Библия
Выбрать язык
Книги Ветхого Завета
Книги Нового Завета
с русским текстом
КОКЫМШО КУРЫМСЕРЫШ КНИГА
27 Глава
Иофам – Иудан кугыжаже.1 Кугыжаланаш тӱҥалмыж годым Иофам коло вич ияш лийын, да тудо Иерусалимыште латкуд ий вуйлатен. Аважын лӱмжӧ Иеруша, тудо Садокын ӱдыржӧ лийын.2 Иофам шке Озий ачаж семынак Господьлан келшыше пашам ыштен, но тудын семын Господьын храмышкыже пурен огыл. А калык эшеат сулыкым ыштен илен.3 Иофам Господьын пӧртын Кӱшыл капкажым чоҥен да Офелысе пырдыжыште шуко чоҥымо пашам ыштен.4 Тудо тыгак Иудан курыклаштыже ола-влакым, а чодыраште карман ден башне-шамычым чоҥен.5 Иофам аммон кугыжа дене кредалын да тудым сеҥен. Аммон-влак тудо ийын тудлан шӱдӧ талант шийым, лу тӱжем кор шыдаҥым да лу тӱжем кор шожым пуэныт. Тынарак йозакым нуно кокымшо да кумшо ийынат тӱленыт.6 Иофамын корныжо шке Господь Юмыжо ончылно чын лийын, сандене тудо вий-куатым поген.
7 Иофамын моло пашаже, чыла сарже да мом ыштымыж нерген «Израиль ден Иуда кугыжа-влакын курымсерыш книгаштышт» возымо.8 Кугыжалан шогалмыж годым тудо коло вич ияш лийын да Иерусалимыште латкуд ий вуйлатен.9 Вара Иофам шке ача-кочаж-влак деке ушнен, тудым Давид-Олаште тоеныт. Олмешыже кугыжалан Ахаз эргыже шогалын.
Глава 27
