Выбрать язык
Книги Ветхого Завета
Книги Нового Завета
с русским текстом1 Кугыжалан шогалмыж годым Иосий кандаш ияш лийын. Тудо Иерусалимыште кумло ик ий кугыжаланен. Аважын лӱмжӧ Иедида, тудо Боцкаф гыч Адайын ӱдыржӧ лийын.2 Иосий Господьлан келшыше пашам ыштен. Пурлашкат, шолашкат кораҥде, тудо чыла шотыштат шке Давид кугезе кочажын корныжым тошкен.
3 Латкандашымше ий вуйлатымыж годым Иосий кугыжа Господьын пӧртышкыжӧ возкалыше Шафаным, Ацалий эргым, Мешулламын уныкажым, колтен. Кугыжа каласен:4 «Кугу иерей Хелкий деке кай. Тек тудо Господьын пӧртыш кондымо чыла шийым, кудым капка орол-влак калык деч погеныт, шотлен налеш.5-6 Тек тиде шийым Господьын пӧртыштӧ олмыктымо пашам вуйлатен шогышо-шамычлан пуат. А нунышт тудым Господьын пӧртыштӧ пашам ыштыше-влаклан – плотник, кӱмастар, пырдыжым чоҥышо-шамычлан – мо шаланымым тӧрлаш, тыгак пӧртым ачалашлан чодырам да руымо кӱм налаш пуэдат.7 Пуымо шийым кузе кучылтмо нерген нунын деч йодаш ок кӱл – нуно чынле еҥ улыт».
8 Кугу иерей Хелкий возкалыше Шафанлан каласен: «Господьын пӧртыштӧ мый закон книгам муынам». Хелкий тудым Шафанлан пуэн. Тудыжо книгам лудын лектын.9 Вара возкалыше Шафан кугыжа деке вашмутым пуаш толын. Тудо каласен: «Господьын пӧртыштӧ улшо шийым тарзет-влак налыныт да пашам вуйлатен шогышо-шамычлан пуэныт».10 Вара Шафан ешарен: «Иерей Хелкий мылам книгам пуэн», да тудым кугыжа ончылно лудын.
11 Закон книгаште мом возымым колмеке, кугыжа шке вургемжым кушкедын.12 Тудо иерей Хелкийлан, Шафан эрге Ахикамлан, Михей эрге Ахборлан, возкалыше Шафанлан да кугыжан тарзыже Асаийлан тыге кӱштен каласен:13 «Кайыза да мумо книгаште мом возымо шотышто мыйын верч, калык верч, пӱтынь Иуда верч Господь деч каҥашым йодса. Тудын шыдыже мыланна пеш кугу лийшаш, вет ача-кочана-шамыч тиде книгасе мут-влакым колыштын огытыл, тушто возымо семын ыштен огытыл».
14 Иерей Хелкий, Ахикам, Ахбор, Шафан да Асаий тунам Олдама лӱман ӱдырамаш пророк деке каеныт. Тудыжо вургем клатлан вуйын шогышо Шаллумын ватыже лийын, Шаллумжо Тикван эргыже, Хархасын уныкаже улмаш. Олдама Иерусалимын у ужашыштыже илен. Нуно тудын дене кутыреныт.15 Олдама нунылан каласен: «Тыге Господь, Израильын Юмыжо, ойла. Тендам тышке колтышо еҥлан каласыза:16 ”Тыге Господь ойла: тиде верыш да тыште илыше-влак ӱмбаке Мый кугу ойгым колтем – Иуда кугыжан лудмо книгасе чыла шомак шукталтеш.17 Нуно Мыйым коденыт, вес юмо-влаклан тӱтырат, шке кидышт дене ыштыме шояк юмышт дене Мыйым сырыктарат. Тидлан кӧра тиде вер ӱмбаке Мыйын шыдем ылыжеш да ок йӧрӧ”.18 А тендам Господь деч йодаш колтышо Иуда кугыжалан каласыза: ”Господь, Израильын Юмыжо, тыйын колмо мут шотышто тыге ойла:19 тиде вер да тыште илыше-влак ваштареш каласыме шомакем колмеке, тый ӧкыненат. Нуно пустаҥдыме да каргыме лийыт манын каласымемлан тый Господь ончылно ӱҥышемынат, вургемет кушкедын, Мыйын ончылнем шортынат. Тыге ыштыметлан Мыят тыйым колынам, – ойла Господь. –20 Мый тыйым ача-кочат-влак деке пыштем. Тый тыныс дене тойымо лият. Тиде вер ӱмбак Мыйын колтымо чыла ойгым тыйын шинчат огеш уж”». Тиде вашмутым кугыжалан конденыт.
Глава 22