Выбрать язык
Книги Ветхого Завета
Книги Нового Завета
с русским текстом1 Иисус Израильын чыла тукымжым Сихемыш поген. Тудо Израильын кугуракше, онжо, судьяже да вуйлатышыже-влакым шкеж деке ӱжын. Нуно чыланат [Господь] Юмо ончыко шогалыныт.2 Уло калыклан Иисус теве мом каласен:
«Господь, Израильын Юмыжо, тыге ойла: ”Ожно годым тендан кугезе кочада-влак Евфрат эҥер вес велне иленыт да йот юмо-влаклан кумалыныт. Тыге нуно Фарран – Авраам ден Нахорын ачаштын – илыме жапше марте ыштеныт.3 Но Мый тендан Авраам ачадам эҥер вес вечын налынам да пӱтынь Ханаан мланде мучко вӱден коштыктенам, тукымжым шукемденам. Мый тудлан Исаак эргым пуэнам,4 а Исааклан – Иаков ден Исавым. Исавлан Мый Сеир курыклам пуэнам. А Иаков шке эргыже-влак дене Египетыш куснен, [тушто нуно кугу, виян да шуко еҥан калыкыш савырненыт. Нуным египтян-влак шыгыремдылаш тӱҥалыныт].5 Мый Моисей ден Аароным колтенам. Египет ӱмбак тӱрлӧ орлыкым колтен, тудым чуриктаренам да тендам тушечын луктынам.6 Мый кугезе кочада-влакым Египет гыч луктынам, да калыкда [Йошкар] теҥыз деке толын. Египтян-шамыч тунам кугезыда-влакым сарлык орва да имне дене Йошкар теҥыз марте поктен толыныт.7 Но нуно Господьым ӱжын кычкыреныт, да Тудо тендам египтян-влак деч пыл да пычкемыш дене ойырен. Господь ӱмбакышт теҥыз вӱдым савырен, да тудыжо нуным леведын. Египтян-влак дене мом ыштымем те шке шинчада дене ужында. Тидын деч вара те шуко жап ир мландыште лийында.
8 Мый тендам Иордан вес велне илыше аморрей-влакын мландышкышт конденам. Нуно тендан дене кредалыныт, но Мый нуным тендан кидыш пуэнам. Мый нуным шинчада ончылно пытаренам, да те нунын мландыштым поген налында.9 Моав кугыжа Валак, Сепфор эрге, сар дене Израиль ӱмбак тарванен. Тендам каргаш тудо Валаамым, Веор эргым, ӱжын.10 Но Мыйын Валаамым колыштмем шуын огыл, да тудо тендам угыч да угыч суапландарен. Мый тендам тудын кидше деч утаренам.11 Иорданым вончен, те Иерихон деке толында. Иерихонышто илыше-влак, тыгак аморрей, ферезей, хананей, хеттей, гергесей, евей да иевусей-влак тендан дене кредалыныт, но нуным Мый тендан кидыш пуэнам.12 Мый тендан ончыч лопшаҥге-влакым колтенам, нуно тендан деч кок аморрей кугыжам поктен колтеныт. Тидым те керде да пикш полшымо дене ыштен огыдал.13 Тыланда Мый мландым пуэнам – тудым те куклен огыдал, ола-влакым – нуным те чоҥен огыдал. Кызыт те нине олаште иледа. Те виноград аҥа ден олив пушеҥге гыч саскам кочкыда, но нуным те шынден огыдал”.
14 Тыгеракын, Господь деч лӱдын илыза, Тудлан уло шӱм-чон дене ӱшанлын служитлыза. Кугезе кочада-влакын Евфрат эҥер вес велне да Египетыште служитлыме юмышт деч кораҥза да Господьлан служитлыза.15 Господьлан ынеда служитле гын, кӧлан служитлаш – кызыт ойырен налза. Кочада-влакын эҥер вес велне служитлыме юмыштлан? Але кызыт илыме мландыдан ончычсо озаштын, аморрей-влакын, юмыштлан? А мый да мыйын тукымем Господьлан служитлаш тӱҥалына, [вет Тудо святой]».
16 Калык вашештен: «Уке, Господьым коден, ме вес юмо-влаклан служитлаш огына тӱҥал!17 Вет Господь – мемнан Юмына, Тудо мемнам да ача-кочана-влакым Египет гыч, кул лийме вер гыч, луктын. Тудо мемнан шинчана ончылно палдарыше пале-влакым ыштен. Тудо коштмо корныштына чыла калык деч, кӧн мландышт гоч каенна, арален шоген.18 Господь мемнан ончыч чыла калыкым да тиде мландыште илыше аморрей-влакым поктен колтен. Сандене меат Господьлан служитлаш тӱҥалына, вет Тудо – мемнан Юмына».
19 Иисус калыклан каласен: «Те Господь [Юмылан] служитлен огыда керт. Тудо – святой Юмо, вес юмо-влаклан кумалмым Тудо ок турко, титак ден сулыкдам чыташ ок тӱҥал.20 Тыланда порым ыштыше Господьым коден, вес юмо-влаклан служитлаш тӱҥалыда гын, Тудо ваштарешда савырна да тендан ӱмбак туткарым конда, тендам пытара».21 Калык Иисуслан каласен: «Уке, ме Господьлан служитлаш тӱҥалына».22 «Господьлан служитлымым ойырен налмыланда те шкежак танык лийыда», – каласен Иисус. «Танык улына», – вашештеныт нуно.23 «Тугеже тендан дене улшо йот юмыда-влакым кудалтыза да шке шӱмдам Господь деке, Израильын Юмыж деке, савырыза», – каласен Иисус.24 Калык Иисуслан вашештен: «Ме шке Господь Юмыланна служитлаш, Тудын мутшым колышташ тӱҥалына».
25 Тиде кечын Иисус уло калыкын лӱмжӧ дене ойпидышым ыштен. Сихемыште [Израильын Господь Юмыжын скинийже ончылно] тудо калыклан пунчал ден устав-влакым пуэн.26 Нуным Иисус Юмын закон книгашкыже возен шынден. Вара кугу кӱм налын да тудым Господьын святой верже воктене улшо тумо йымак шогалтен.27 Иисус уло калыклан ойлен: «Тиде кӱ мыланна танык лиеш, вет тудо Господьын [таче] мыланна чыла мом ойлымыжым колын. [Господь] Юмыдам ида ондале манын, тудо [ончыкшым] тендан ваштареш танык лиеш».28 Вара Иисус калыкым колтен, да кажныже шке мландышкыже каен.
29 Тидын деч вара Нав эрге Иисус, Господьын тарзыже, колен. Тудо шӱдӧ лу ияш лийын.30 Тудым шке мландыштыже, Ефрем курыклаште улшо Фамнаф-Сараиште, тоеныт. Тудыжо Гааш курык деч йӱдвелныла верланен. [Тудын дене пырля шӱгарышке кӱ кӱзӧ-влакым пыштеныт. Израиль эрге-влакым Египет гыч лукмеке, Господьын кӱштымыж семынак, нунын дене Иисус Галгалыште пӱчмӧ йӱлам эртарен улмаш. Кӱзӧ-влак таче кечынат туштак улыт.]31 Иисус илыме жапыште да тудын деч вара кодшо израиль кугурак-влакын илымышт жапыште – нуно Господьын Израильлан ыштыме чыла пашажым ужыныт – Израиль Господьлан служитлен илен.
32 Иосифын лулегыжым, кудым израиль эрге-влак Египет гыч луктыныт, Сихемеш тоеныт. Иаков тиде мландым Емморын, Сихемын ачажын, эргыж-влак деч шӱдӧ ший оксалан налын улмаш, да тиде мланде Иосиф эрге-влаклан логалын.
33 [Тидын деч вара] Елеазарат, [кугу иерей] Ааронын эргыже, колен. Тудым Финеес эргыжлан пуымо Ефрем курыкласе Гиваште тоеныт.
34 [Тиде кечылаште израиль эрге-влак Юмын шондыкшым пеленышт нумалыныт. Елеазар ачаж олмеш иерейлан Финеес шогалын. Тудо тиде сомылым колымешкыже, шке Гива олаштыже тойымо лиймешкыже, шуктен шоген.35 Вара израиль эрге-влак кажныже шке кундемышкыже, шке олашкыже каеныт.36 Но варажым израиль эрге-влак Астарта ден Астарофлан, тыгак воктене илыше калык-влакын юмыштлан служитлаш тӱҥалыныт. Господь нуным Моав кугыжа Эглонын кидышкыже пуэн. Тудо израильтян-влак дене латкандаш ий озаланен.]
Глава 24