Выбрать язык
Книги Ветхого Завета
Книги Нового Завета
с русским текстом1 Вара ме Господьын мыланем ойлымыж семынак савырнышна да Йошкар теҥыз дек наҥгайыше корно дене ир мландыш кайышна. Сеир курык воктене ме шуко пӧрдна.2 Господь мыланем каласыш:3 ”Сита тиде курык воктене пӧрдаш, йӱдвеке савырнен кайыза.4 Калыклан ойло: те Сеирыште илыше иза-шольыдан, Исав эрге-влакын, мландышт гоч эртен каяш тӱҥалыда. Кеч нуно тендан деч лӱдыт, шкендам кучыза,5 кредалаш ида пиж – нунын мландышт гыч тыланда йолгопа лопкытымат ом пу, вет Сеир курыкым Мый Исавлан пуэнам.6 Кочкыш ден вӱдлан те нунылан ший дене тӱлышаш улыда.7 Господь Юмыда тендам чыла пашаштыдат суапландарен, тиде кугу [да лӱдыкшӧ] ир мландыште коштмыда годым арален шоген. Чыла тиде нылле ий Господь Юмыда тендан дене пырля лийын, тыланда мо кӱлешым чыла пуэн”.
8 Тыге ме Сеирыште илыше Исав тукым иза-шольына-влак воктеч эртен кайышна. Вара Елаф ден Ецион-Гавер деч кайыше тӧрвер корно дене Моав ир мландыш савырнышна.
9 Господь мыланем каласыш: ”Моав калыкым тушманеш ида уж, тудын дене кредалаш ида тӱҥал. Нунын мландышт гыч Мый тыланда нимомат ом пу, вет Ар кундемым Мый Лот эрге-влаклан пуэнам”.
10 Ончыч тушто эмим-влак иленыт улмаш. Тиде калык шуко еҥан, виян да енак-влак гаяк кугу капан лийын.11 Енак-влак семынак нуным рефаим калыклан шотленыт. Но моав-влак нуным эмим манын лӱмденыт.12 А Сеирыште ондак хоррей-влак иленыт. Но Исавын тукымжо-влак мландыштым поген налыныт, нуным кырен шалатеныт да тушан верланеныт. Израиль калыкат Господьын тудлан пуымо мландысе калык дене тыгак ыштен.
13 Господь каласен: ”Ынде тарваныза да Заред лапвер гоч кайыза”. Ме Заред лапверым вончен кайышна.14 Мемнан Кадес-Варним коден кайыме жап гыч Заред лапверым вончымо марте кумло кандаш ий эртен. Тиде жаплан ончычсо тукым сарзе-влак деч нигӧат кодын огыл – тыге лиеш манын, Господь товатлен ойлен.15 Господь шке кидшым нунын ваштареш савырен да икте кодде пытарен.
16 Калык кокла гыч нине сарзе-влак колен пытымеке,17 Господь мыланем каласен:18 ”Таче те моав мландысе Ар воктеч эртен каеда.19 Аммон-влак деке лишеммеке, нуным тушманеш ида уж, кредалаш ида пиж, вет нунын мландышт гыч Мый тыланда нимомат ом пу. Тиде мландым Мый Лотын тукымжылан пуэнам”.
20 Тиде кундемат рефаим-влакын мландыштлан шотлалтын. Ондак тыште рефаим-влак иленыт, аммон-шамыч гын нуным замзумим манын лӱмденыт.21 Замзумим калык шуко еҥан, виян да енак-влак гаяк кугу капан лийын. Но Господь нуным пытарен, а мландыштым аммон-влак поген налыныт да тушто илаш тӱҥалыныт.22 Сеирыште илыше Исавын тукымжыланат Господь тыгак ыштен улмаш: Тудо хоррей-влакым пытарен, а Исав тукым еҥ-влак нунын мландыштым поген налыныт да тушан верланеныт. Нуно тушто таче мартеат илат.23 А Газа ола марте шуйналтше яллаште илыше аввей-влакым Кафтор гыч толшо калык*а кырен шалатен да тушто илаш тӱҥалын.
24 Господь каласен: ”Тарваныза да Арнон эҥерым вончыза. Мый тендан кидыш Есевон кугыжам, аморрей Сигоным, да тудын мландыжым пуэм. Тудын дене сарым тӱҥалза, мландыжым сеҥен налза.25 Таче кече гыч тӱҥалын, кава йымалне улшо чыла калык ӱмбаке Мый тыйын ончычет лӱдмаш ден шучкылыкым колтем. Тендан нерген колмеке, нуно лӱдын чытыраш тӱҥалыт”.
26 Кедемоф ир мланде гыч мый уверзе-влакым Есевон кугыжа Сигон деке, тынысым темлен, тыге каласаш колтышым:27 ”Поро лий, шке мландет гоч эртен каяш пу. Ме корно дене каена. Пурлашкат, шолашкат огына савырне.28 Кочкыш ден вӱдым ме ший дене тӱлен налына. Мыланна мландет гоч гына эртен каяш пу.29 Сеирыште илыше Исав тукым да Арыште илыше моав-влак тыгак ыштеныт. Иорданым вончен, ме Господь Юмынан мыланна пуымо мландышкыже каена”.
30 Но Сигон, Есевонын кугыжаже, мемнам шке мландыж гоч колташ келшен огыл. Вет Господь Юмыда тудын чонжым ӱскыртым, шӱмжым вустыкым ыштен. Сигоным тендан кидыш пуаш манын, Господь тыге ыштен, да тидак лийын.31 Господь мыланем каласен: ”Мый тыланда [аморрей] Сигоным, [Есевон кугыжам], да тудын мландыжым пуэм. Тиде мландым сеҥен налаш кайыза!”32 Яац воктене [Есевон кугыжа] Сигон уло сарзе калыкше дене мемнан ваштареш кредалаш лектын.33 Господь Юмына тудым мемнан кидыш пуэн: ме Сигон кугыжам, тудын эргыж-влакым да уло калыкшым кырен шалатышна.34 Ме Сигон кугыжан чыла олажым руалтен нална. Нине ола ден тушто улшо уло калыкым, Господьлан надыр шотеш пӧлеклен, ме пӱтынек пытарышна: пӧръеҥымат, ӱдырамашымат, икшывымат – нигӧмат илышым ышна кодо.35 Ме шкаланна лач вольыкым да олалаште руалтен налме погым нална.36 Арнон эҥер серыште улшо Ароер ола ден лапверысе ола гыч Галаад [курык] марте сеҥен налаш лийдыме ик олат кодын огыл – Господь, мемнан Юмына, чылажымат [мемнан кидыш] пуэн.37 Лач аммон-влакын мландыштым, Иавок изэҥер воктенысе верлам да курыклаште улшо олалам гына тӱкен огынал. Тыге ышташ [мыланна] Господь, мемнан Юмына, кӱштен.
*а 2:23 Тыште Крит гыч лекше филистим калык нерген ойлалтеш.
Глава 2