Выбрать язык
Книги Ветхого Завета
Книги Нового Завета
с русским текстом1 Господьын шондыкшым конденыт да Давидын лӱмынак ыштыме скинийышкыже шынденыт. Тидын деч вара Юмылан йӱлалтен пуымо надыр ден татулык надырым конденыт.2 Йӱлалтен пуымо надыр ден татулык надырым кондымеке, Давид Господьын лӱмжӧ дене калыкым суапландарен.3 Тудо чыла израильтянлан – пӧръеҥланат, ӱдырамашланат – сукыр кинде, шыл моклака да изюм чумырка дене пуэден.4 Израильын Господь Юмыжым моктен мурышт, чапландарышт да тауштен шогышт манын, Господьын шондыкшо ончылно служитлаш Давид икмыняр левитым шогалтен.5 Асаф вуйлатышышт лийын, кокымшо – Захарий, тудын деч вара – Иеиел, Шемирамоф, Иехиил, Маттифий, Елиав, Ваней, Овед-Едом да Иеиел. Нуно кӱсле ден лирам шоктеныт, Асаф кимвалым кырен,6 а иерей-влак, Ваней ден Яхазиил, Юмын ойпидыш шондыкшо ончылно той пучым пуалтен шогеныт.
7 Асаф ден тудын тукым иза-шольыжо-влак Господьым моктен мурышт манын, тиде кечын Давид икымше гана кӱштымашым пуэн:
8 «Чаплыза Господьым, Тудын лӱмжым ӱжын кумалза,
калык-влак коклаште Тудын пашаж-влакым каласкалыза!
9 Тудым чаплыза, Тудлан мурыза,
Тудын чыла ӧрыктарыше пашаж-влак нерген ойлыза!
10 Тудын святой лӱмжӧ дене кугешныза,
Господьым кычалше шӱм-влак тек куанат.
11 Кычалза Господьым да Тудын вийжым,
кычалза Тудын чурийжым эре.
12-13 Те, Израильын тукымжо – Тудын тарзыже-шамыч,
те, Иаковын эргыже-влак – Тудын ойырен налмыже-шамыч!
1 Тудын ӧрыктарыше пашаж-влакым,
Тудын палдарыше пале ден увертарыме судшо-влакым шарныза.
14 Тудо – мемнан Господь Юмына,
чыла вере мландымбалне судым ышта.
15 Курым-курымеш шарныза Тудын ойпидышыжым,
тӱжем тукымлан пуымо мутшым,
16 Авраам дене ыштыме ойпидышыжым,
Исааклан пуымо товатмутшым.
17 Иаковлан тидым закон семын,
1 Израильлан курымаш ойпидыш семын пеҥгыдемден.
18 Господь каласен: ”Ханаан мландым тыланда пуэм,
тудо озаланен илыме мландыда лиеш”.
19 Тунам нуно шагалын лийыныт,
тушто ӧрдыж гыч толшо лийыныт,
20 ик калык деч вес калык дек,
ик кугыжаныш гыч вес кугыжанышыш кусныл коштыныт.
21 Но Тудо нуным нигӧлан шыгыремдаш пуэн огыл,
нунын шотышто кугыжа-влаклан шижтарен ойлен:
22 ”Шӱрен палемдыме-влакем ида тӱкӧ,
пророк-влакемлан осалым ида ыште”.
23 Мландымбалне илыше-влак, Господьлан мурыза!
Тудын утарымыж нерген кажне кечын ойлыза!
24 Калык-влак коклаште Тудын чапшым,
чыла тукым коклаште ӧрыктарыше пашаж-влакым увертарыза!
25 Вет Господь – кӱдыратле, моктымашым сулышо,
Тудо кугу лӱдмашым луктеш,
1 чыла юмо деч кӱшнӧ улеш!
26 Вет моло калыкын юмышт улыт полган,
а Господь кавам ыштен.
27 Тудын пеленже – чап ден кугулык,
Тудын [святой] верыштыже – вий ден куан.
28 Тӱнясе чыла калык, чапым пуыза Господьлан,
моктыза Тудым чап ден вий-куатшылан!
29 Господьын лӱмжым чапландарыза,
Тудын дек пӧлек дене мийыза,
святой сӧраллык дене Господьлан вуйдам савыза!
30 Пӱтынь мланде, Тудын ончылныжо чытыре!
Тӱня пеҥгыдын шога, ок чытырне.
31 Тек йывырта кава да мланде куана,
тек калык-влак коклаште каласат: ”Господь кугыжалана!”
32 Лӱшка тек теҥыз да мо тушто уло,
тек куана пасу да мо тушто уло!
33 Тек чодырасе пушеҥге-влак Господь ончылно йывыртен гӱжлат,
вет Тудо толеш мландым судитлаш.
34 Моктыза Господьым – Тудо поро,
порылыкшо Тудын курымеш!
35 Каласыза: ”Утаре мемнам, Юмына, мемнан Утарышына!
Пого мемнам да калык-влак кокла гыч утаре!
Пу мыланна Тыйын святой лӱметым чаплаш,
Тыйым куанен мокташ!”
36 Тек Израильын Господь Юмыжо моктымо лиеш,
курым-курымеш!»
Уло калык «Аминь!» манын да Господьлан чапым пуэн.
37 Господьын ойпидыш шондыкшо ончылно кажне кечылан палемдыме йӱла радам почеш эре служитлаш манын, Давид тушан Асаф ден тудын тукым иза-шольыжо-влакым,38 тыгак Овед-Едомым да тудын тукымжо гыч кудло кандаш еҥым коден. Овед-Едом, Идифун эрге, ден Хоса капка орол лийыныт.39 А иерей Садок ден тудын тукымысо иерей-влакым Давид Гаваонысо кӱкшакаште улшо Господьын омашыже ончылан шогалтен.40 Нуно надырым йӱлалтыме жертвенникыште Господьлан надырым эре, эрдене да кастене, конден шогышаш, чылажымат Господьын Израильлан пуымо законыштыжо возымо семын ыштышаш улыт улмаш.41 Нунын дене пырля Еман, Идифун да лӱмышт дене каласыме моло ойырен налме еҥ-влак лийыныт. «Тудын порылыкшо курымеш!» манын ойлен, нуно Господьым чапландарышаш улыт улмаш.42 Еман ден Идифун Юмым чапландарыме годым той пуч, кимвал да моло семӱзгар дене шоктымылан вуйын шогеныт, Идифун эрге-влак гын капка орол лийыныт.43 Вара чылан шке мӧҥгышкышт каеныт. Шке мӧҥгысыжӧ-влак дене суап шомакым ойлен саламлалташ манын, Давидат мӧҥгышкыжӧ пӧртылын.
Глава 16