Выбрать язык
Книги Ветхого Завета
Книги Нового Завета
с русским текстом1 Тунам мылам Господь каласен: ”Ончычсо гай кок кӱоҥам руэн лук да Мый декем курыкыш кӱзӧ. Эше пу шондыкым ыште.2 Шалатыме кок кӱоҥаштет возымо мут-влакымак Мый нине оҥашке угыч возем. Вара тый нуным шондыкыш пыште”.3 Мый акаций пушеҥге дене шондыкым ыштышым, вара ончычсо гаяк кок кӱоҥам руэн луктым да курыкыш кӱзышым. Кидыштем кок кӱоҥа лийын.4 Господь нине кӱоҥаш икымше кӱоҥалаште лийше шомак-влакымак – лу кӱштымашым – возыш. Нуным Тудо тыланда погынымаш кечын курыкышто тул лоҥга гыч увертарен ыле. Вара кӱоҥа-влакым Господь мыланем пуыш.5 Мый савырнышым да курык гыч волышым. Господьын кӱштымыж семынак, кӱоҥа-влакым шке ыштыме шондыкышкем пыштышым. Нуно кызытат туштак улыт.
6 Бероф-Бене-Яаканым коден, израиль эрге-влак Мозерыш каеныт. Тушто Аарон колен, тудым тушан тоеныт. Аарон олмеш иерейлан тудын Елеазар эргыже шогалын.7 Тушечын нуно Гудгодыш, Гудгод гыч Иотвафаш, шуко изэҥеран мландыш, каеныт.
8 Тунам Господь Левий тукымым посна ойырен. Нунылан Господь шке ойпидыш шондыкшым нумалаш, Господь ончылно шогаш, Тудлан служитлаш [да кумалаш], Господьын лӱмжӧ дене суапландараш ӱшанен. Нуно таче мартеат тиде сомылым шуктен толыт.9 Теве молан левит-влакын шке иза-шольышт коклаште мланде пайышт уке. Нунын ужашышт – Господь Шкеже. Тыге нунылан тендан Господь Юмыда ойлен.
10 Курыкышто мый ончычсо семынак нылле кече да нылле йӱд лийым. Господь мыйым ты ганат колышто да тендам пытараш шонымыжым вашталтыш.11 Господь мылам каласыш: ”Кынел да [тиде] калык ончыч кай. Тек нуно каят да Мыйын, ача-кочаштланак товатлен, нунылан пуаш сӧрымӧ мландым сеҥен налыт”.
12 Тыгеракын, Израиль, мом тый дечет Господь, тыйын Юмет, йодеш? Теве мом: Господь Юмет деч лӱдаш, Тудын корныж дене кошташ, Тудым йӧраташ, Господь Юметлан уло шӱмет дене, уло чонет дене служитлаш,13 Господь [Юметын] таче тылат мыйын гоч пуымо кӱштымаш ден пунчалже-влакым шуктен шогаш. Тунам тый денет чылажат сай лиеш.
14 Кава да эн кӱшыл кава-влак, мланде да тушто мо уло – тиде чылажат Господьын, тыйын Юметын.15 Но чыла калык кокла гыч Господь лач тендан кугезыда-влаклан посна йӧратымашым ончыктен да тендам, нунын деч варасе тукым-влакым, ойырен налын. Тидым ме кызыт шкеак ужына.16 Шке шӱмда дене пӱчмӧ йӱлам эртарыза, тетла ида ӱскыртлане,17 вет Господь Юмыда – юмо-влакын Юмышт, озаланыше-влакын Озашт. Тудо – кугу, куатан да лӱдмашым лукшо. Тудо чыла еҥым ойыркалыде ик семын онча да взяткым ок нал.18 Господь тулык йоча ден тулык ватылан чын судым ышта, йотъеҥым йӧрата, тудлан кочкыш ден вургемым пуа.19 Теат йотъеҥ-влакым йӧратыза, вет шкежат Египет мландыште йотъеҥ лийында.
20 Господь Юмыда деч лӱдса, Тудлан [иктылан гына] служитлыза. Тудлан ӱшанле лийза да Тудын лӱмжӧ дене товатлыза.21 Тудо – тендан Юмыда, Тудым те чапландарышаш улыда. Тыланда кӧра Тудо лӱдмашым лукшо кугу паша-влакым ыштен, нуным те шке шинча дене ужында.22 Тендан кугезе кочада-влак Египетыш шымле [вич] еҥ толыныт. А кызыт Господь Юмыда тендам кавасе шӱдыр наре шуко еҥан калыкым ыштен.
Глава 10