Выбрать язык
Книги Ветхого Завета
Книги Нового Завета
с русским текстом1 Господьын Моисей тарзыже колымеке, Нав эрге Иисуслан, Моисейын полышкалышыжлан, Господь теве мом каласен:2 «Мыйын Моисей тарзем колен. Тарване, тиде калыкым Иордан гоч вончыктарен, Мыйын израиль эрге-влаклан пуымо мландышкем наҥгае.3 Кушко тендан йолда тошкалеш – кажне кундемым Мый тыланда пуэм. Тыге Мый Моисейлан сӧренам.4 Тудо ир мланде ден Ливан гыч кугу Евфрат эҥер марте – тиде хеттей-влакын пӱтынь мландышт – да касвелне улшо кугу теҥыз марте шуйнаш тӱҥалеш.5 Чыла илыме кечылаштет тыйын ваштареш нигӧат шоген ок сеҥе. Кузе Мый Моисей дене лийынам, тугак тыйын пеленат лиям: тый дечет ом кораҥ, тыйым коден ом кай.6 Пеҥгыде да лӱддымӧ лий, вет тиде калыклан мландым тый пайлен пуэт. Тудым Мый, эше ача-кочаштлан товатлен, нунылан пуаш сӧренам.7 Пеҥгыде лий, нимо деч ит лӱд. Моисей тарземын тылат пуымо уло законым тыршен шукто, тудын деч пурлашкат, шолашкат ит кораҥ – тунам чыла тӱҥалме пашат ушнен толеш.8 Тек закон книгасе шомак-влак эре йылмыштет лийыт. Тушто мо возымым тӱрыснек шуктен шогаш манын, нунын нерген йӱд-кече шонкале. Тунам илышет ворана, чылажымат тый шот дене ышташ тӱҥалат.9 Тыгеракын, Мый тыланет кӱштен ойлем: пеҥгыде да патыр лий, ит аптыране, ит лӱд. Вет кеч-кушко кает гынат, тыйын Господь Юмет пеленет лиеш».
10 Иисус калык вуйлатыше-влаклан кӱштен каласен:11 «Стан мучко эртыза да калыклан каласыза: ”Корнылан кочкышым ямдылыза. Господьын, [ача-кочадан] Юмыжын, тыланда пуымо мландыжым сеҥен налаш манын, кум кече гыч те Иордан вес велке вончеда”».
12 А Рувим ден Гад тукым-влаклан да Манассийын пел тукымжылан Иисус тыге каласен:13 «Шарналтыза, мом тыланда Господьын Моисей тарзыже ойлен: ”Господь Юмыда тыланда тыныс илышым пуа да тиде мландым пӧлекла”.14 Тек тендан ватыда, йочада да вольыкда Моисейын пуымо Иордан ты велысе мландеш кодыт. А те, кредал кертше пӧръеҥ-влак, саргуралым кидыш налын, иза-шольыда-влак ончылно кайыза, нунылан полшыза.15 Господь [Юмыдан] тыланда пуымо семын нуныланат тынысле илышым да оза лийын илашышт мландым пуымешкыже, нунын дене пырля лийза. Тидын деч вара те Господьын Моисей тарзыжын тыланда пуымо мландышкыже пӧртылын да тушто илаш тӱҥалын кертыда. Вет Иордан деч эрвелныла улшо тиде мландым тудо тыланда пуэн».16 Нунышт Иисуслан вашештеныт: «Чыла кӱштыметым шуктена, куш мемнам колтет – тушко каена.17 Кузе Моисейым колыштмо, тыгак тыйымат колышташ тӱҥалына – Господь гына, тыйын Юмет, Моисей дене лийме семынак пеленет лийже.18 Тыйын мутетым колыштдымо, кеч-могай кӱштымет ваштареш шогалше кажне еҥ пуштмо лиеш. Лач пеҥгыде да лӱддымӧ лий!»
Глава 1