Выбрать язык
Книги Ветхого Завета
Книги Нового Завета
с русским текстом1 Господьын Суксыжо Галгал гыч Бохимыш [да Вефильыш Израиль тукым еҥ-влак деке] толын да каласен: «[Тыге Господь ойла:] Мый тендам Египет гыч луктынам да кугезе кочада-влаклан [тыланда пуаш] товатлен сӧрымӧ мландыш пуртенам. Мый каласенам: ”Тендан дене ыштыме ойпидышем Мый нигунам ом пудырто.2 А те тиде мландыште илыше-влак дене ушемым ида ыште, [нунын юмыштлан ида кумал, шке ыштыме шояк юмыштым пытарыза,] жертвенникыштым шалатыза”. Но те Мыйым колыштын огыдал. Кузе тыге ыштен кертында?3 Сандене Мый тыге ойлем: [Поктен колташ шонымо еҥ-влакым вес верыш ом наҥгай,] тендан деч поктен ом колто. Нуно тыланда шӧрга, а юмышт тыланда оптыш лийыт».4 Кунам Господьын Суксыжо нине мутлам израиль эрге-влаклан каласен, уло калык кугу йӱкын шорташ тӱҥалын.5 Садланак тиде верым Бохим*а манын лӱмденыт. Тушто нуно Господьлан надырым конденыт.
6 Иисус калыкым колтен, да израиль эрге-влак [кажныже мӧҥгышкыжӧ,] шке мландышкыже оза лийын илаш пӧртылыныт.7 Иисус илыме жапыште да тудын деч вара кодшо израиль кугурак-влакын илымышт жапыште – нуно Господьын Израильлан ыштыме чыла кугу пашажым ужыныт – израиль калык Господьлан служитлен илен.8 Нав эрге Иисус, Господьын тарзыже, шӱдӧ лу ияш колен.9 Тудым шке мландыштыже, Ефрем курыклаште улшо Фамнаф-Сараиште, тоеныт. Тудыжо Гааш курык деч йӱдвелныла верланен.10 Тунам илыше тукым пӱтынек колен, да тудым вес тукым вашталтен. Тиде тукым Господьымат, Тудын Израильлан ыштыме пашаже-влакымат пален огыл.11 Израиль эрге-шамыч Господь ончылно осал пашам ышташ да Ваал-влаклан*б служитлаш тӱҥалыныт.12 Нуно ача-кочаштын Египет гыч лукшо Господь Юмыштым коденыт да вес юмо-влак деке – йыр улшо калык-влакын юмышт деке – савырненыт, нунылан кумалаш тӱҥалыныт да Господьын шыдыжым луктыныт.13 Господьым коден, нуно Ваал ден Астарта-влаклан служитлаш тӱҥалыныт.14 Тунам израильтян-влак ӱмбаке Господьын шыдыже ылыжын. Тудо нуным агыше-шамычын кидышкышт пуэн, нунышт израильтян-влакым агеныт. Господь нуным йыр улшо тушман-шамычын кидышкышт пуэн, израильтян-влак тушманышт ваштареш тетла шоген кертын огытыл.15 Кажне гана, кунам нуно кредалаш лектыныт, Господьын шижтарымыж да товатлен ойлымыж семынак, Тудын кидше нунын ваштареш лийын. Израильтян-влаклан кугу орлыкым чыташышт логалын.16 Господь нунылан судья-шамычым пуэн. Нуно израильтян-влакым агыше-шамычын кидышт деч утареныт.17 Но нуно судья-влакымат колыштын огытыл, а вес юмо-влак почеш яжарланен коштыныт, нунылан кумалыныт, [Господьым шыдештареныт]. Ача-кочаштын коштмо корнышт гыч нуно писын кораҥыныт. Ача-кочашт Господьын кӱштымашыже-влакым шуктен шогеныт, а нуно тыге ыштен огытыл.18 Кунам Господь нунылан судья-влакым шогалтен, судья пелен Тудо Шкежак лийын да судьян илыме чыла кечылаштыже нуным тушманышт деч утарен шоген. Индырыме да шыгыремдыме деч израильтян-влакын йӧсын кычкырымыштым колын, Господь нуным чаманен.19 Но кунам судья колен, нуно адакат тошто пашашт дек пӧртылыныт: вес юмо-влак деке савырнен, нунылан служитлен да кумалын, ача-кочашт деч эшеат удам ыштеныт. Вустыкланыме осал корнышт гыч нуно кораҥын огытыл.
20 Сандене Израиль ӱмбаке Господьын шыдыже ылыжын. Тудо каласен: «Кугезе кочашт дене ыштыме Мыйын ойпидышем тиде калык пудыртен, Мыйым тудо ок колышт.21 Сандене [Нав эрге] Иисус колымо деч вара тышан кодшо ик калыкымат тудын деч поктен ом колто.22 Нуно Израильым тергаш кӱлыт: израильтян-влак ача-кочашт семын Господьын корныж дене кошташ тӱҥалыт але уке?»23 Садлан Господь нине калыкым тышанак коден. Нуным Тудо вигак поктен колтен огыл, Иисусын кидышкыже пуэн огыл улмаш.
*а 2:5 Бохим лӱм «шортшо-влак» манмым ончыкта.
*б 2:11 Ваал – хананей-влакын тӱҥ юмышт. Кажне кундемын шке Ваал юмыжо лийын.
Глава 2