Выбрать язык
Книги Ветхого Завета
Книги Нового Завета
с русским текстом1 Господь [Юмын] Израильлан тушман-влак деч чыла велымат тыныслыкым пуымыж деч вара шуко жап эртен. Иисус шоҥгемын, пеш кугу ийготан лийын.2 Тудо чыла израиль [эрге-влакым] – калык кугурак, он, судья да вуйлатыше-влакым – шкеж деке ӱжын да нунылан каласен: «Мый ынде шоҥгемынам, пеш кугу ийготан улам.3 Господь Юмыдан тендан ончылно чыла нине калык дене мом ыштымыжым те ужында. Господь Юмыда Шкежак тендан верч кредалын.4 Эше тыштак кодшо калык-влакын мландыштым, тыгак мыйын кырен шалатыме калык-влакын мландыштым, Иордан деч касвелне улшо Кугу теҥыз марте, мый тыланда тукым еда шерева почеш пайлен пуэнам.5 Господь Юмыда нине калыкым тендан деч Шкежак поктен колта. [Тендан чурийда ончыч нине калыкым да нунын кугыжаштым пытараш манын, Тудо ӱмбакышт ир янлык-влакым колта. Нуно чыланат колен пытат.] Господь Юмыдан каласымыж семынак, нунын мландыштын озашт лийза манын, Господь нуным тендан ончыч пӱтынек пытара.6 Пеҥгыде лийза, Моисейын закон книгаштыже чыла возымым шуктен шогыза, тудын деч пурлашкат, шолашкат ида кораҥ.7 Тендан коклаште кодшо нине калык дене ида варналт, нунын юмыштын лӱмышт умшада гыч ынже лек, нунын дене ида товатле, нунылан ида служитле да ида кумал,8 но кузе Господь Юмыланда таче кече марте ӱшанле лийында, умбакыжат тыгаяк кодса.
9 Тендан чурийда ончыч Господь кугу да виян калык-влакым поктен колтен, тачысе кече марте ваштарешда нигӧ шоген кертын огыл.10 Тендан кокла гыч ик еҥ тӱжемым поктен колта, вет Господь Юмыда Шкежак тендан верч кредалеш – тыге Тудо тыланда сӧрен.11 Сандене лач Господьым, шке Юмыдам, йӧратен илыза.12 Но те Юмо деч кораҥыда да тендан коклаште кодшо нине калык дене ушнеда, икте-весыда деке коштын, нунын дене родо лийыда гын,13 пален лийза: Господь Юмыда тендан деч нине калыкым тетла поктен ок колто. Господь Юмыдан пуымо тиде сай мландыж гыч пытен йоммешкыда, нуно тыланда шӧрга да оптыш, тупланда лупш да шинчаланда име лийыт.
14 Вашке мый ты тӱня гыч каем – тиде корным кажныжлан эртыман. А те сайын паледа: мом тыланда Господь Юмыда сӧрен, чылажат шукталтын. Чылажат тыгак лийын, ик мутат шукталтде кодын огыл.15 Но кузе Господь Юмыдан тыланда порым сӧрымыжӧ чыла шукталтын, тугак осалым сӧрымыжат шукталт кертеш – тыланда пуымо сай мландыштыже Тудо тендам пытара.16 Те Господь Юмыдан тендан дене ыштыме ойпидышыжым огыда шукто, вес юмо-влаклан служитлаш да кумалаш тӱҥалыда гын, тендан ӱмбаке Господьын шыдыже ылыжеш, да [Господьын] тыланда пуымо сай мландыж гыч те пытарыме лийыда».
Глава 23