Выбрать язык
Книги Ветхого Завета
Книги Нового Завета
с русским текстом1 Иисус, Нав эрге, Ситтим гыч шолып ончен коштшо кок еҥым колтен, нунылан тыге каласен: «Кайыза, тиде мландым да Иерихон олам ончен лекса». [Кок самырык пӧръеҥ] каен, [Иерихоныш] толын. Тушто нуно Раав лӱман яжар ӱдырамашын пӧртышкыжӧ [пуреныт] да тушан малаш кодыныт.2 Иерихон кугыжалан каласеныт: «Тиде йӱдым израиль калык кокла гыч ала-могай еҥ-влак мландынам ончен лекташ толыныт».3 Иерихон кугыжа Раав деке еҥ-влакым тыге каласаш колтен: «Тый декет толшо, [йӱдым] пӧртышкет пурышо еҥ-влакым пу. Нуно тиде мландым ончен лекташ толыныт».4 Но ӱдырамаш нине кок еҥым шылтен. Тудо каласен: «Ала-могай пӧръеҥ-влак чынжымак толыныт ыле, но мый нунын кушеч улмыштым пален омыл.5 Пычкемышалтмеке, кунам ола капкам петыраш жап шуын, нуно каеныт. Куш каеныт, мый ом пале. Кайыза вашкерак почешышт, те нуным эше поктен шуыда».6 А кок пӧръеҥым тудо леведыш ӱмбаке наҥгаен да тушто шарен оптымо йытын кылта-влак йымаке шылтен улмаш.
7 Кугыжан колтымо еҥже-влак Иордан деке наҥгайыше корно дене эҥер вончымо вер марте поктен каеныт. Нунын ола гыч лекмекышт, капкам тунамак петыреныт.8 Ончаш колтымо еҥ-влакын малаш вочмышт деч ончыч Раав нунын деке леведыш ӱмбаке кӱзен9 да каласен: «Мый палем: Господь тиде мландым тыланда пуэн. Ме тендан деч пеш чот лӱдына. Тиде мландыште илыше-влак чыланат тендан деч чытырат.10 Египет гыч толмыда годым Господь [Юмын] тендан ончылно Йошкар теҥызым коштымыж нерген ме колын улына. Иордан вес велысе кок аморрей кугыжа денат, Сигон да Ог дене, мом ыштымыдам колынна. Нуным те, Господьлан надыр шотеш пӧлеклен, пӱтынек пытаренда.11 Кунам ме тидын нерген колынна, шӱмна лӱдын кӱлткаш тӱҥалын – [мемнан кокла гыч] нигӧ тендан ваштареш шогаш ок тошт. Вет тендан Господь Юмыда – кӱшнӧ каваште да ӱлнӧ мландыште озаланыше Юмо.12 Мылам Господь [Юмыда] дене товатлыза: кузе мый тыланда порым ыштенам, теат мыйын ешемлан тыгак порым ыштеда. Тыланда ӱшанаш лиймым иктаж-могай пале дене пеҥгыдемдыза.13 Те ачам ден авам, иза-шольым, ака-шӱжарем да нунын ешыштым илышым кодыза, мемнан чоннам колымаш деч утарыза».14 Нине еҥ-влак каласеныт: «Те [кызыт] мемнан нерген нигӧлан ода каласе гын, тендан илышланда ме вуйын шогаш тӱҥалына. Кунам Господь тиде мландым мыланна пуа, ме тый декет поро да ӱшанле лийына».
15 Раав нуным окна гыч кандыра дене волтен, вет тудын пӧртшӧ ола пырдыжыште лийын.16 Ӱдырамаш нунылан каласен: «Поктышо-влак тендам ынышт вашлий манын, курыклаш кайыза. Нунын пӧртылмешкышт, тушто кум кече шылын шинчыза, вара шке корныда дене ошкылза».17 Ончаш толшо-влак тудлан каласеныт: «Ойлымына семын от ыште гын, тыланет пуымо товатмут деч ме эрыкан лийына. Теве мом тый ыштышаш улат:18 кунам ме тиде мландыш толына, мемнам волтен колтымо окна деке йошкар кандырам кылден шынде. Пӧртышкет ачат ден аватым, иза-шольыч-влакым – ачатын уло ешыжым – пого.19 Пӧртет гыч иктаж-кӧ тӱжваке лектеш гын, колымыжлан шке титакан лиеш – ме тунам [тылат товатлыме деч] эрыкан лийына. А пӧртыштет тый денет пырля улшо иктаж еҥым тӱкат гын, титак мемнан ӱмбалне лиеш.20 Но [иктаж-кӧ мемнам тӱка але] тый мемнан нерген луктын каласет гын, тыланет пуымо товатмут деч ме эрыкан лийына».21 Раав вашештен: «Тек каласымыда семынак лиеш!» Тудо нуным колтен, да пӧръеҥ-влак каеныт, а Раав окнашкыже йошкар кандырам кылден шынден.
22 Ончаш колтымо еҥ-влак курыклашке каеныт да, нуным поктышо-влакын пӧртылмешкышт, тушто кум кече лийыныт. Поктышо-влак нуным пӱтынь кундем мучко кычалыныт, но муын огытыл.23 Тидын деч вара нине кок еҥ мӧҥгеш каеныт. Нуно курык гыч воленыт, Иорданым вонченыт да Нав эрге Иисус деке толыныт, тудлан мо лиймым чыла каласкаленыт.24 «Господь [Юмына] пӱтынь тиде мландым мемнан кидыш пуэн, – каласеныт нуно. – Тушто илыше-влак мемнан деч лӱдын илат».
Глава 2