Выбрать язык
Книги Ветхого Завета
Книги Нового Завета
с русским текстом1 Теве кугыжа-влак, кудыштым израиль эрге-шамыч сеҥеныт да мландыштым шкаланышт руалтен налыныт. Нунын мландышт Иордан деч эрвелкыла, Арнон эҥер деч Ермон курык марте шуйненыт, тушко тыгак Иордан тӧрверын пӱтынь эрвел ужашыже пурен.
2 Икымше кугыжа – Сигон, Есевонышто илыше аморрей кугыжа. Тудын мландыже Арнон эҥер серыште верланыше Ароер деч тӱҥалын, лапверын покшел ужашыж гыч Иавок изэҥер – аммон-влакын чекышт – марте шуйнен, тидыже Галаадын пел ужашыже лийын.3 Сигон тыгак Иордан лапверыште – Киннереф теҥызын эрвел могыржо гыч тӧрверысе Шинчалан теҥыз марте, эрвелкыла Беф-Иешимоф да кечывалвелке Фасга курык тайыл марте – кугыжаланен.
4 Вес кугыжа – Ог, Васан кугыжа, пытартыш рефаим-влак кокла гыч иктыже. Тудо Аштарофышто да Едрейыште илен.5 Ермон курык, Салха, тыгак пӱтынь Васан мланде Гесур ден Маахан чекше марте, эше Галаадын пел ужашыже Есевон кугыжа Сигонын чекше марте тудын мландышкыже пуреныт.
6 Господьын Моисей тарзыже да израиль эрге-влак тиде кок кугыжам кырен шалатеныт. Моисей нунын мландыштым Рувим ден Гад тукымлан да Манассийын пел тукымжылан оза лийын илашышт пуэн.
7 А теве [аморрей] мландын кугыжаже-влак, нуным Иисус ден израиль эрге-влак Иордан деч касвелныла – Ливан лапверысе Ваал-Гад гыч Сеир декла нӧлталтше Халак курык марте – кырен шалатеныт. Чыла тиде мландым Иисус израиль тукым-влаклан оза лийын илашышт шеледен пуэн.8 Тиде – курыкла, лоп вер-влак, Иордан лапвер, курыкйол-влак, ир мланде, Кечывалвел мланде. Тушто ондак хеттей, аморрей, хананей, ферезей, евей да иевусей-влак иленыт.9 Иерихонын кугыжаже – икте, Вефиль воктенысе Гайын кугыжаже – икте,10 Иерусалимын кугыжаже – икте, Хевронын кугыжаже – икте,11 Иармуфын кугыжаже – икте, Лахисын кугыжаже – икте,12 Эглонын кугыжаже – икте, Газерын кугыжаже – икте,13 Давирын кугыжаже – икте, Гадерын кугыжаже – икте,14 Хорман кугыжаже – икте, Арадын кугыжаже – икте,15 Ливнан кугыжаже – икте, Одолламын кугыжаже – икте,16 Македан кугыжаже – икте, Вефильын кугыжаже – икте,17 Таппуахын кугыжаже – икте, Хеферын кугыжаже – икте.18 Афекын кугыжаже – икте, Шаронын кугыжаже – икте,19 Мадонын кугыжаже – икте, Асорын кугыжаже – икте,20 Шимрон-Меронын кугыжаже – икте, Ахсафын кугыжаже – икте,21 Фаанахын кугыжаже – икте, Мегиддон кугыжаже – икте,22 Кедесын кугыжаже – икте, Кармил воктенысе Иокнеамын кугыжаже – икте,23 Нафаф-Дор воктенысе Дорын кугыжаже – икте, Галгалысе Гоимын кугыжаже – икте,24 Фирцан кугыжаже – икте. Чылаже – кумло ик кугыжа.
Глава 12