Выбрать язык
Книги Ветхого Завета
Книги Нового Завета
с русским текстом1 Иуда кугыжа Иосафатын латкандашымше ий вуйлатымыж годым Иорам, Ахав эрге, Самарийыште Израильын кугыжажлан шогалын. Тудо латкок ий кугыжаланен.2 Иорам Господь шинча ончылно шуко осал пашам ыштен, но ачаж ден аваж семынак огыл – тудо ачажын Вааллан шогалтыме онакӱжым кораҥден.3 Но Израильым сулыкыш пуртышо Иеровоамын, Нават эргын, сулыкшо-влакым тудо ыштен шоген, нунын деч кораҥын огыл.
4 Моав кугыжа Месан шорык кӱтӱжӧ-влак лийыныт. Тудо Израиль кугыжалан йозак шотеш шӱдӧ тӱжем пачам да шӱдӧ тӱжем таган межыштым пуэн шоген улмаш.5 Но кунам Ахав колен, Моав кугыжа Иорам ваштареш шогалын.6 Тунам тудыжо Самарий гыч лектын да уло израиль сарзывийым поген.7 А Иуда кугыжа Иосафат деке тудо тыге каласаш колтен: «Моав кугыжа мыйын ваштареш шогалын. Тудын ваштареш мый денем пырля сар дене кает мо?» Иосафат вашештен: «Каем. Кушко тый, тушко мыят. Кушко тыйын калыкет, тушко мыйынат. Кушко тыйын имнет, тушко мыйын имнемат».8 Вара йодын: «Могай корно дене каена?» Иорам вашештен: «Едомысо ир мланде гоч».
9 Тыге Израиль кугыжа, Иуда кугыжа да Едом кугыжа пырля каеныт. Йыргорно дене шым кече ошкылмеке, нунын сарзывийыштлан да арверым наҥгайыше вольыкыштлан вӱд кодын огыл.10 «Ойго мыланна! – каласен Израиль кугыжа. – Господь мемнам, кум кугыжам, Моав кидыш пуаш манын, тышке конден!»11 Иосафат йодын: «Тыште Господьын пророкшо уке мо? Ме тудын гоч Господь деч каҥашым йодына ыле». Израиль кугыжан еҥже-влак кокла гыч иктыже каласен: «Тыште Елисей, Сафат эрге, уло. Тудо Илиян полышкалышыже лийын».12 Иосафат каласен: «Тудын Господьын шомакше уло». Израиль кугыжа, Иосафат да Едом кугыжа тудын деке каеныт.
13 Елисей Израиль кугыжалан каласен: «Тылат мый дечем мо кӱлеш? Шке ачат ден аватын пророкышт деке кай». Израиль кугыжа тудлан вашештен: «Уке, тыге огыл, вет тиде Господь мемнам, кум кугыжам, тышке Моав кидыш пуаш конден».14 Елисей каласен: «Мыйын служитлыме Господь Саваоф дене товатлем: Иуда кугыжа Иосафатым ом жапле гын, ӱмбакет омат ончал ыле, тыйым ом уж ыле.15 Мый декем кӱслезым кондыза». Кунам кӱслезе шоктен, Елисей ӱмбалне Господьын кидше лийын,16 да тудо каласен: «Тыге Господь ойла: ”Тиде лапверыште вынем-влакым кӱнчыза”.17 Господь тыге ойла: ”Те мардежымат, йӱрымат огыда уж, а лапвер вӱд дене темеш. Тудым теат, вольыкдат йӱаш тӱҥалыда”.18 Но тиде эше шагал, Господь тендан кидыш Моавымат пуа.19 Те чыла чоткыдемдыме ола ден тӱзланыше олам шалатеда, чыла сай пушеҥгым руэда, чыла памашым петыреда да чыла сай пасуш кӱм кышкеда».
20 Эрдене, кинде надырым кондымо жапыште, Едом могыр гыч кенета вӱд йогаш тӱҥалын, да мланде вӱд дене темын.21 Кунам моав-влак кугыжа-шамычын сар дене толмышт нерген колыныт, нуно саргуралым нумал кертше чыла самырык ден кугурак пӧръеҥыштым погеныт да чек воктене шогалыныт.22 Кунам моав-влак эр эрдене помыжалтыныт, да вӱд ӱмбаке икымше кечыйол возын, вӱд нунылан вӱр гай йошкаргын койын.23 «Тиде вӱр! – кычкыралыныт нуно. – Кугыжа-влак шке коклаштышт кучедалыныт да икте-весыштым пуштыныт. Моав, погыштым руалтен налаш вашке!»24 Нуно Израиль стан деке толыныт. Тунам израильтян-влак ӱмбакышт кержалтыныт да моав-шамычым кыраш тӱҥалыныт. Нунышт куржыныт, а израильтян-влак поктен каеныт да пуштеденыт.25 Нуно моав-влакын олаштым шалатеныт, чыла сай пасушкышт кӱм кышкеныт – кажныже ик кӱ дене шуэн. Чыла памашым петыреныт да чыла сай пушеҥгым руэныт. Лач Кир-Харешетыште кӱ пырдыж кодын. Шӱштӱштӧ дене кӱм кышкыше сарзе-влак тиде олам авыреныт да тудым сеҥен налыныт.
26 Кунам Моав кугыжа сеҥалтмыжым ужын, пеленже керде дене кучедал моштышо шымшӱдӧ еҥым налын да Едом кугыжа деке керылт пураш тӧчен, но кертын огыл.27 Тунам Моав кугыжа шке кугэргыжым – тудыжо ачаж деч вара кугыжалан шогалшаш улмаш – налын да тудым ола пырдыжыште йӱлалтен пуымо надырлан конден. Тидыже израильтян-влаклан йырынчык лийын, нуно тушеч чакненыт да шке мландышкышт пӧртылыныт.
Глава 3