Выбрать язык
Книги Ветхого Завета
Книги Нового Завета
с русским текстом1 Иоав, Саруян эргыже, шекланен: кугыжа Авессаломым монден ок керт.2 Тудо Фекой гыч ушан ик ӱдырамашым кондаш кӱштен. Иоав тудлан каласен: «Шортшыла кой, ойгым ончыктышо вургемым чий. Шкендым ӱй дене ит шӱрӧ. Колышо шотышто шуко жап шортшо ӱдырамаш семын кой.3 Кугыжа деке кай да тыге каласе...», да Иоав ӱдырамашлан мом каласаш кӱлмым туныктен ойлен.
4 Фекой гыч ӱдырамаш Давид кугыжа дек толын, вуйжым мланде марте савен да каласен: «Кугыжа, полшо мылам, [полшо]!»5 Кугыжа тудын деч йодын: «Мо лийын?» Тудо вашештен: «Мый [шукертак] тулык вате улам, марием колен.6 Мыйын кок эргым лийын. Икана нуно нурышто кучедалыныт, чарыше нигӧ лийын огыл. Иктыже весыжым перен да тудым пуштын.7 Тунам уло тукым тыйын тарзе ӱдырамашет ӱмбак кержалтын: ”Пу мыланна иза пуштшым! Изажым пуштмылан ме шкенжымат пуштына! Тек тудын урлыкшо ок шуйно!” Мариемын лӱмжым да тудын урлыкшым мландымбалне кодаш огыл манын, нуно мыйын пытартыш тулойыпемат йӧртынешт».8 Кугыжа ӱдырамашлан вашештен: «Кай тыныс дене мӧҥгышкет. Мый тыйын шотышто кӱштымашым пуэм».9 Но Фекой гыч ӱдырамаш кугыжалан каласен: «Тек титак, мыйын кугыжа озам, мыйын ӱмбалнем да ачамын тукымжо ӱмбалне лиеш. А кугыжа да тудын престолжо титакдыме улыт».10 Тунам кугыжа манын: «Кӧ тыланет тидын шотышто иктаж-мом каласа гын, тудым мый декем кондо. Тудо тетла тыйым ок тӱкӧ».11 Ӱдырамаш каласен: «Кугыжа, вӱр верч ӱчым шуктышо-влак ынышт шукем да мыйын эргым ынышт пытаре манын, Господь Юмо дене товатле». Кугыжа пелештен: «Господь дене товатлем – эргычын вуйжо гыч ик ӱп пырчат ок камвоч!»
12 Тунам ӱдырамаш йодын: «Лиеш мо тарзетлан шке кугыжа озажлан эше ик мутым каласаш?»13 Кугыжа вашештен: «Ойло». Ӱдырамаш каласен: «Молан тыят Юмын калыкше дене тыгак ышташ шонен пыштенат? Тыгай шомакым каласымыж дене кугыжа шкенжым шке титаканыш лукто. Вет тудо поктен колтымо эргыжым мӧҥгеш ок пӧртылтӧ.14 Ме чылан колена да мланде ӱмбак кышкалме вӱд семын лийына, кудыжым тетла мӧҥгеш погаш ок лий. Но Юмо ик чонымат ынеж пытаре, поктен колтымо еҥым Тудо угыч лишемдаш шона.15 Теве тиде паша нерген каласаш мый кугыжа озам деке тольым, вет родо-тукымем мыйым лӱдыктылеш. Сандене мый шоналтышым: ”Кугыжа дене кутыралтем. Ала тудо шке тарзыжын йодмыж почеш ышта?”16 Ала кугыжа колышт налеш да шке тарзыжым нине еҥын кидышт деч утара, вет нуно мыйым да эргым пушташ, мемнам Юмын пуымо мландыж гыч кораҥдаш шонат.17 Мый шоналтышым: ”Тек кугыжа озамын шомакше мыйым лыпландара. Вет мыйын кугыжа озам Юмын Суксыж гай: тудо сайым уда деч ойырен мошта”. Тек Господь, тыйын Юмет, пеленет лиеш!»
18 Кугыжа тудлан вашештен: «Тылат мый йодышым пуэм, мый дечем нимом ит шылте». «Ойло, мыйын кугыжа озам», – каласен ӱдырамаш.19 «Чыла тыште Иоавын кидше мо?» – кугыжа йодын. Ӱдырамаш каласен: «Тыйын илышет дене товатлем, кугыжа озам: кугыжа озамын каласымыж деч пурлашкат, шолашкат кораҥаш ок лий. Туге, тыйын Иоав тарзет мылам тыге кӱштен. Тудо тыйын тарзетлан мом каласаш кӱлмым туныктен.20 Мыйым Иоав тарзет тыге туштен ойлыктен. Но мыйын [кугыжа] озам – Юмын Суксыж гай мунло, тудо мландымбалне мо ышталтмым чыла пала».
21 Тидын деч вара кугыжа Иоавлан каласен: «Йӧра, мый [тыйын йодмет почеш] ыштем. Кай, кондо Авессаломым».22 Тунам Иоав вуйжым мланде марте савен да кугыжалан каласен: «Тек Юмо тыйым суапландара! Ынде кугыжа озамын шке тарзыж деке поро улмыжым палем: тудо шке тарзыжын йодмыжым шуктыш».23 Иоав Гесурыш каен да Авессаломым Иерусалимыш конден.24 Кугыжа каласен: «Тек Авессалом шке пӧртышкыжӧ пӧртылеш, но мыйын чурием тудо ок уж». Авессалом шке пӧртыштыжӧ илаш тӱҥалын, но кугыжан чурийжым ужын огыл.
25 Пӱтынь Израильыште Авессалом гай мотор пӧръеҥ лийын огыл, чылан тудым йӧратен онченыт. Йолвундаш гыч вуймучаш марте Авессаломын нимогай экшыкше уке улмаш.26 Кунам тудо ӱпшым тӱредын, пӱчмӧ ӱпшын нелытше кугыжан висаж дене кокшӱдӧ сикльыш шуын.*а А ӱпым кажне ийын пӱчкаш логалын, вет тудын нелытше ситышын лийын.27 Авессаломын кум эргыже да Фамарь лӱман ӱдыржӧ шочыныт. Фамарь пеш мотор улмаш, [варажым тудо Соломонын Ровоам эргыжын ватыже лийын да тудлан Авий эргым ыштен].
28 Кугыжам ужде, Авессалом Иерусалимыште кок ий илен.29 Тудо шкеж деке Иоавым ӱжыктен. Авессалом тудым кугыжа деке колтынеже улмаш. Но Иоав тудын деке толаш кӧнен огыл. Кокымшо гана тудын деке колтен – Иоав адакат толын огыл.30 Тунам Авессалом шке тарзыже-влаклан кӱштен: «Теве мыйын пасуэм воктене Иоавын пасужо. Тушто шож шочеш. Кайыза, тудым йӱлалтыза». Нунышт каеныт да ты пасум йӱлалтеныт. [Вургемыштым кушкедын, Иоавын еҥже-влак озаж деке миеныт да каласеныт: «Авессаломын еҥже-влак пасуэтым йӱлалтеныт».]31 Иоав Авессалом деке мӧҥгыжӧ толын да йодын: «Молан тыйын еҥет-влак мыйын пасуэм йӱлалтеныт?»32 Авессалом вашештен: «Мый тыйым ӱжыктенам, кугыжа деке тыге каласаш колтынем ыле: ”Молан мый Гесур гыч толынам? Туштак кодам гын, сайрак лиеш ыле. Мый кугыжан чурийжым ужнем. А титакан улам гын, тек кугыжа мыйым пуштеш”».
33 Иоав кугыжа дек каен да чыла тидым каласен. Кугыжа Авессаломым шкеж деке ӱжын. Тудыжо толын да кугыжа ончылно вуйжым мланде марте савен. Вара кугыжа Авессаломым шупшалын.
*а 14:26 Кокшӱдӧ сикль – кок кило утла.
Глава 14