Выбрать язык
Книги Ветхого Завета
Книги Нового Завета
с русским текстом1 Филистим-влак уло сарзывийыштым Афекеш погеныт, а израильтян-шамыч Изреельысе памаш воктене стан дене верланеныт.2 Филистим он-влак кажныже шке шӱдӧ але тӱжем еҥан сарзе отрядышт пелен каеныт, а Давид ден тудын еҥже-влак Анхус дене пырля шеҥгелне ошкылыныт.3 Филистим он-влак йодыныт: «Нине еврей-шамыч тыште мом ыштат?» Анхус нунылан вашештен: «Ода пале мо? Тиде вет Давид, Израиль кугыжа Саулын тарзыже. Тудо мый денем идалык утла ила. Мый декем толмыж деч вара тачысе кече марте тудын могыр гыч нимо удам ужын омыл».
4 Филистим он-влак тудлан шыдешкен каласеныт: «Колто тиде еҥым мӧҥгеш. Тек тудо шке верыштыже, тыйын тудлан ойырен пуымо верыште, шинча. Мемнан дене пырля сарыш каен, тудо мемнан ваштареш шогалын кертеш. Мемнан еҥ-влакнам вуйыштым руалын пуштмо дене огыл гын, могай вес йӧн дене тудо шке озаж дене сӧрасен кертеш?5 Тиде саде Давид огыл мо, кӧлан мурен-куштымышт годым ойленыт: ”Саул тӱжемым пытарен, а Давид – лу тӱжемым?”»
6 Анхус Давидым ӱжын да тудлан каласен: «Господь дене товатлем: тый чынле улат, да мый тыйым сарыште пеленем ужнем ыле. Вет мый декем толмет деч таче кече марте тыйын могыр гыч нимогай удам ужын омыл. Но он-влакын шинчаштышт тый сай отыл,7 сандене мӧҥгеш пӧртыл, кай тыныс дене. Филистим он-влакым ит сырыкте».8 Давид Анхуслан каласен: «Мом мый ыштенам? Тый декет толмо деч тачысе кече марте тарзетын могай удажым муынат? Молан мылам каяш да кугыжа озамын тушманже ваштареш кредалаш огыл?»9 Анхус Давидлан вашештен: «Шинча ончылнем тый Юмын Суксыж гай сай улат. Но филистим он-влак каласышт: ”Тудо мемнан дене пырля сарыш кайышаш огыл”.10 Тугеже, тый да озатын тарзыже-влак, кӧмыт тый денет пырля толыныт, эрдене кынелза [да мыйын тыланда ойырен пуымо верыш кайыза. Шӱмыштет уда шонымашым ит кучо, вет тый мыйын шинчаштем сай улат]. Эрден эр кынелза да волгыжмеке кайыза».11 Филистим мландыш пӧртылаш манын, Давид ден тудын еҥже-влак эрдене эр тарваненыт. А филистим-влак [сар дене] Изреельыш каеныт.
Глава 29