Выбрать язык
Книги Ветхого Завета
Книги Нового Завета
с русским текстом1 А иктаж-кӧ Господьлан кинде надырым пуынеже гын, тек эн сай ложашым конда, тушко олив ӱйым опталеш, ӱмбакыже ладыным пышта2 да Ааронын иерей эргыж-влак деке намия. Иерей тушеч олив ӱян ложашым чыла ладынге кормыж тич налеш да шарныктыше ужаш*а семын тидым жертвенникеш йӱлалтен тӱтыра. Тиде – Господьлан келшыше тамлыпушан надыр.3 Кинде надыр деч мо кодшыжо Аарон ден эргыж-влаклан лиеш. Господьлан пуымо надыр гыч тиде поснак святой улеш.
4 Кинде надырлан коҥгаш пыштымым кондет гын, тиде олив ӱй дене йӧрымӧ эн сай ложаш гыч ыштыме шергинде але шере руаш гыч ыштыме да олив ӱй дене шӱрымӧ лепошка лийже.5 Кинде надырет калай ӱмбалан ямдылыме гын, тудо олив ӱй дене йӧрымӧ эн сай ложаш гыч ыштыме шергинде лийже.6 Шергиндым ужашын каткале да ӱмбакше олив ӱйым йоктаре. Тиде [Господьлан] кинде надыр лиеш.7 Кинде надырлан кондымет салмаш кӱэштме гын, тудо олив ӱй дене йӧрымӧ эн сай ложаш гыч ыштыме лийже.8 Тыге ямдылыме кинде надырым Господьлан кондо – тудым иерейлан пу, да тудыжо кондыметым тек жертвенник деке намия.9 Иерей тиде надыр гыч шарныктыше ужашым налеш да жертвенникеш йӱлалтен тӱтыра: тиде – Господьлан келшыше тамлыпушан надыр.10 Кинде надыр деч мо кодшыжо Аарон ден эргыж-влаклан лиеш. Господьлан пуымо надыр гыч тиде поснак святой улеш.
11 Господьлан кондымо нимогай кинде надырым шуктымо руаш дене ида ыште, вет шуктымымат, мӱйымат те Господьлан надыр семын йӱлалтен тӱтырышаш огыдал.12 Нуным Господьлан у лектыш семын конден кертыда. А жертвенникыш нуным тамлыпушан надыр шотеш пыштыман огыл.
13 Чыла тӱрлӧ кинде надырыш шинчалым пыштыман. Шке кинде надыретым Юметын ойпидышыж нерген шарныктыше шинчал*б деч посна ит кондо. [Господь Юметлан] кондымо кеч-могай надырыш шинчалым ешаре.
14 Господьлан кинде надырым шурно лектышын икымше саскаж гыч кондет гын, лектыш гыч шурно парчам тулеш пуштыл, вара пырчым тыгыдемде.15 Тушко олив ӱйым йоктаре да ӱмбакше ладыным пыште. Тиде кинде надыр лиеш.16 Тек иерей, олив ӱян пырче гыч ужашым да уло ладыным налын, чыла тидым шарныктыше ужаш семын йӱлалтен тӱтыра – тиде Господьлан надыр лиеш.
*а 2:2 Шарныктыше ужаш – надырын тиде ужашыже пӱтынь надыр Господьын улмыжым шарныктарен.
*б 2:13 Шинчал ойпидышын пудырташ лийдымыжым ончыктен.
Глава 2