Выбрать язык
Книги Ветхого Завета
Книги Нового Завета
с русским текстом1 Кунам Господь Давидым чыла тушманже да Саулын кидше деч утарен, Давид Господьлан тиде мурым мурен:
2 «Господь – пеҥгыдылыкем, аралтышем да утарышем.
3 Мыйын Юмем – кӱ курыкем,
Тудын полшымыжлан ӱшанен илем.
Тудо – авыртышем, виян утарышем, аралышем да саклышем.
Тудо – утарышем, чыла азап деч мыйым саклен шога.
4 Моктымашым сулышо Господьым мый ӱжам
да тушманем-влак деч утарыме лиям.
5 Колымаш толкын-влак мыйым авырышт,
пужлымашын йогынжо-шамыч мыйым лӱдыктышт.
6 Вес тӱнян шинчырже-влак мыйым авырышт,
колымашын вапшыже йырем пӱтырналте.
7 Чонлан шыгыр лийме годым Господьым ӱжым,
шке Юмемым сӧрвален мый йодым.
Тудо шке [святой] верже гыч йӱкем кольо,
кычкырымем Тудын пылышыж дек миен шуо.
8 Мланде лӱҥгалте да чытырналте,
кава негыз чытырныш, тарваныш –
[Господь нунылан] шыдешкыш.
9 Нерже гыч шикш лекте,
умшаж гыч – чыла пытарыше тул,
Тудын деч тулшол-влак йогышт.
10 Тудо пылпомышым пӱгыртыш да волыш,
йол йымалныже – тӱп пычкемыш.
11 Херувим ӱмбаке шинче да чоҥештыш,
мардежын шулдырешыже кайыш.
12 Тӱп пычкемыш гыч Шкаланже леведышым ыштыш,
кавасе шем пыл дене Шкенжым авырыш.
13 Тудын ончылно волгалтме деч
тулшол-влак йӱлаш тӱҥальыч.
14 Кӱдыртыш Господь пылпомыш гыч,
Чыла деч Кӱшылысӧ шке йӱкшым пуыш.
15 Пикш-влакым колтен, тушманым шалатыш,
волгенче дене [логалтен,] нуным пытарыш.
16 Господьын кӱштымӧ йӱкшӧ деч,
Тудын шыдыжын пуалмыж деч
теҥыз йымалысе вӱдйогын почылто,
тӱнян негызше-влак койыч.
17 Кидшым кӱшыч шуялтен, мыйым нале,
шуко вӱд кокла гыч мыйым лукто.
18 Утарыш мыйым виян тушманем деч,
мыйым ужмышудымо еҥ-влак деч,
2 кӧмытын куатышт лийын мый дечем шукырак.
19 Мылам неле лийме кечын нуно ӱмбакем кержалтыч,
но Господь мылам эҥертыш лие.
20 Утарыш мыйым, йоҥгыдо верыш лукто,
вет Тудо мый декем поро кумылан.
21 Чыным ыштымем почеш Господь мылам пӧртылта,
кидемын арулыкшо почеш Тудо пуа,
22 вет мый Господьын корныж дене коштынам,
осалым ыштен, Юмем деч кораҥын омыл.
23 Тудын чыла кӱштымашыжым ушыштем эре кучем,
пунчалже-влак деч мый кораҥын омыл,
24 Тудын ончылно шылталаш лийдыме лийынам,
сулыкым ыштыме деч шекланенам.
25 Чыным ыштымем почеш Господь мылам пӧртылта,
вет Тудын шинчаж ончылно улам ару.
26 Поро еҥ дене Тый поро лият,
чынле еҥ дене – чынле,
27 яндар дене – яндар,
а шояк еҥ дене – чоя.
28 Ӱҥышӧ-шамычым Тый утарет,
кугешныше-влакым шке ончалтышет дене ӱлыкшемдет.
29 Господь, Тый мылам лампым чӱктет.
Господь волгалтара мыйын пычкемышем.
30 Тыйын полшымет дене тушман ӱмбак керылтам,
Юмем дене ола пырдыжым вончем.
31 Юмо! Тудын корныжо чынле,
Господьын шомакше яндар.
Кӧ Тудын полышыжлан ӱшанен ила,
чылаштлан Тудо авыртыш лиеш.
32 Господь деч моло кӧ эше Юмо уло?
Мемнан Юмына деч моло кӧ эше аралтыш уло?
33 Юмо мылам вий-куатым пуа,
мыйын корнем чыным ышта,
34 йолем ышта пӱчын гайым,
кӱкшака верыш мыйым шогалта,
35 кредалаш туныкта кидемым,
той пикшйоҥежым кидем чымалтара.
36 Утарымаш авыртышым Тый пуэт мылам,
Тыйын порылыкет мыйым нӧлта.
37 Йолемлан коштмо верым лопкаҥдет,
да огеш тайнышт мыйын йолем.
38 Тушман-шамычем поктен каем да пытарем,
нуным кырен шалатымеш, мӧҥгеш ом пӧртыл.
39 Шалатен пытарем мый нуным –
огыт керт кынелын нуно,
йӧрлыт йол йымакем.
40 Тый мылам кредалаш вий-куатым пуэт,
ваштарешем шогалше-влакым ончылнем сӱмырет.
41 Тушман-шамычем мый дечем куржыктет,
мыйым ужмышудымо-влакым мый пытарем.
42 Полышым йодын, нуно кычкырат, но уке утарыше.
Господьым сӧрвалат, но Тудо нуным ок кол.
43 Мый нуным пуракыш савырем,
уремысе лавыра семын нуным тошкем.
44 Калыкем пудыраныме годым Тый мыйым утаренат,
вес калык-влакын вуйлатышышт лияш мыйым араленат.
Калык, кудым ончыч пален омыл, мылам служитла.
45 Йот калык еҥ-влак мылам келшаш тӧчат,
ик гана ойлымо гычак мыйым колыштыт.
46 Йот тукым-влак ошем каят ончылнем,
карманыштышт чытырен шинчат.
47 Господь илыше! Моктымо лийже мыйын аралышем,
чапландарыме лийже Юмем, утарыше кӱ курыкем!
48 Тудо мылам верч ӱчым шукта,
кид йымакем калык-влакым пуа,
49 тушман-шамыч деч мыйым утара!
Ваштарешем шогалше-влак деч кӱшкӧ Тый мыйым нӧлталынат,
поктылшо еҥ дечын Тый утаренат.
50 Сандене Тыйым, Господь, йот калык коклаште чапландарем,
Тыйын лӱметым мый моктен мурем!
51 Шке кугыжатлан Тый кугу сеҥымашым пӧлеклет,
шӱрен палемдыме Давид ден тудын тукымжылан
порылыкым курым-курымеш ыштет».
Глава 22