нине осал еҥ-влакын омашышт?”
29 Йодын огыдал мо эртен кайыше еҥ деч,
ойлымыштым колыштын огыдал мо?
30 Пытарыме ок лий осал еҥ туткар кечын,
шыде кечын тудо ӧрдыжкӧ кораҥдыме лиеш.
31 Кӧ тудым шинчашкыже ончен титакла,
кӧ тудлан мом ыштымыжлан пӧртылта?
32 Тудым наҥгаят шӱгарлашке,
шӱгарже воктене оролым шогалтат.
33 Пушкыдо лиеш тудлан лапверысе мланде,
ужатыше калык ошкылеш тудын почешыже,
а ончылныжо кайыше-влакым шотлен пытарашат ок лий.
34 Кузе те мыйым яра шомак дене лыпландареда?
Тендан вашмутыштыда – лач шояк!»
Глава 21
