Выбрать язык
Книги Ветхого Завета
Книги Нового Завета
с русским текстом1 Факейын, Ремалий эргын, латшымше ий вуйлатымыж годым Иудан кугыжажлан Ахаз, Иофам эрге, шогалын.2 Кугыжаланаш тӱҥалмыж годым Ахаз коло ияш лийын да Иерусалимыште латкуд ий вуйлатен, но шке Господь Юмыжлан келшыше пашам Давид кугезе кочаж семын ыштен огыл.3 Тудо Израиль кугыжа-шамычын корнышт дене каен. Господьын израиль эрге-влакын чурийышт ончыч поктен колтымо калык-шамычын йырнык йӱлашт почеш Ахаз шке эргыжымат тул гоч колтен.4 Тудо тыгак кӱкшакасе кумалме верлаште, чоҥгаталаште да кажне ӱмылан пушеҥге йымалне надырым конден, туштак тӱтыртышым йӱлалтен.5 Тунам Сирий кугыжа Рецин ден Израиль кугыжа Факей, Ремалий эрге, Иерусалимым сеҥен налаш манын, сар дене толыныт. Нуно Ахазым авырен налыныт, но сеҥен кертын огытыл.6 Сирий кугыжа Рецин тиде жапыште Елаф гыч Иуда тукым еҥ-влакым поктен колтен да тудым Сирийлан пӧртылтен. Елафыште идумей-шамыч вераҥыныт, нуно тушто таче кечынат илат.
7 Ахаз шке еҥже-влакым Ассирий кугыжа Феглаффелласар дек тыге каласаш колтен: «Мый мут колыштшо тарзет улам. Тол да ваштарешем шогалше Сирий кугыжа ден Израиль кугыжан кидышт деч мыйым утаре».8 Ахаз Господьын пӧртыштӧ, тыгак кугыжан пӧртын поянлыкым погымо верлаштыже улшо ший ден шӧртньым налын да Ассирий кугыжалан пӧлек шотеш колтен.9 Ассирий кугыжа Ахазын йодмыжым шуктен: Дамаскыш каен да тиде олам сеҥен налын. Тушто илыше-влакым Кирыш наҥгаен, а Рециным пуштын.
10 Тунам Ахаз кугыжа Дамаскыш Ассирий кугыжа Феглаффелласарым вашлияш каен. Тушто жертвенникым ужмеке, тудо иерей Урийлан жертвенникын сӱретшым да тудым ыштыме планым колтен.11 Ахаз кугыжан Дамаск гыч колтымо каҥашыж-влак почеш иерей Урий жертвенникым чоҥаш пижын, кугыжан пӧртылмешкыже тудым ыштен шуктен.12 Кунам кугыжа Дамаск гыч толын да жертвенникым ужын, тудын дек лишемын да тушан надырым конден.13 Тудо йӱлалтен пуымо надыр ден кинде надырым йӱлалтен, йошкар арака надырым конден да жертвенник ӱмбаке шке татулык надыржын вӱржым шыжыктен.14 А Господь чурий ончылно улшо той жертвенникым, тудо у жертвенник ден Господьын храмже коклаште ынже шого манын, храм ончыч кораҥден да у жертвенникын йӱдвелкыже шогалтен.15 Ахаз кугыжа иерей Урийлан тыге кӱштен каласен: «Кугу жертвенникыште эрдене конден шогымо йӱлалтен пуымо надырым, кастене конден шогымо кинде надырым, кугыжан йӱлалтен пуымо надыр ден кинде надыржым, тыгак уло калыкын йӱлалтен пуымо надыр ден кинде надыржым, йошкар арака надыржым кондо. Тудын ӱмбак йӱлалтен пуымо надыр ден моло надырын вӱрыштым шыжыкте. А той жертвенникым мый мужедаш кучылтам».16 Иерей Урий чылажымат Ахаз кугыжан кӱштымыж семын ыштен.
17 Ахаз кугыжа той орва-влакын панельыштым кораҥден, нунын ӱмбач чан-шамычым волтен. Тудо «теҥыз» манын лӱмдымӧ кугу чанымат той ӱшкыж-влак ӱмбачын волтен – нунышт чан йымалне лийыныт – да кӱ кӱвар ӱмбаке шынден.18 Эше храм пелен улшо шуматкечын коштмо леведышан коридорым да Господьын пӧртыш кугыжан пурымо вержым петырен. Чыла тидым тудо Ассирий кугыжалан кӧра ыштен.
19 Ахазын моло пашаже, чыла мом ыштымыж нерген «Израиль кугыжа-влакын курымсерыш книгаштышт» возымо.20 Вара Ахаз шке ача-кочаж-шамыч деке ушнен. Тудым нунын пелен Давид-Олаште тоеныт. Ахаз олмеш кугыжалан Езекий эргыже шогалын.
Глава 16