Выбрать язык
Книги Ветхого Завета
Книги Нового Завета
с русским текстом1 Тыгеракын, Господь Юмыдам йӧратыза, Тудын мом кӱштымыжым – пунчалже, уставше да сугыньжо-влакым – эре шуктен шогыза.2 Шарналтыза кызыт – йочада-влак огыл, а те шкежак чыла тидым ужында: Господь Юмыдан пеҥгыдын туныктымыжым, Тудын кугу улмыжым, нӧлталме виян кидшым,3 Египетыште фараон дене – Египет кугыжа дене – да тудын пӱтынь мландыж дене ыштыме палдарыше пале ден пашаже-влакым,4 Египетын сарзывийже дене, нунын имньышт да сарлык орвашт дене Господьын мом ыштымыжым. Вет кунам нуно тендам поктен толыныт, Тудо нуным Йошкар теҥыз вӱд йымак эрелан пуртен колтен да пытарен.5 Те ужында, мом Господь тыланда тиде верыш толмешкыда ир мландыште ыштен,6 мом Тудо Дафан да Авирон дене – Рувим тукым гыч улшо Елиавын эргышт дене – ыштен. Тунам мланде умшажым почын да уло Израиль кокла гыч нине еҥ-влакым, нунын ешыштым, омашыштым, чыла погыштым нелын.7 Господьын ыштыме чыла тиде кугу пашажым те шке шинча дене ужында.
8 Тугеже, мыйын таче тыланда ойлымо Тудын чыла кӱштымашыжым шуктен шогыза. Тунам те [илаш тӱҥалыда,] виян лийыда да, Иордан вес велке вончен, тусо мландым сеҥен налыда.9 Шӧр да мӱй йогыман ты мландыште, кудым Господь тендан ача-кочада-влаклан да нунын ончыкылык тукымыштлан пуаш товатлен сӧрен, те кужун илаш тӱҥалыда.
10 Налаш кайыме мландыда Египет гай огыл, кушечынже те лектында. Тушто те, пырчым ӱдымеке, пакчаште тыршыме семын мландым шке вий дене вӱдыжтаренда.11 А тендан налаш кайыме мландыда тыгай огыл: курыкан, лапверан тиде кундемым кава гыч йӱр вӱдыжтара.12 Тиде мланде верч Господь, тендан Юмыда, азаплана – идалык мучко Господьын шинчаончалтышыже тиде мланде ӱмбак виктарыме лиеш.
13 ”Таче тыланда пуымо Мыйын кӱштымаш-влакем колышташ, Господь Юмыдам йӧраташ, уло шӱмда дене да уло чонда дене Тудлан служитлаш тӱҥалыда гын,14 Мый тендан мландышке йӱрым – шошо да шыже йӱрым – шке жапыштыже колтем, да тендан шурныда, йошкар арака ден олив ӱйда ситышын лийыт.15 Кӱтымӧ верлаште вольыкланда шудым пуэм, теат теммешкыда кочкаш тӱҥалыда”.
16 Шекланыза, шкендам алгаштараш ида пу – чын корно гыч кораҥын, вес юмо-влаклан служитлаш да нунылан кумалаш ида тӱҥал.17 Тыге лиеш гын, Господь тыланда шыдешка да кавам петыра. Тунам йӱр ок лий, мланде лектышым ок пу, да Господьын тыланда пуымо сай мландыж гыч те писын йомын пытеда.
18 Нине кӱштымаш-влакым шӱм-чонышкыда пыштыза, пале семын нуным кидышкыда кылдыза, тек нуно саҥгаштыда пидыш семын лийыт.19 Мӧҥгыштӧ шинчыме годым, корнышто кайыме годым, малаш вочмо да кынелме годым, нунын нерген ойлен, шочшыда-влакым туныктыза.20 Нине кӱштымаш-влакым пӧртдан омса янакешыже да оладан капкашкыже возен шындыза.21 Тунам Господьын кугезе кочаланда пуаш товатлыме мландыштыже тендан да ончыкылык тукымда-влакын илышаш кечыда кужун шуйна. Мыняр жап мланде ӱмбалне кава лиеш, те тынар илаш тӱҥалыда.
22 Те мыйын тыланда пуымо чыла кӱштымашым шуктен шогаш, Господь Юмыдам йӧраташ, Тудын корныж дене кошташ тӱҥалыда да Тудлан ӱшанле лийыда гын,23 Господь чыла нине калыкым тендан ончыч поктен колта, да те шкендан деч шукырак да виянрак вес калык-влакын мландыштым поген налыда.24 Кеч-могай вершӧр, кушко йолда шогалеш – тендан лиеш. Ир мланде деч Ливан курык марте, Евфрат эҥер деч Касвел теҥыз марте мланде тендан лиеш.25 Нигӧ тендан ваштареш шоген ок керт. Могай гына мландыш огыда тошкал, тушто Господь Юмыда, шке сӧрымыж семынак, тендан деч ончыч лӱдмаш ден чытырымашым колта.
26 Те таче суапландарымашым але каргымашым ойырен налын кертыда.27 Мый таче тыланда Господь Юмыдан кӱштымашыже-влакым пуэнам. Те нуным шуктен шогаш тӱҥалыда гын, тыланда суапландарымаш лиеш.28 А Господь Юмыдан кӱштымыжым огыда колышт да, таче мыйын каяш кӱштымӧ корно деч кораҥын, тыланда палыдыме вес юмо-влак почеш каеда гын, тендам каргымаш вуча.
29 Кунам Господь Юмыда тендам сеҥен налаш кайыме мландышкыда пурта, те суапландарымашым Гаризим курыкышто, а каргымашым Гевал курыкышто увертарен каласыза.30 Нине курык Иордан вес велне, тӧрверыште илыше хананей-влакын мландыштышт, касвел корно вес могырышто, Морэ тумер деч тораште огыл, Галгал ола лишне улыт.
31 Господь Юмыдан тыланда [эрелан] пуышаш мландыжым сеҥен налаш манын, те кызыт Иордан эҥерым вончаш тӱҥалыда. Кунам те тиде мландым налыда да тушто илаш тӱҥалыда,32 мыйын таче тыланда пуымо [Тудын] чыла пунчал ден уставше-влакым шуктен шогыза.
Глава 11