Выбрать язык
Книги Ветхого Завета
Книги Нового Завета
с русским текстом1 Авимелех деч вара Израильын утарышыже Иссахар тукым гыч Фола, Фуа эрге, Додон уныкаже, лийын. Тудо Шамирыште, Ефрем курыклаште, илен.2 Тудо коло кум ий Израильын судьяже лийын. Вара Фола колен, тудым Шамирыште тоеныт.
3 Тудын деч вара Галаад гыч Иаир лийын. Тудо коло кок ий Израильын судьяжлан шоген.4 Иаирын кумло [кок] эргыже улмаш. Нуно кумло [кок] самырык осёлым кушкыж кудалыштыныт да кумло [кок] олам кучен иленыт. Нине олам таче кече мартеат Иаир ял-влак маныт, нуно Галаад мландыште улыт.5 Кунам Иаир колен, тудым Камонеш тоеныт.
6 Тунам Израиль эрге-влак Господь ончылно осал пашам угыч ышташ тӱҥалыныт. Нуно Ваал ден Астарта-влаклан, арамей, сидон, моав, аммон да филистим юмо-шамычлан служитленыт, а Господьым коденыт, Тудлан служитлен огытыл.7 Израиль калыклан Господьын шыдыже ылыжын, да Тудо нуным филистим ден аммон-влакын кидышкышт пуэн.8 Тиде жап гыч нуно Иордан вес велне Галаадыште, аморрей-влакын мландыштышт, израильтян-шамычым латкандаш ий шыгыремден иленыт.9 Иуда, Вениамин да Ефрем эрге-влак дене кредалаш манын, аммон-влак Иордан гоч вонченыт. Тыге израильтян-шамыч кугу орлыкыш логалыныт.
10 Нуно Господь дек полышым йодын кычкыреныт, тыге ойленыт: «Тыйын ончылнет ме сулыкыш пуренна. Шке Юмынам коден, Ваал-влаклан служитленна».11 Господь израиль эрге-влаклан каласен: «Кунам тендам египтян, аморрей, аммон, филистим,12 сидонян, амалик, маон-шамыч шыгыремденыт да те Мый дечем полышым йодын кычкыренда, Мый тендам нунын кидышт деч утарен омыл мо?13 А те Мыйым коденда да вес юмо-влаклан служитлаш тӱҥалында. Тетла Мый тендам утараш ом тӱҥал.14 Кайыза да шкаланда ойырен налме юмыда-влак деч полышым йодын кычкырыза, тек ойган жапда годым тендам нуно утарат».
15 Израиль эрге-влак Господьлан каласеныт: «Ме сулыкыш пуренна. Мемнан дене мом шонет, тудым ыште, но мемнам кызыт утаре».16 Нуно йот юмо-влакым кораҥденыт да Господьлан [гына] служитлаш тӱҥалыныт. Господь Израильын орлыкшым тетла ончен кертын огыл.
17 Аммон-влак погыненыт да Галаадыште стан дене шогалыныт. Израиль эрге-шамычат погыненыт да стан дене Мицпаште шогалыныт.18 Галаадыште илыше-влакын онышт икте-весыштлан ойленыт: «Кӧ аммон-шамыч ваштареш сарым тӱҥалеш, тудо Галаадыште илыше-влакын вуйлатышышт лиеш».
Глава 10