Выбрать язык
Книги Ветхого Завета
Книги Нового Завета
с русским текстом1 Ханаан мландым сеҥен налме сарлаште лийдыме израильтян-влакым тергаш манын, Господь теве нине калыкым коден.2 Тидым Господь сарыште лийдыме самырык тукым израиль эрге-влак сар нерген палышт да кредалаш тунемышт манын ыштен.3 Тиде – филистим-влак да нунын вич вуйлатышышт, тыгак Ливан курыклаште Ваал-Ермон курык деч Емафыш пурымашке шумеш илыше чыла хананей, сидонян да евей-шамыч.4 Израильтян-влакым тергаш да Господьын Моисей гоч ача-кочаштлан пуымо кӱштымашыже-влакым нуно шуктен шогаш тӱҥалыт але укем пален налаш манын, Господь нине калыкым тышан коден.5 Израиль эрге-влак хананей, хеттей, аморрей, ферезей, евей, [гергесей] да иевусей коклаште иленыт.6 Нуно тиде калык-влакын ӱдырыштым марлан налыныт, шке ӱдырыштым нунын эргыштлан марлан пуэныт да нунын юмыштлан служитленыт.
7 Израиль эрге-шамыч Господьын шинча ончылныжо осалым ыштеныт: Господь Юмыштым монден, нуно Ваал-влаклан да Ашера меҥге-влаклан вуйыштым савеныт.8 Господьын Израильлан шыдыже ылыжын, да Тудо нуным Хусарсафемын, Месопотамий кугыжан, кидышкыже пуэн. Израиль эрге-влак тудлан кандаш ий тарзыланеныт.9 Тунам израиль эрге-влак Господь деч полышым йодын кычкыраш тӱҥалыныт. Господь нунылан утарышым – Гофониилым, Халевын Кеназ шольыжын эргыжым – пуэн. Тудо нуным утарен.10 Гофониил ӱмбалне Господьын Шӱлышыжӧ лийын. Тудо Израильын судьяже лийын да [Хусарсафем ваштареш] кредалаш лектын. Господь Хусарсафемым, Месопотамий кугыжам, тудын кидыш пуэн. Гофониил Хусарсафемым сеҥен,11 да мландыште нылле ий тыныс илыш озаланен. Вара Гофониил, Кеназ эрге, колен.
12 Израиль эрге-влак адакат Господьын шинча ончылныжо осал пашам ышташ тӱҥалыныт. Сандене Господь Эглоным, Моав кугыжам, Израиль деч виянракым ыштен.13 Тудо шкеж деке [чыла] аммон ден амалик-влакым поген да Израиль ӱмбаке сар дене каен, тудым кырен шалатен. Нуно Пальме олам руалтен налыныт.14 Эглонлан, Моав кугыжалан, израиль эрге-влак латкандаш ий тарзыланеныт.15 Израиль эрге-шамыч адакат Господь деч полышым йодын кычкыреныт. Господь нунылан утарышым – Егудым, Иеминий тукым Геран эргыжым – пуэн. Егуд шолагай лийын. Израильтян-влак тудым йозак дене Моав кугыжа Эглон деке колтеныт.16 Егуд шкаланже кынергут кутышан кок могырымат пӱсӧ кердым ыштен да вургем йымаке пурла эрдыж воктеке шылтен.17 Тудо [каен] да Моав кугыжа Эглонлан йозакым пуэн. Эглонжо пеш коя лийын.18 Йозакым пуымеке, Егуд йозакым нумал толшо еҥ-влакым ужатен колтен.19 А шкеже Галгалыште шогалтыме шояк юмо-влак воктене мӧҥгеш савырнен да Эглон деке толын, тудлан каласен: «Кугыжа, мыйын тыланет шолып каласышаш шомакем уло». «Шып лийза!» – кугыжа каласен. Тунам воктеныже лийше чыла еҥ тушеч лектын.20 Егуд тудын деке пурен. Кугыжа шкенжын юалге пӧлемыштыже лийын. Егуд каласен: «[Кугыжа,] мыйын тыланет Юмын шомакше уло». Эглон престолжо гыч кынел шогалын.21 [Кунам тудо шогалын,] Егуд шола кидшым шуялтен, пурла эрдыште кечыше кердыжым налын да Эглонын мӱшкырышкыжӧ керын.22 Кердын кошар ужашыже веле огыл, вурдыжат пӱтынек кояшке пурен йомын. Егуд тудым луктын огыл, керде мучаш туп гыч лектын.23 Пӧлем гыч лекмеке, Егуд шке почешыже омсам петырен, тӱкылен шынден.24 Тудын кайымекше, Эглонын тарзыже-влак толыныт да тӱкылымӧ пӧлем омсам ужыныт. Нуно каласеныт: «Очыни, шке пӧлемыштыже шонданыште шинча».25 Тарзе-влак кужу жап вученыт, но пӧлем омсам нигӧ почын огыл. Сравочым конден, омсам почыныт да ужыныт: озашт кӱвар ӱмбалне колышо кия.26 Нунын юватыл шогымо жапыште Егуд каенат шуктен, [тудын нерген нигӧ шоналтенат огыл]. Тудо шояк юмо-влакым шогалтыме верым эртен каен да Сеирафыш куржын утлен.27 [Израиль мландысе] Ефрем курыклаш толмеке, тудо пучым пуалтен. Израиль эрге-влак курыкла гыч воленыт, нуным Егуд вуйлатен.28 Тудо нунылан каласен: «Мыйын почешем кайыза! Господь [Юмо] моав тушмандам тендан кидыш пуэн!» Нуно тудын почеш каеныт да Иордан гоч Моавыш келын вончымо верлам руалтен налыныт, нигӧлан вончаш пуэн огытыл.29 Тунам израиль эрге-влак лу тӱжем наре моав сарзым пытареныт. Нунышт чыланат таза, виян еҥ лийыныт. Ик еҥат куржын утлен огыл.30 Тыге тиде кечын израильтян-влак Моавым кид йымакышт налыныт. Кандашле ий мландыште тыныс илыш озаланен. [Колымешкыже, Егуд нунын судьяшт лийын.]
31 Тудын деч вара Самегар, Анаф эрге, лийын. Тудо кудшӱдӧ филистим еҥым ӱшкыжым поктымо кошар вуян тоя дене пытарен. Тудат Израильым утарыше лийын.
Глава 3