Выбрать язык
Книги Ветхого Завета
Книги Нового Завета
с русским текстом1 Икмыняр жап гыч аммон-влакын кугыжашт колен. Тудын олмеш кугыжалан Аннон эргыже шогалын.2 Тунам Давид каласен: «Мый Аннонлан, Наас эргылан, порылыкым ончыктынем. Вет тудын ачаже мый декем поро лийын». Давид шке еҥже-шамычым Аннон деке ачаже шотышто чаманмутым каласаш колтен. Кунам Давидын еҥже-влак аммон-шамычын мландышкышт толыныт,3 тусо он-влак Аннон озаштлан каласеныт: «Давид тый декет шке еҥже-влакым чаманмутым каласаш колтен. Чынжымак ачатым пагален, тудо нуным колтен шонет мо? Уке, олам да тушто мо улым ончен лекташ, варажым тудым сеҥен налаш манын, Давид нуным тышке колтен!»4 Тунам Аннон Давидын тарзыж-влакым руалтен кучен, кажныжын пел могыр пондашыжым нӱжын, вургемыштын пел урвалтыжым кутан начка марте пӱчкын, вара колтен.5 Кунам тидын нерген Давидлан увертареныт, тудо тарзыже-влакым вашлияш еҥ-шамычым колтен, вет нунышт пеш чот намыслыме лийыныт. Кугыжа нунылан тыге каласаш кӱштен: «Кызытеш Иерихоныштак кодса. Кунам пондашда кушкеш, пӧртылыда».
6 Давидлан ужмышудымо лиймыштым умылымеке, аммон-влак шке еҥыштым Беф-Рехов ден Цоваште илыше сириян-шамыч деке колтеныт. Нунышт тушто коло тӱжем йолешкым, тыгак [амалик] кугыжа Мааха деч тӱжем еҥым да Тов гыч латкок тӱжем еҥым тарленыт.7 Давид, тидым колмеке, нунын дене кредалаш Иоавым да эн тале сарзывийым колтен.8 Аммон-влак ола гыч лектыныт да, кредалаш ямдылалтын, капка воктеке рат дене шогалыныт. А Цова ден Рехов гыч сириян-влак, тыгак Тов ден Маахан еҥже-влак ӧрдыжтӧ, нурышто, шогеныт.
9 Иоав ужын: тудын ваштареш тушман сарзывий ончылнат, шеҥгелнат шога. Тунам тудо израиль сарзе-шамыч кокла гыч эн сайыштым ойырен да нуным сириян-влак ваштареш луктын шогалтен.10 А кодшо еҥ-шамычым аммон-влак ваштареш шогалташ Авесса шольыжлан ӱшанен.11 Иоав каласен: «Сириян-шамыч мыйым сеҥаш тӱҥалыт гын, тый мыланем полшет, а аммон-влак тыйым сеҥаш тӱҥалыт гын, мый тылат полшаш мием.12 Лӱддымӧ лий, калыкна да Юмынан олаж-влак верч пеҥгыдын шогаш тӱҥалына! А Господь мом сайлан шотла, тек тудым ышта».
13 Иоав да тудын дене улшо калык сириян-шамыч дене кредалаш тӱҥалыныт. Нунышт Иоав деч куржыныт.14 Сириян-влакын куржмыштым ужын, аммон-шамычат Авесса деч куржыныт да шке олашкышт пӧртылыныт. Иоав аммон-влак деч каен да Иерусалимыш толын.
15 Израильтян-шамычлан сеҥалтмыштым ужмеке, сириян-влак иквереш погыненыт.16 Тунам Адраазар шке еҥже-шамычым [Халамак] эҥер вес велысе сириян-влакым ӱжаш колтен. Нунышт Еламыш толыныт. Вуйлатышышт Совак, Адраазарын сарзывуйжо, лийын.17 Тидын нерген Давидлан увертареныт. Тудо израиль сарзывийым поген да, Иорданым вончен, Елам деке толын. Сириян-влак, Давид ваштареш рат дене шогалын, кредалаш пижыныт.18 Израильтян-шамыч деч сириян-влак куржыныт. Давид нунын шымшӱдӧ орваштым да нылле тӱжем имнешкыштым пытарен. Тыгак тудо Совак сарзывуйыштым сусыртен, да тудыжо тушанак колен.19 Кунам Адраазарын кид йымалныже улшо чыла кугыжа-влак израильтян-шамычлан сеҥалтмыштым ужыныт, нуно израильтян-влак дене келшымаш ойпидышым ыштеныт да нунын кид йымакышт кусненыт. Сириян-влак тидын деч вара аммон-шамычлан полшаш лӱдыныт.
Глава 10