Выбрать язык
Книги Ветхого Завета
Книги Нового Завета
с русским текстом1 Давид ден тудын еҥже-влак Секелагыш кумшо кечын миен шуыныт. Тидын деч ончыч Кечывалвел мландыш да Секелагыш амалик-влак керылт пуреныт улмаш. Нуно Секелагым руалтен налыныт да йӱлалтеныт.2 Но олаште улшо ӱдырамаш-влакым [да молымат], изи гыч кугу марте, пуштын огытыл, а пленыш наҥгаеныт.3 Ола деке лишеммеке, Давид да тудын еҥже-влак ужыныт: олам йӱлалтыме, а ватыштым, эрге-ӱдырыштым пленыш наҥгаеныт.
4 Давид да тудын пелен лийше калык мӱгырен шорташ тӱҥалыныт. Нуно тунар чот шортыныт, эсогыл варажым шорташ вийышт кодын огыл.5 Давидын кок ватыжымат – Изреель гыч Ахиноамам да Кармил гыч Авигеям, Навал деч кодшо тулык ватым – пленыш наҥгаеныт.6 Давид кугу туткарыш логалын: калык тудын ӱмбак кӱм кышкаш ямде лийын, вет кажныже эрге-ӱдыржым йомдарымылан шыдешкыше лийын.7 Но Давид шке Господь Юмыжын полышыжлан инанен. Тудо иерей Авиафарлан, Ахимелех эргылан, каласен: «Мыланем ефодым кондо». Авиафар тудлан ефодым конден.8 Давид Господь деч йодын: «Мыланем тиде сарзывийым поктен каяш мо? Мый нуным поктен шуам мо?» Господь вашештен: «Поктен кай. Тый нуным поктен шуат да пленыш налме-влакым мӧҥгеш пӧртылтет».
9 Давид пеленже лийше кудшӱдӧ пӧръеҥ дене Восор йогын деке толын шуын, нунын кокла гыч ала-мынярынже тушан кодыныт.10 Давид шкеже да нылшӱдӧ еҥ умбакыже поктен каеныт. А кокшӱдӧ еҥже кодыныт: нунын Восор йогыным вончаш вийышт ситен огыл.
11 Нурышто нуно египтяным муыныт, тудым Давид деке конденыт. Египтянлан киндым пуэныт, да тудо кочкын. Тыгак вӱдым йӱктеныт,12 коштымо икмыняр смоква саскам да кок чумырка изюмым пуэныт. Кочмекше, тудын вийже пурен. Египтян кум кече кочкынат, йӱынат огыл улмаш.13 Давид тудын деч йодын: «Кӧ тыйын озат да кушечын улат?» Тудо каласен: «Мый египтян, ик амалик еҥын кулжо улам. Кум кече ончыч мый черланенам, садлан озам мыйым кудалтен коден.14 Ме крит калыкын илыме Кечывалвел мландышкыже, Иуда кундемыш да Халевын кечывалвел ужашышкыже керылт пуренна. А Секелагым йӱлалтен улына».15 Давид тудын деч йодын: «Мыйым нине сарзе-влак деке намиен шуктет мо?» Тудыжо каласен: «Тый мыйым от пушт да озамын кидышкыже от пу манын, Юмо ончылно товатле. Тунам мый тыйым нунын деке намиен шуктем».
16 [Давид египтянлан товатлен.] Кунам тудыжо Давидым амалик-влак деке конден, нунышт, тиде кундем мучко шаланен, кочкын-йӱыныт. Филистим ден Иуда мландылаште пеш шуко погым руалтен налме амал дене нуно пайремым ыштеныт улмаш.17 Давид вес кечын [ӱмбакышт кержалтын да,] волгыжмо деч ончыч тӱҥалын, кас марте нуным пуштеден. Верблюд ӱмбалан утлен кудалше нылшӱдӧ рвезым шотыш налаш огыл гын, нунын кокла гыч нигӧ утаралт кодын огыл.18 Мом амалик-влак наҥгаеныт, Давид чыла поген налын, тыгак шкенжын кок ватыжым утарен.19 Нунын нимо йомын огыл: изижат, кугужат, эрге-влакат, ӱдыр-шамычат, руалтен налме погат. Мом амалик-влак нунын деч наҥгаеныт, Давид чыла пӧртылтен.20 Тудо чыла тыгыде ден шолдыра вольыкым руалтен налын. Сарзе-влак нуным шке вольыкышт ончыч поктен каеныт да ойленыт: «Тиде – Давидын руалтен налме вольыкшо».
21 Давид Восор йогын воктелан кодымо кокшӱдӧ еҥже деке толын шуын. Нуныштын тудын почеш каяш вийышт ситен огыл улмаш. Нуно Давид да тудын дене пырля улшо еҥ-влак ваштареш лектыныт. Давид нунын деке лишемын да саламлалтын.22 Тунам Давид дене пырля коштшо кокла гыч осал да йӧрдымӧ южо еҥже тыге ойлаш тӱҥалын: «Нуно мемнан дене коштын огытыл, садлан ме руалтен налме поянлык гыч нунылан нимом огына пу. Тек кажныже шке ватыж ден икшывыже-влакым налеш да кая».23 Но Давид каласен: «Иза-шольым-влак! Тыге ида ыште, вет чыла тидым мыланна Господь пуэн. Тудо мемнам саклен коден да ваштарешна толшо сарзе тӱшкам мемнан кидыш пуэн.24 Кузе тендан дене кӧнаш лиеш? [Нуно мемнан деч уда огытыл.] Могай ужаш сарыш коштшо-влаклан, тугаяк ужаш арверна пелен кодшо-шамычлан лийшаш. Чылалан ик семын пайлаш кӱлеш».25 Тиде жап гычын Израильыште тыге ыштымым Давид закон ден пунчалыш савырен, тудо таче кечынат вийым йомдарен огыл.
26 Давид Секелагыш толын да руалтен налме пого гыч ужашым шке йолташыже-влаклан, Иуда тукымын кугуракше-шамычлан, колтен. Тудо тыге каласен: «Теве тыланда Господьын тушманже-влак деч руалтен налме пого гыч пӧлек».27 Пӧлекым тудо Вефильыш, кечывалвелысе Рамофыш, Иаттирыш,28 Ароерыш, [Аммадыш,] Шифмофыш, Ештемош, [Гефыш,]29 [Кинаныш, Сафеныш, Фимафыш,] Рахалыш, иерахмеел да кеней-влакын олалашкышт,30 Хормаш, Хорашаныш, Атахыш,31 Хевроныш да Давид ден тудын еҥже-влакын ондак лийме чыла верышкышт колтен.
Глава 30