Выбрать язык
Книги Ветхого Завета
Книги Нового Завета
с русским текстом1 «Кумалаш манын, шкаланда пӱчкеден ыштыме шояк юмым, тӱрлӧ полган тӱсым ида ыште, кумалме кӱ меҥгымат ида шогалте, сӱретан кӱмат шке мландыштыда ида пыште. Вет Мый Господь, тендан Юмыда, улам.
2 Мыйын шуматкече-влакем шуктен шогыза, Мыйын святой верем пагалыза. Мый Господь улам.
3 Мыйын пунчал-влакем почеш илаш, Мыйын кӱштымаш-влакем шуктен шогаш тӱҥалыда гын,4 Мый тыланда шке жапыштыже йӱрым пуэм – тунам мланде лектышым, пушеҥге-влак саскам пуаш тӱҥалыт.5 Шурным шиймаш виноградым погымо жап марте, а виноградым погымаш шурным ӱдымӧ жап марте шуйнаш тӱҥалеш. Тунам те, шке киндыдам теммеш кочкын, шке мландыштыда тыныслын илаш тӱҥалыда.6 Тендан мландышкыда Мый тынысым колтем. Малаш возыда – омыдам нигӧ лугыч ок ыште. Мландыда гыч осал янлык-влакым поктен колтем. Нимогай керде тендан мландыдам ок тӱкӧ.7 Те тушманда-влакым поктен колтеда, нуным керде дене пытареда.8 Те визытын шӱдым поктен колтеда, а шӱдын – лу тӱжемым. Тушманда-влакым керде дене пытареда.
9 Мый тендан деке поро кумылан лиям [да тендам суапландарем]: шуко шочшаным ыштен, тукымдам шукемдем. Тендан дене ыштыме ойпидышем Мый шуктем.10 Ӱмашсе шапаш киндыда утымеш лиеш. У шурнылектышлан вер лийже манын, тоштыжым эсогыл луктын шуашда логалеш.11 Шке илыме верем тендан коклаште шындем, тендан деч ом йырне.12 Мый тендан коклаште илаш тӱҥалам. Мый тендан Юмыда лиям, а те Мыйын калыкем лийыда.13 Мый Господь, тендан Юмыда, улам. Египет мландыште кул ида лий манын, Мый тендам тушечын луктынам – кепшылдам шалатенам да тендам, вуйым кӱшкӧ нӧлталшым, тушеч наҥгаенам.
14 А Мыйым колышташ да чыла нине кӱштымем шукташ огыда тӱҥал,15 Мыйын пунчал-влакем дек тупынь савырнеда, закон-влакем деч йыгыжгеда, кӱштымаш-влакем огыда шукто, да тыге Мыйын ойпидышем пудыртеда гын,16 Мый тендан дене теве мом ыштем: тыланда кугу шучкылыкым, чахотко ден шокшымужо чер-влакым колтем. Нунын деч шинчада вудакаҥеш, илышда лунчырга. Те арам ӱдаш тӱҥалыда: лектышым тушманда-влак кочкыт.17 Мый тендан деке тупынь савырнем – тушманда-влак тендам сеҥат, тендан дене озаланаш тӱҥалыт. Нигӧ ок покто гынат, те лӱдын куржаш тӱҥалыда.
18 Тидын деч варат Мыйым колышташ огыда тӱҥал гын, сулыкланда Мый тендам шым пачаш шукырак мутым кучыктем.19 Ӱскыртлӧ кугешнымашдам Мый шалатем: вуй ӱмбалныда кавам кӱртньӧ гайым, а йол йымалныда мландым той гай пеҥгыдым ыштем.20 Вийдам те арам пытараш тӱҥалыда: мландыда лектышым, тушто улшо пушеҥге-влак саскам огыт пу.
21 [Тидын деч варат] Мыйын ваштарешем каеда да Мыйым ынеда колышт гын, тунам сулыкда верч Мый тендам шым пачаш шукырак кырем.22 Ӱмбакыда ир янлык-влакым колтем, нуно йочадам, вольыкдам пытарат, тендам шагалемдат, а корныда пустаҥыт.
23 Тидын деч варат огыда вашталт да умбакыжат ваштарешем каеда гын,24 Мый Шке тендан ваштареш [шыдем дене] каем да сулыкда верч шым пачаш шукырак кырем.25 Ойпидышем пудыртымылан Мый тендан ӱмбак ӱчым шуктышо кердым колтем. А шке олашкыда шылыда гын, ӱмбакыда шучко черым колтем, да те тушман кидыш логалыда.26 Тендам Мый айдемылан вийым пуышо кинде деч посна кодем. Лу ӱдырамаш тыланда ик коҥгаште киндым пышташ да кажне кинде шултышым висен пуаш тӱҥалеш. Те кочмекдат шужышо лийыда.
27 Тидын деч варат Мыйым огыда колышт да ваштарешем каеда гын,28 Мый Шке тендан ваштареш шыдем дене каем да сулыкда верч шым пачаш шукырак наказатлем.29 Те шке эргыда ден ӱдырдан капыштым кочкаш тӱҥалыда.30 Мый шнуй кӱкшакада-влакым шалатем, тӱтырымӧ жертвенникдам сӱмырем, колышо капдам шояк юмыдан ораташт ӱмбак кышкем. Мый тендан деч йырнем.31 Олада-влакым ир мландыш савырем, святой вердам пустаҥдем, надырдан тамлыпушыжо Мылам келшымым чарна.32 Мландыдам туге пустаҥдем, эсогыл тушко илаш толшо тушманда-влак тидлан ӧрыт.33 А тендам Мый вес калык-влак коклашке шалатем да почешда кердым колтем. Мландыда яраш кодеш, олада шалатыме лийыт.
34 Кунам те тушмандан мландыштыже лийыда да мландыда яраш кодеш, тунам тудо ондак канаш пуыдымо шуматкече ийла олмеш канаш тӱҥалеш.35 Тушто илымыда годым мланде шуматкече ийлаште кунар канен кертын огыл, тунар тудо яра кийымыж годым канаш тӱҥалеш.36 А тендан кокла гыч илыше кодшо-влакын шӱмышкышт Мый тушман мландыште лӱдмашым колтем. Нуно эсогыл лышташ лыжгыктыме йӱк дечын керде деч куржмо семын лӱдын куржыт, почешышт нигӧ ок покто гынат, йӧрлыт.37 Керде деч куржмо семын нуно икте-весыштым тошкен каят, кеч нуным нигӧат ок покто. Тушман ваштареш шогаш вийда ок лий,38 вес калык-влак коклаште пытеда, тушман мланде тендам нелеш.39 А тендан кокла гыч утлен кодшо-влак сулыкыштлан кӧра тушман мландыште пытат, ача-кочаштын сулыкышт верч мерчен кошкат.
40 Тунам нуно шкеныштын да ача-кочаштын сулыкышт нерген, осал паша-влакым ыштен, Мыйын ваштареш шогымышт нерген чон почын каласат.41 Вет чыла сулыкыштлан кӧра Мыят нунын ваштареш [шыдем дене] шогенам да нуным тушман мландыш поктен колтенам. Тунам вустык шӱмышт*а вашталтеш, да нуно шке сулыкышт верч мутым кучаш келшат.42 Тунам Мый Иаков, Исаак да Авраам дене ыштыме ойпидышем шарналтем, тиде мландымат шарналтем.
43 Но тидын деч ончыч нуно шке мландыштым коден каят, тудыжо яраш кодеш да каныде кодымо шуматкече ийла олмеш канаш тӱҥалеш. Мыйын законем-влак деке тупынь савырнымыштлан, пунчалем-влак деч йырнымыштлан тиде нунылан мут кучымо жап лиеш.44 Туге гынат, кунам нуно тушман мландыште лийыт, кӱлдымыш луктын, Мый нунын деч ом йырне. Мый нуным ом пытаре, шке ойпидышем нунын дене ом кӱрл. Вет Мый Господь, нунын Юмышт, улам.45 Мый кугезышт дене ыштыме ойпидышем шарналтем. Нунын Юмышт лияш манын, Мый нуным Египет мланде гыч моло калыкын шинча ончылнышт луктынам. Мый Господь улам».
46 Теве тиде пунчал, кӱштымаш да закон-влакым Господь израиль эрге-влаклан Синай курыкышто Моисей гоч пуэн. Тидын дене Тудо Шкеж да Израиль калык кокласе ойпидышым пеҥгыдемден.
*а 26:41 «Вустык шӱмышт»: вес семын «пӱчдымӧ шӱмышт» манын кусараш лиеш.
Глава 26