Выбрать язык
Книги Ветхого Завета
Книги Нового Завета
с русским текстом1 Кугыжаланаш тӱҥалмыж годым Ахаз коло ияш лийын да Иерусалимыште латкуд ий вуйлатен, но Господьлан келшыше пашам Давид кугезе кочаж семын ыштен огыл.2 Тудо Израиль кугыжа-влакын корнышт дене каен, эсогыл Ваалын статуйжо-шамычым велен ыштен.3 Енном лапверыште Ахаз йӱлалтен тӱргыктен, Господьын израильтян-влак деч поктен колтымо калык-шамычын йырнык йӱлашт почеш шке эргыж-влакымат тул гоч колтен.4 Тудо тыгак кӱкшакасе кумалме верлаште, чоҥгаталаште да кажне ӱмылан пушеҥге йымалне надырым конден, туштак тӱтыртышым йӱлалтен.5 Тидлан Господь Юмыжо тудым Сирий кугыжан кидышкыже пуэн. Сириян-влак Ахазым кырен шалатеныт да пеш шуко еҥым Дамаскыш пленыш наҥгаеныт. Вара Господь тудым Израиль кугыжа кидыш пуэн. Тудат Ахазын пеш шуко сарзыжым пытарен.6 [Израиль кугыжа] Факей, Ремалий эрге, ик кечыште Иудан шӱдӧ коло тӱжем тале сарзыжым кырен шалатен, вет нунышт шке ача-кочаштын Господь Юмыштым коденыт улмаш.7 Зихри, Ефрем тукым гыч патыр сарзе, кугыжан Маасей эргыжым, полат вуйлатыше Азрикамым да Елканам – кугыжа деч вара кокымшо айдемым – пуштын.
8 Израиль эрге-влак шке Иуда тукым иза-шольыштын кокшӱдӧ тӱжем ватышт ден эрге-ӱдырыштым пленыш налыныт, тыгак пеш шуко погыштым руалтеныт да чыла тидым Самарийыш наҥгаеныт.9 Тушто Господьын Одед лӱман пророкшо лийын. Тудо Самарийыш толшо сарзывий ваштареш лектын да каласен: «Ача-кочадан Господь Юмыжо Иуда эрге-влаклан шыдешкен да нуным тендан кидыш пуэн. А те нуным ажгыныше гай кырен шалатенда, кугу шыдыда эсогыл кавашке шуын.10 Ынде те Иуда мландыште да Иерусалимыште илыше пӧръеҥ ден ӱдырамаш-влакым шке кулышкыда савырынеда. А те шкеже Господь Юмыда ончылно титакдыме улыда мо?11 Колыштса мыйым да пленыш налме шке тукым иза-шольыдам колтыза, вет тендан ӱмбаке Господьын шыдыже ылыжын».
12 Ефрем тукым вуйлатыше-влак кокла гыч икмынярынже – Иегоханан эрге Азарий, Мешиллемоф эрге Берехий, Шаллум эрге Езекий, Хадлай эрге Амессай – сар гыч толшо-шамыч ваштареш шогалыныт.13 Нуно каласеныт: «Пленыш налме-влакым тышке ида пурто, уке гын ме Господь ончылно титакан лийына. Мемнан сулыкна ден осал пашана деке эше тидым ешарынеда мо? Мемнан титакна тугакат кугу, [Господьын] шыдыже Израиль ӱмбаке ылыжын».14 Тунам сарзе-влак пленыш налме еҥ-шамыч ден руалтен налме погым он-влак ден погынышо калык ончылан коден каеныт.15 Пленыш налме калык кокла гыч чарамат кодшо-влаклан вургемым лӱмышт дене каласыме еҥ-влак руалтен налме пого гыч пуэныт. Нуно ты еҥ-шамычым чиктеныт, йолчиемым пуэныт, пукшен-йӱктеныт, сусырыштым ӱй дене шӱреныт. Ӱнардыме-влакым осёл ӱмбаке шынденыт да Иерихоныш – Пальме олаш – тукым иза-шольышт дек наҥгаеныт, вара гына шкешт Самарийыш пӧртылыныт.
16 Тиде жапыште Ахаз кугыжа шке еҥже-влакым Ассирий кугыжа-шамыч деке полышым йодаш колтен.17 Вет идумей-влак угыч толыныт, Иуда эрге-шамычым кырен шалатеныт да пленыш наҥгаеныт улмаш,18 а лоп верыште да кечывалвелне верланыше Иудан олалашкыже филистим-шамыч керылт пуреныт. Нуно Вефсамисым, Аиалоным, Гедерофым, тыгак Сохом, Фимнам, Гимзом да нунын йыр улшо илем-влакым руалтен налыныт да тушто илаш тӱҥалыныт.19 Тыге Господь Ахаз кугыжалан верч Иудам ӱлыкшемден, вет тудыжо Иудам чын корно гыч кораҥден, Господь ончылно кугу сулыкым ыштен.20 Тудын дек Феглафелласар, Ассирий кугыжа, толын, но полшымо олмеш Ахазым шыгыремдылаш гына тӱҥалын.21 Ахаз Господьын пӧртшӧ, кугыжан пӧртшӧ гыч да он-влак деч шергакан шуко ӱзгарым налын да Ассирий кугыжалан пуэн, но тидат полшен огыл.
22 Тиде неле-орлык жапыштат Ахаз кугыжа Господь ончылно сулыкым ыштымыжым чарнен огыл.23 Тудо Дамаскысе юмо-влаклан надырым конден. Мыйым нуно сеҥеныт манын шонен да тыге ойлен: «Сирий кугыжа-влаклан нунын юмышт полшат. Мый нунылан надырым кондаш тӱҥалам, тунам нуно мыламат полшат». Но нине юмо-влак Ахазлан да пӱтынь Израильлан нимо сайым конден огытыл, эше ударак веле лийын.24 Ахаз Юмын пӧртын чыла ате-ӱзгаржым поген да шалатен, Господьын пӧрт омсажым петырен да Иерусалимын чыла лукыштыжо жертвенник-влакым шогалтен.25 Иудан кажне олаштыже, йот юмо-шамычлан йӱлалтен тӱргыкташ манын, кӱкшакалаште кумалме верлам ыштен да тидын дене ача-кочаж-влакын Господь Юмыштым шыдештарен.26 Ахазын моло пашаже, чыла мом ыштымыже тӱҥалтыш гыч мучаш марте «Иуда ден Израиль кугыжа-шамычын курымсерыш книгаштышт» возымо улыт.27 Вара Ахаз шке ача-кочаж-влак деке ушнен. Тудым Иерусалим олаште, но Израиль кугыжа-влакым тойымо шӱгарлаште огыл тоеныт. Ахаз олмеш кугыжалан Езекий эргыже шогалын.
Глава 28